Johane 16:1-33
16 “Ndamwaambila zintu eezyi kutegwa mutalebwi.
2 Bantu bayoomutanda mucikombelo.+ Mubwini, ciindi ciyoosika eelyo woonse uumujaya+ nayakuyeeya kuti wacitila Leza mulimo uusetekene.
3 Pele bayoocita zintu eezyi akaambo kakuti tabamuzyi Taata alimwi andime.+
4 Nokuba boobo, ndamwaambila zintu eezyi kutegwa caakusika ciindi cakuti zicitike, mukayeeye kuti ndakalimwaambilide.+
“Tiindakamwaambila zintu eezyi kumatalikilo nkaambo ndakalaandinywe.
5 Lino nduunka kuli yooyo wakandituma;+ pele kunyina akati kanu uundibuzya kuti, ‘Ino uunka kuli?’
6 Pele akaambo kakuti ndamwaambila zintu eezyi, myoyo yanu yausa kapati.+
7 Nokuba boobo ndimwaambila masimpe kuti, ndilaunka ikutegwa mugwasyigwe. Nkaambo ikuti tiindaunka mugwasyi+ takabooli kulindinywe pe; pele ikuti naa ndaunka, ndiyoomutuma kulindinywe.
8 Eelyo mugwasyi ooyo aakuboola, nyika uyakwiipa bumboni busalede kujatikizya cibi, bululami alimwi alubeta:
9 cakusaanguna, ikujatikizya cibi,+ nkaambo tabandisyomi;+
10 mpoonya ikujatikizya bululami, nkaambo nduunka kuli Taata alimwi tamukandiboni limbi pe;
11 mpoonya kujatikizya lubeta, nkaambo mweendelezi wanyika eeyi wabetekwa.+
12 “Ndicijisi zintu zinji zyakumwaambila, pele tamukonzyi kuzimvwisya lino.
13 Pele walo ooyo* aakuboola, nkokuti muuya wakasimpe,+ uyoomusololela kuti mukamvwisye kasimpe koonse, nkaambo takaambi zyakwe mwini pe, pele uyakwaamba zintu nzyamvwa, alimwi uyoomwaambila zintu ziciboola.+
14 Walo ooyo uyakundilemeka,+ nkaambo uyakumwaambila nzyayakutambula kuzwa kulindime.+
15 Zintu zyoonse nzyajisi Taata nzizyangu.+ Ncendamwaambila kuti uyoomwaambila nzyatambula kuzwa kulindime.
16 Mukaindi kaniini tamucinoondiboni pe,+ pele alimwi mukaindi kaniini muyoondibona.”
17 Aboobo basikwiiya bakwe bamwi bakatalika kubuzyanya kuti: “Ino ncinzi ncapandulula naamba kuti, ‘Mukaindi kaniini tamucinoondiboni pe, pele alimwi mukaindi kaniini muyoondibona,’ akuti, ‘nkaambo nduunka kuli Taata’?”
18 Eelyo bakali kwaamba kuti: “Ino ncinzi ncapandulula naamba kuti, ‘mukaindi kaniini’? Tatucizyi ncaamba.”
19 Jesu wakazyiba kuti bakali kuyanda kumubuzya, aboobo wakababuzya kuti: “Sena mulabuzyanya akati kanu kujatikizya ceeci, nkaambo ndamwaambila kuti: ‘Mukaindi kaniini tamucinoondiboni pe, pele alimwi mukaindi kaniini muyoondibona?’
20 Ncobeni ndimwaambila masimpe kuti, muyoolila akukwiila, pele nyika iyookondwa; muyakuusa, pele kuusa kwanu kuyoosandulwa kuba kukondwa.+
21 Ciindi mukaintu natumbuka ulausa, nkaambo ciindi cakwe casika, pele naatumbuka mwana, inga tacaayeeyi limbi mapenzi ngaajisi akaambo kakukondwa kwakuti kwazyalwa muntu munyika.
22 Aboobo, andinywe muluuside lino; pele ndiyoomubona alimwi, eelyo myoyo yanu iyookondwa,+ alimwi kunyina uuyoomunyanga lukkomano lwanu.
23 Mubuzuba oobo tamukandibuzyi mubuzyo uuli woonse. Ncobeni ndimwaambila masimpe kuti, ikuti mwamulomba cintu cili coonse Taata,+ uyoomupa ncico muzina lyangu.+
24 Ikusikila lino tamunalomba cintu cili coonse muzina lyangu. Amulombe eelyo muyoopegwa, kutegwa lukkomano lwanu luzulile.
25 “Zintu eezyi ndamwaambila mumaambilambali. Ciyoosika ciindi nendiyooleka kumwaambila mumaambilambali, pele ndiyoomwaambila munzila iisalede kujatikizya Taata.
26 Mubuzuba oobo muyoolomba kuli Taata muzina lyangu; nindaamba boobu, tandaambi kuti ndiyoomulombela buya.
27 Nkaambo Taata mwini ulamuyanda akaambo kakuti mwali kundiyanda mebo+ alimwi musyoma kuti ndakaboola kandili mwiiminizi wa Leza.+
28 Ndakaboola kandili mwiiminizi wa Taata akuboola munyika. Lino ndilaisiya nyika akuunka kuli Taata.”+
29 Basikwiiya bakwe bakati: “Bona! Lino waambaula munzila iisalede, ikutali mumaambilambali.
30 Lino twazyiba kuti ulizizyi zintu zyoonse alimwi kunyina muntu weelede kukukazya. Akaambo kaceeci twasyoma kuti wakazwa kuli Leza.”
31 Jesu wakabaingula kuti: “Sena mwasyoma lino?
32 Amubone! Ciindi cilasika, masimpe casika kale, nomutiimwaikizyanye kuya mwanu-mwanu eelyo mulandisiya ndelikke.+ Nokuba boobo tandili ndelikke pe, nkaambo Taata ulaandime.+
33 Ndamwaambila zintu eezyi kutegwa kwiinda mulindime mube aluumuno.+ Munyika munoojisi mapenzi, pele amube basicamba! Mebo ndaizunda nyika.”+
Bupanduluzi buyungizyidwe
^ Mabala aakuti “walo ooyo” mutupango 13 a 14 aamba “mugwasyi” iwaambwa mukapango 7. Jesu wakabelesya bbala lyakuti “mugwasyi” ikwaamba muuya uusalala mbuli kuti muntu.
