Johane 18:1-40
18 Naakamana kwaamba zintu eezyi, Jesu abasikwiiya bakwe bakaunka mutala lya Kkuti lya Kidroni*+ ooko ikwakali muunda, eelyo walo abasikwiiya bakwe bakanjila mulinguwo.+
2 Lino Judasi, sikumwaaba awalo wakalibuzyi busena oobo, nkaambo Jesu ziindi zinji wakali kuswaangana ooko abasikwiiya bakwe.
3 Aboobo Judasi wakasololela nkamu yabasikalumamba abakapaso babasilutwe babapaizi ababa Farisi akusika kubusena oobo kabajisi minzenge, malambe alimwi azilwanyo.+
4 Mpoonya Jesu kazyi zintu zyoonse zyakali kuyanda kumucitikila, wakabacinga akubabuzya kuti: “Ino nguni ngomuyandaula?”
5 Bakamwiingula kuti: “Jesu muna Nazareta.”+ Wakabaambila kuti: “Ndendime.” Lino Judasi sikumwaaba, awalo wakaliimvwi ambabo.+
6 Pele Jesu naakabaambila kuti, “Ndendime,” bakajoka munsi akuwida ansi.+
7 Aboobo wakababuzya alimwi kuti: “Ino nguni ngomuyandaula?” Bakati: “Jesu muna Nazareta.”
8 Jesu wakaingula kuti: “Ndamwaambila kale kuti ndendime. Aboobo ikuti naa ndime ngomuyandaula, amubaleke aaba baunke.”
9 Cakaba boobu kutegwa azuzikizyigwe majwi ngaakaamba aakuti: “Kunyina naba omwe wakandisweeka akati kabaabo mbowakandipa.”+
10 Mpoonya Simoni Petro, ooyo wakajisi panga, wakalisomona akuuma muzike wamupaizi mupati akumukosola kutwi+ kwakwe kwakululyo. Imuzike ooyo wakali kwiitwa kuti Maliko.
11 Pele Jesu wakaambila Petro kuti: “Kolipilusya panga mucikanda+ candilyo. Sena tandeelede kunywa nkapu njaandipa Taata?”+
12 Mpoonya basikalumamba amweendelezi wabasikalumamba alimwi abakapaso baba Juda bakamujata Jesu akumwaanga.
13 Bakasaanguna kumutola kuli Anasi, nkaambo wakali usyizyala Kayafa,+ walo iwakali mupaizi mupati mwaka ooyo.+
14 Mubwini, Kayafa ooyu ngonguwe wakaambilide ba Juda kuti cakali kugwasya mbabo kuti muntu omwe afwide bantu.+
15 Lino Simoni Petro asikwiiya uumbi bakali kumutobela Jesu.+ Sikwiiya ooyo wakalizyibidwe kumupaizi mupati, aboobo wakanjila antoomwe a Jesu mulubuwa lwamupaizi mupati,
16 pele Petro wakaliimvwi anze kumulyango.* Aboobo sikwiiya ooyo uumbi iwakazyibidwe kumupaizi mupati, wakazwa akuyoobandika amulindizi wamulyango, eelyo wakamunjizya mukati Petro.
17 Mpoonya mubelesi musimbi iwakali mulindizi wamulyango wakabuzya Petro kuti: “Sena ayebo toli umwi wabasikwiiya bamuntu ooyu?” Walo wakati: “Tandili umwi wabo pe.”+
18 Lino bazike abakapaso bakaliimvwi kumulilo wamalasya ngobakakunkide nkaambo kwakali kutontola, aboobo bakali kuyota mulilo. Petro awalo wakaliimvwi ambabo kayota mulilo.
19 Aboobo silutwe wabapaizi wakabuzya Jesu kujatikizya basikwiiya bakwe akujatikizya njiisyo zyakwe.
20 Jesu wakamwiingula kuti: “Ndakali kwaambila buleya caantangalala. Lyoonse ndakali kuyiisya mucikombelo alimwi amutempele,+ ooko ba Juda boonse nkobaswaanganina, alimwi kunyina cintu ncindakaamba cakusisikizya.
21 Ino nkaambo nzi ncobuzya ndime? Kobuzya baabo bakamvwa nzyondakali kubaambila. Bona! Aaba balizizyi nzyondakaamba.”
22 Naakamana kwaamba zintu eezyi, umwi wabakapaso iwakaimvwi munsi-munsi wakauma Jesu lubayi kumeso+ akumwaambila kuti: “Sena oobu mbonga waingula silutwe wabapaizi?”
23 Jesu wakamwiingula kuti: “Ikuti naa ndalubizya mukwaambaula, kondaambila ncindalubizya; pele ikuti naa ncindaamba cililuzi, ino unduumina nzi?”
24 Mpoonya Anasi wakatumina Jesu kaangidwe kuli Kayafa mupaizi mupati.+
25 Lino Simoni Petro wakaliimvwi ooko kayota mulilo. Mpoonya bakamubuzya kuti: “Sena ayebo toli umwi wabasikwiiya bakwe?” Wakakazya ulaamba: “Tandili umwi wabo pe.”+
26 Umwi wabazike bamupaizi mupati iwakali musazinyina wamuntu ooyo ngwaakakosola kutwi Petro,+ wakati: “Sena toli nduwe yebo ngundakabona koli anguwe mumuunda?”
27 Nokuba boobo, Petro wakakazya alimwi, eelyo ndilyonya mukombwe wakalila.+
28 Mpoonya kuzwa kuli Kayafa Jesu bakamutola kuŋanda yamweendelezi.+ Lino akali mafwumofwumo. Pele balo tiibakanjila muŋanda yamweendelezi kutegwa batasofwaali,+ pele ikuti balye Pobwe Lyakwiindilila.
29 Aboobo Pilato wakazwida anze kulimbabo akubabuzya kuti: “Mulandu nzi ngomumupa muntu ooyu?”
30 Bakamwiingula kuti: “Ikuti muntu ooyu naatali simucita zibi,* notwatamuleta kulinduwe.”
31 Aboobo Pilato wakabaambila kuti: “Amumutole nobeni mukamubeteke kweelana amulawo wanu.”+ Iba Juda bakati kulinguwe: “Tatuzumizyidwe kujaya muntu uuli woonse.”+
32 Cakaba boobu ikutegwa azuzikizyigwe majwi ngaakaamba Jesu ikutondezya mbolwakali kuyooba lufwu lwakwe ilwakali afwaafwi.+
33 Aboobo Pilato wakanjila alimwi muŋanda yakwe yabweendelezi akwiita Jesu akumubuzya kuti: “Sena uli Mwami waba Juda?”+
34 Jesu wakaingula kuti: “Sena eeci ulyaambila buya omwini naa kuli bakakwaambila kujatikizya ndime?”
35 Pilato wakaingula kuti: “Sena ndili mu Juda mebo? Bantu bako alimwi abasilutwe babapaizi mbabakuleta kulindime. Ino ncinzi ncookacita?”
36 Jesu wakaingula kuti:+ “Bwami bwangu tabuli bwanyika eeyi.+ Ikuti Bwami bwangu nobwali bwanyika eeyi, ibabelesi bangu nobalwana kutegwa nditaabwi kuba Juda.+ Pele lino Bwami bwangu tabuzwi munyika eeyi pe.”
37 Aboobo Pilato wakati kulinguwe: “Sena nkokuti uli Mwami?” Jesu wakaingula kuti: “Yebo omwini waamba kuti ndili mwami.+ Eeci ncindakazyalilwa alimwi ncindakaboolela munyika, ikuti ndipe bumboni kujatikizya kasimpe.+ Muntu woonse uuli kulubazu lwakasimpe ulaliswiilila jwi lyangu.”
38 Pilato wakamubuzya kuti: “Ino kasimpe ninzi?”
Naakamana kubuzya boobo, wakazwida anze alimwi kuba Juda akubaambila kuti: “Kunyina mulandu ngundajana mulinguwe.+
39 Kunze lyaboobo, mujisi ciyanza cakuti kandimwaangunwida muntu ciindi ca Pobwe Lyakwiindilila.+ Aboobo sena muyanda kuti ndimwaangunwide Mwami waba Juda?”
40 Mpoonya bakoompolola alimwi balaamba: “Ikutali muntu ooyu pe, pele Baraba!” Lino Baraba wakali mubbi.+
