Jobu 33:1-33
33 “Pele lino yebo Jobu, koswiilila majwi aangu;Komvwa zyoonse nzyondiyanda kwaamba.
2 Bona! Ndeelede kujalula mulomo wangu;Mulaka wangu* weelede kwaambaula.
3 Majwi aangu aamba mboululeme moyo wangu,+Alimwi camasimpe milomo yangu yaamba zintu nzyondizyi.
4 Muuya wa Leza nguwakandipanga,+Alimwi muya wa Singuzuzyoonse nguwakandipa kuba muumi.+
5 Ikuti naa ulakonzya, kondiingula;Kondaambila twaambo twako; koima undikazye.
6 Bona! Kuli Leza mwini-mwini mebo ndili buyo mbuli nduwe;Andime ndakabumbwa kuzwa kubulongo.+
7 Aboobo toyelede kundiyoowa mebo pe,Alimwi majwi ngondaamba taayelede kukunyonganya pe.
8 Pele yebo wali kwaambaula kandimvwide,Inzya, ndakumvwa nooli kwaamba majwi aaya aakuti,
9 ‘Ndilasalala, ndinyina cinyonyoono;+Maanza aangu alasalala, ndinyina mulandu pe.+
10 Pele Leza undijanina twaambo kuti andikazye;Undibona mbuli kuti ndili sinkondonyina.+
11 Ubikka maulu aangu muziliba;Ulingula nzila zyangu zyoonse.’+
12 Pele toluzi pe mukwaamba boobu, aboobo ndikwaambila kuti:
Leza mupati kapati kwiinda muntu uulya maila.+
13 Ino nkaambo nzi ncomutongooka?+
Sena nkaambo kakuti tanaakuvwiila zyoonse nzyooli kwaamba?+
14 Nkaambo Leza ulaambaula ciindi comwe alimwi acabili,Pele kunyina muntu uubikkila maano,
15 Muciloto, mucilengaano camasiku,+Eelyo ŋonzi zitaambiki nozibatola bantuNoboona amalo aabo.
16 Mpoonya ulasinkula matwi aabo+Akukankaizya* malailile aakwe kulimbabo,
17 Kutegwa alesye muntu kucita zibi+Akuti akwabilile muntu kukulisumpula.+
18 Leza uleengelela muntu* kuti ataunki kucilindi,*+Ulavwuna buumi bwakwe kuti atajaigwi apanga.*
19 Muntu ulasinswa akucisa nkwamvwa abulo bwakweAlimwi akuzunta kwamafwuwa aakwe ikutaleki,
20 Aboobo ulasesemwa* cinkwa,Alimwi ulakaka kulya niciba cakulya cibotu kapati.+
21 Mubili wakwe ulamana, taucilibonyi pe,Alimwi zifwuwa zyakwe zyatakali kulibonya zili buyo antangalala.
22 Buumi bwakwe bulaswena kucilindi;*Inzya, buumi bwakwe bulaswena kuli baabo bajaya.
23 Ikuti kajisi mutumwa,*Sikumwiiminina omwe, akati kabali cuulu,Kuti aambile muntu cintu ciluzi,
24 Mpoonya Leza ulamufwida luzyalo akwaamba kuti,‘Komuvwuna kuti ataselemukili mucilindi!*+
Ndajana cinunuzyo!+
25 Mubili wakwe auteteete kwiinda wamwana;+Apilukile kumazuba naakacili anguzu zyabukubusi.’+
26 Uyookombelezya Leza,+ eelyo walo uyoomukkomanina,Kumwi kaongolola cakukondwa, muntu ooyo uyoobona busyu bwa Leza,Alimwi Leza uyoopilusya bululami bwakwe kumuntu.
27 Muntu ooyo uyakwaambila* bantunyina kuti,‘Ndabisya+ alimwi ndanyonganya cintu ciluleme,Pele tiindapegwa bulumbu bundeelede.*
28 Wanununa buumi bwangu kuti nditanjili mucilindi,*+Aboobo ndilazumanana kupona akubona mumuni.’
29 Masimpe, Leza nguucita zintu zyoonse eezyiZiindi zyobilo, ziindi zyotatwe, kumuntu,
30 Kutegwa amujole kuzwa kucilindi,*Akuti amunikilwe amumuni wabuumi.+
31 Koteelelesya Jobu! Kondiswiilila!
Koumuna buyo, eelyo mebo ndilazumanana kukanana.
32 Kuti naa kuli ncoyanda kwaamba, kondiingula.
Koamba, nkaambo mebo ndiyanda kusinizya kuti yebo uliluzi.
33 Ikuti tojisi cakwaamba, kondiswiilila;Koumuna, eelyo mebo ndilakuyiisya busongo.”
Bupanduluzi buyungizyidwe
^ Mu Chihebrayo, “Mulaka wangu acilakula cangu.”
^ Mu Chihebrayo, “Akuganta.”
^ Naa “acilwanyo (cakufwusa).”
^ Naa “buumi bwamuntu.”
^ Naa “kucuumbwe.”
^ Mu Chihebrayo, “buumi bwakwe bulasesemwa.”
^ Naa “kucuumbwe.”
^ Naa “mungelo.”
^ Naa “mucuumbwe.”
^ Mu Chihebrayo, “uyakwiimbila.”
^ Naa ambweni, “tiicakandijanya mpindu.”
^ Naa “kucuumbwe.”
^ Mu Chihebrayo, “cilakula.”
