Jeremiya 7:1-34
7 Ndeeli jwi lyakamusikila Jeremiya kuzwa kuli Jehova:
2 “Ima mumulyango waŋanda ya Jehova, eelyo mulinguwo waambilizye mulumbe ooyu, ‘Amumvwe jwi lya Jehova, nywebo nyoonse nobantu bamu Juda nomunjila mumilyango eeyi kuyookotamina Jehova.
3 Mboobu mbwaamba Jehova wamakamu, Leza wa Israyeli: “Amucince nzila zyanu alimwi amicito yanu, eelyo mebo ndilamuzumizya kuti muzumanane kukkala mubusena oobu.+
4 Mutasyomi majwi aakubeja akwaamba kuti, ‘Eeli* nditempele lya Jehova, nditempele lya Jehova, nditempele lya Jehova!’+
5 Nkaambo ikuti naa masimpe mucince nzila zyanu alimwi amicito yanu; ikuti naa masimpe mubetekane kabotu muntu umwi amweenzinyina;+
6 ikuti naa mutabapenzyi bamuzwakule, bamucaala alimwi abamukabafwu;+ ikuti mutatili bulowa bwabantu batakwe mulandu mubusena oobu; alimwi ikuti naa mutatobeli baleza bambi akuliletela mapenzi nobeni;+
7 nkokuti ndilamuzumizya kuti muzumanane kukkala mubusena oobu, munyika njindakapa bamauso kuti bakkale lyoonse alyoonse.”’”
8 “Lino musyoma majwi aakubeja,+ masimpe eeci tacikoomugwasya pe.
9 Sena inga kamubba,+ kamujaya bantu, kamucita bumambe, kamukonka cakubeja,+ kamutuula zipaizyo* kuli Baala+ alimwi kamutobela baleza bambi mbomwatakazyi,
10 kwamana aciindi nciconya kamuboola akwiima kumbele lyangu muŋanda eeyi yiitwa azina lyangu, akwaamba kuti, ‘Masimpe buya tulafwutulwa,’ nokuba kuti mucita zintu zyoonse eezyi zisesemya?
11 Sena ŋanda eeyi yiitwa azina lyangu yaile kuba ciyubilo cababbi mumeso aanu?+ Masimpe ndalibonena ameso aangu,” mbwaamba Jehova.
12 “‘Pele lino kamuya kubusena bwangu ku Silo,+ ooko nkondakasaanguna kupa kuti zina lyangu kalikkala,+ mukabone ncondakacita kulimbubo akaambo kabubi bwabantu bangu bana Israyeli.+
13 Pele mwakazumanana kucita zintu eezyi zyoonse,’ mbwaamba Jehova, ‘alimwi nokuba kuti mebo ndakaambaula andinywe cakwiinduluka-induluka,* tiimwakaswiilila pe.+ Ndakazumanana kumwiita, pele tiimwakavwiila.+
14 Aboobo, eeco ncindakacita ku Silo+ ncendiyoocita akuŋanda eeyi yiitwa azina lyangu,+ eeyo njemusyoma,+ alimwi abusena mbondakamupa nywebo alimwi abamauso.
15 Ndiyoomutanda kuzwa kumbele lyangu, mbubonya mbondakatanda banabokwanu boonse, nkokuti lunyungu loonse lwa Efraimu.’+
16 “Lino yebo, utabapailili bantu aaba pe. Utabalilili kulindime naa kubaiminina mumupailo nokuba kubakombelezyela,+ nkaambo mebo tandikookuswiilila pe.+
17 Sena tobwene nzibacita muminzi ya Juda alimwi amumigwagwa ya Jerusalemu?
18 Bana babo batebba nkuni, mpoonya bamausyi bakunka mulilo, eelyo bamakaintu babo bakanda fulaulu kutegwa bapange zibunge zyakupaizya kuli Namalelo Wajulu,*+ alimwi batila zituuzyo zinyugwa kuli baleza bambi kutegwa bandinyemye.+
19 ‘Pele sena ndime ngobapenzya?’* mbwaamba Jehova. ‘Sena tabalipenzyi lwabo beni, akulijazya nsoni?’+
20 Aboobo mboobu mbwaamba Mwami Singuzuzyoonse Jehova, ‘Amubone! Bukali bwangu akunyema kwangu ziyootilwa abusena oobu,+ abantu alimwi aabanyama, amasamu aamusyokwe alimwi aamicelo iizwa mubulongo; buyoobbebba alimwi tabukazimwi pe.’+
21 “Mboobu mbwaamba Jehova wamakamu, Leza wa Israyeli, ‘Nkooko, amusanganye zituuzyo zyanu zyuumpwa buumbulu kuzipaizyo zyanu zimbi alimwi amulye nyama nywebo nobeni.+
22 Nkaambo mubuzuba mbundakagusya bamauso mucisi ca Egepita, mebo tiindakaambaula ambabo nokuba kubalailila kujatikizya zituuzyo zyuumpwa buumbulu alimwi azipaizyo.+
23 Pele ndakabalailila kuti: “Amuswiilile jwi lyangu, eelyo mebo ndiyooba Leza wanu, alimwi nywebo muyooba bantu bangu.+ Mweelede kweenda munzila zyangu zyoonse nzyendimulailila, kutegwa zintu kazimweendela kabotu.”’+
24 Pele tiibakaswiilila pe, nokuba kucenjeka matwi aabo;+ muciindi caboobo bakatobela makanze* aabo beni, cankazi bakatobela myoyo yabo mibi,+ alimwi bakajoka munsi muciindi cakuya kumbele,
25 kuzwa mubuzuba bamauso nibakazwa mucisi ca Egepita kusikila buzuba obuno.+ Aboobo mebo ndakazumanana kumutumina babelesi bangu boonse basinsimi, ndakali kubatuma buzuba abuzuba, cakwiinduluka-induluka.*+
26 Pele tiibakandiswiilila pe, alimwi tiibakacenjeka matwi aabo pe.+ Muciindi caboobo bakalaankazi,* alimwi bakacita zintu zibi kapati kwiinda bamausyi!
27 “Yebo uyoobaambila majwi aaya oonse,+ pele tabakakuswiilili pe; uyoobaita, pele tabakakuvwiili pe.
28 Uyoobaambila kuti, ‘Eeci ncisi cabantu batakaswiilila jwi lya Jehova Leza wabo alimwi ibakakaka kulaigwa. Kusyomeka kwaloba, alimwi takwaambwi akwaambwa akati kabo.’*+
29 “Kogela masusu aako aayo aatageledwe* waasowe, alimwi koimba lwiimbo lwabuumba* atala aatulundu tutajisi cintu, nkaambo Jehova walikaka alimwi uyoolitantamuka zyalani eeli ilyamunyemya kapati.
30 ‘Nkaambo bantu bamu Juda bacita zintu zibi mumeso aangu,’ mbwaamba Jehova. ‘Babikka mituni yabo iisesemya muŋanda yiitwa azina lyangu, kutegwa baisofwaazye.+
31 Bakayaka masena aakukombela ku Tofeti, mu Kkuti lya Mwana wa Hinomu,*+ kutegwa kabaumpa bana babo basankwa abasimbi mumulilo,+ icintu ncindatakabalailila alimwi catakaboolede mumizeezo yangu nokuceya.’*+
32 “‘Aboobo amubone! mazuba ayoosika,’ mbwaamba Jehova, ‘eelyo nolitakaitwi limbi kuti Tofeti akuti Kkuti lya Mwana wa Hinomu,* pele kuti Kkuti Lyakujaila. Banoozikkila mu Tofeti mane kukabule abusena.+
33 Alimwi mitunta yabantu aaba iyooba cakulya cabayuni bauluka mujulu acabanyama baanyika, cakuti kunyina muntu naba omwe uuyoozikonga.+
34 Muminzi ya Juda amumigwagwa ya Jerusalemu ndiyoopa kuti limane jwi lyakusekelela alimwi ajwi lyakukondwa, ijwi lyasibwiinga alimwi ajwi lyanabwiinga,+ nkaambo cisi coonse ciyooba buyo matongo.’”+
Bupanduluzi buyungizyidwe
^ Mu Chihebrayo, “Aaya,” ikwaamba mayake oonse aali abusena bwatempele.
^ Naa “kamuuntumuna busi bwazipaizyo.”
^ Mu Chihebrayo, “ndakali kufwuma kubuka akwaambaula.”
^ Eeli ndizina lyabulemu lyaleza mukaintu iwakali kukombwa abana Israyeli basiluleyo; ambweni leza mukaintu wabuzyazyi.
^ Naa “ngobanyemya.”
^ Naa “lulayo.”
^ Mu Chihebrayo, “ndakali kufwuma kubuka akubatuma.”
^ Mu Chihebrayo, “bakayumya nsingo zyabo.”
^ Mu Chihebrayo, “kwakosolwa kumilomo yabo.”
^ Naa “aabidwe.”
^ Naa “lwiimbo lwamalila.”
^ Amubone Bupanduluzi Bwamabala, “Gehena.”
^ Naa “catakaboolede mumoyo wangu nokuceya.”
^ Amubone Bupanduluzi Bwamabala, “Gehena.”
