Johane 11:1-57
11 Lino mwaalumi umwi uutegwa Lazaro wakalicisidwe; wakali kuzwa ku Betaniya, mumunzi muzwa Mariya amwanookwabo musimbi Marta.+
2 Mubwini, ooyu ngo Mariya uulya wakananika Mwami mafwuta aanunkilila akumupukuta kumaulu amasusu aakwe;+ nguwakajisi mwanookwabo Lazaro ooyo wakacisidwe.
3 Aboobo bacizyi bakwe bakamutumina mulomo balaamba: “Mwami, bona! Ooyo ngoyandisya ulaciswa.”
4 Pele Jesu naakamvwa boobo wakati: “Bulwazi oobu tabuli bwalufwu pe, pele mbwabulemu bwa Leza+ ikutegwa Mwana wa Leza alemekwe kwiinda mulimbubo.”
5 Lino Jesu wakali kumuyanda Marta amwanookwabo musimbi a Lazaro.
6 Nokuba boobo, naakamvwa kuti Lazaro wakali kuciswa, wakakkala mazuba ambi obilo kubusena ooko nkwaakabede.
7 Mpoonya wakaambila basikwiiya bakwe kuti: “Atuunke mu Judaya alimwi.”
8 Basikwiiya bakwe bakamwaambila kuti: “Rabbi,+ caino-ino aawa bana Judaya bakali kuyanda kukupwaya mabwe,+ aboobo sena nkoyanda kuunka alimwi?”
9 Jesu wakaingula kuti: “Sena buzuba tabujisi mawoola aali 12 aamumuni?+ Ikuti muntu keenda mumumuni, talinontoli kucintu cili coonse nkaambo ubwene mumuni wanyika eeyi.
10 Pele ikuti muntu keenda masiku, ulalinontola nkaambo mumuni tauko mulinguwe.”
11 Naakamana kwaamba zintu eezyi, wakayungizya kuti: “Lazaro mulongwe wesu uloona,+ pele ndilaunka kuyoomubusya.”
12 Aboobo basikwiiya bakwe bakati kulinguwe: “Mwami, ikuti naa uloona, ulapona.”
13 Nokuba boobo Jesu wakali kwaamba zyalufwu lwakwe. Pele balo bakali kuyeeya kuti wakali kwaamba koona kwaŋonzi.
14 Mpoonya cakutainda mumbali Jesu wakabaambila kuti: “Lazaro wafwa,+
15 alimwi ndakondwa akaambo kandinywe kuti tiindaliko, ikutegwa musyome. Pele atuunke kulinguwe.”
16 Aboobo Tomasi, iwakali kwiitwa kuti Wamaanga, wakaambila basikwiiyanyina kuti: “Atuunke andiswe kutegwa tukafwe anguwe.”+
17 Lino Jesu naakasika, wakajana kuti kwakaindide kale mazuba one Lazaro kali mucuumbwe.
18 Lino ku Betaniya kwakali kufwaafwi aku Jerusalemu, wakali buyo musinzo wamakkilomita aatandila kuli otatwe.
19 Alimwi ba Juda banji bakaliboolede kukuumbulizya Marta a Mariya ibakafwidwa mwanookwabo.
20 Ciindi Marta naakamvwa kuti Jesu uli munzila, wakaunka kuyoomucinga; pele Mariya+ walo wakalikkede aŋanda.
21 Aboobo Marta wakati kuli Jesu: “Mwami, ikuti nookaliko kuno, mukwesu naatakafwa.
22 Nokuba boobo, noliba lino ndilizyi kuti kufwumbwa ncomulomba Leza, Leza ulakupa.”
23 Jesu wakati kulinguwe: “Imunyoko ulabuka.”
24 Marta wakati kulinguwe: “Ndilizyi kuti uyoobuka mububuke+ mubuzuba bwamamanino.”
25 Jesu wakamwaambila kuti: “Mebo ndendime bubuke abuumi.+ Ooyo uundisyoma, nokuba kuti wafwa uyooba muumi alimwi;
26 alimwi muntu woonse uupona akundisyoma takafwi pe.+ Sena ulaasyoma makani aaya?”
27 Wakamwaambila kuti: “Inzya Mwami, ndasyoma kuti nduwe Kristo Mwana wa Leza, ooyo weelede kuboola munyika.”
28 Naakamana kwaamba majwi aaya, wakaunka kuyakwiita Mariya mwanookwabo, wakamwaambila kumbali ulaamba: “Mwiiyi+ wasika ulakwiita.”
29 Mariya naakamvwa boobu, wakanyamuka cakufwambaana akuunka kulinguwe.
30 Jesu tanaakaninganjila mumunzi, pele wakacili kubusena nkwaakamujanide Marta.
31 Ciindi ba Juda ibakali antoomwe a Mariya muŋanda alimwi ibakali kumuumbulizya nobakamubona kanyamuka cakufwambaana akuzwa, bakamutobela kabayeeya kuti wakali kuunka kucuumbwe+ kuyoolilila nkuko.
32 Mariya naakasika ooko nkwaakabede Jesu akumubona, wakawida kumaulu aakwe akumwaambila kuti: “Mwami, ikuti nookaliko kuno, mukwesu naatakafwa.”
33 Jesu naakabona Mariya kalila aba Juda ibakaboola anguwe kabalila, wakanyongana kapati mumoyo* alimwi wakapenga.
34 Mpoonya wakati: “Ino mwakamuzikkila kuli?” Bakamwaambila kuti: “Mwami, koboola ubone.”
35 Jesu yakamweenda misozi.+
36 Aboobo ba Juda bakatalika kwaamba kuti: “Amubone, eelo kaka wakali kumuyanda!”
37 Pele bamwi akati kabo bakati: “Sena muntu ooyu iwakajalula meso aamoofwu+ tanaakali kukonzya kumulesya kufwa muntu ooyu?”
38 Mpoonya Jesu naakanyongana alimwi mumoyo, wakasika kucuumbwe. Cuumbwe eeco yakali mpangala alimwi kumulyango kwakasinkidwe bbwe.
39 Jesu wakati: “Amuligusye bbwe.” Marta, imucizyi wasikwaazwa wakamwaambila kuti: “O Mwami, lino weelede kuti ulanunka nkaambo kwainda mazuba one.”
40 Jesu wakati kulinguwe: “Sena tiindakwaambila kuti, ikuti naa wasyoma ulabona bulemu bwa Leza?”+
41 Aboobo bakaligusya bbwe. Mpoonya Jesu wakalanga kujulu+ akwaamba kuti: “Taata, ndakulumba nkaambo wandimvwa.
42 Masimpe, ndalizyi kuti lyoonse ulandimvwa; pele akaambo kankamu eeyi iindizingulukide ndaamba boobu, ikutegwa basyome kuti wakandituma.”+
43 Naakamana kwaamba majwi aaya, wakoompolola ajwi pati kuti: “Lazaro, kozwa oomo!”+
44 Imuntu ooyo iwakafwide wakazwa kazambailidwe zisani kumaulu akumaanza alimwi kavwumbidwe cisani kubusyu bwakwe. Jesu wakabaambila kuti: “Amumuzambulule mumuleke ayende.”
45 Aboobo, ba Juda banji ibakaboolede kuli Mariya, alimwi ibakabona ncaakacita Jesu bakamusyoma,+
46 pele bamwi bakaunka kuba Farisi akuyoobaambila ncaakacita Jesu.
47 Aboobo basilutwe babapaizi aba Farisi bakabunganya Nkuta Mpati Yaba Juda akutalika kwaamba kuti: “Ino tulacita buti, nkaambo muntu ooyu ucita zitondezyo zinji?+
48 Ikuti tumuleke buyo, bantu boonse balamusyoma eelyo ba Roma balaboola akubweza busena* bwesu acisi cesu.”
49 Pele umwi akati kabo, Kayafa,+ iwakali mupaizi mupati mwaka ooyo wakabaambila kuti: “Taaku ncomuzyi pe,
50 alimwi tamubwene kuti ndinywe ngocigwasya ikuti muntu omwe afwide bantu muciindi cakuti cisi coonse cinyonyoonwe.”
51 Nokuba boobo, eeci tanaakacaamba mukuyanda kwakwe mwini pe, pele akaambo kakuti wakali mupaizi mupati mwaka ooyo, wakasinsima kuti Jesu wakali kuyoofwida cisi cabo,
52 alimwi ikutali cisi cabo cilikke, pele akuti ababunganye antoomwe bana ba Leza ibakamwaikide.
53 Aboobo kuzwa buzuba oobo bakamvwana kuti bamujaye.
54 Aboobo Jesu tanaakacili kweenda antangalala akati kaba Juda, pele wakazwa ooko akuunka kubusena bwakali afwaafwi ankanda mumunzi uutegwa Efraimu,+ nkwaakaakukkala abasikwiiya bakwe.
55 Lino Pobwe Lyakwiindilila+ lyaba Juda lyakali afwaafwi, alimwi bantu banji bamucisi eeco bakaunka ku Jerusalemu kutegwa bakalisalazye kweelana acilengwa cabo kalitanatalika Pobwe Lyakwiindilila.
56 Bakali kumuyandaula Jesu alimwi nobakali kwiima-ima mutempele bakali kubuzyanya kuti: “Ino muyeeya buti? Sena muyeeya kuti takooboolela limwi kupobwe?”
57 Pele basilutwe babapaizi aba Farisi bakapede malailile aakuti kufwumbwa muntu uuzyiba nkwaakabede Jesu, wakeelede kubaambila ikutegwa bamujate.
