Johane 19:1-42
19 Mpoonya Pilato wakabweza Jesu akumukwibbaula.+
2 Eelyo basikalumamba bakapanga musini wamamvwa akumusamika kumutwe alimwi bakamusamika acisani cilamfwu camubala wacisombo,+
3 mpoonya bakali kuboola kulinguwe akwaamba kuti: “Wabonwa, yebo O Mwami waba Juda!” Alimwi bakamuuma mbayi kumeso.+
4 Kumane Pilato wakazwida anze akubaambila kuti: “Amubone! Ndamuleta anze kulindinywe kutegwa muzyibe kuti kunyina mulandu ngundajana mulinguwe.”+
5 Aboobo Jesu wakazwida anze, kasamide musini wamamvwa acisani cilamfwu camubala wacisombo. Mpoonya Pilato wakati kulimbabo: “Amulange! Ngomuntu ooyu!”
6 Pele basilutwe babapaizi abakapaso nobakamubona, bakoompolola kuti: “Komugagaila aacisamu! Komugagaila aacisamu!”*+ Pilato wakati kulimbabo: “Amumutole nobeni mukamujaye,* nkaambo kunyina mulandu ngundajana mulinguwe.”+
7 Iba Juda bakamwiingula kuti: “Tulijisi mulawo, eelyo kweelana amulawo muntu ooyu weelede kufwa,+ nkaambo wakalyaamba kuti Mwana wa Leza.”+
8 Pilato naakamvwa nzyobakali kwaamba wakaindila kuyoowa,
9 eelyo wakanjila muŋanda yakwe yabweendelezi alimwi, akubuzya Jesu kuti: “Ino uzwa kuli yebo?” Pele Jesu taakamwiingula pe.+
10 Aboobo Pilato wakati kulinguwe: “Sena toyandi kwaambaula andime? Sena tozyi kuti ndilijisi nguzu zyakukwaangununa alimwi anguzu zyakukujaya?”*
11 Jesu wakamwiingula kuti: “Nootalijisi nguzu zili zyoonse kulindime ikuti nootakapegwa nzizyo kuzwa kujulu. Nkakaambo kaako muntu ooyo wakandaaba kulinduwe ujisi cibi cipati kapati.”
12 Akaambo kaceeci Pilato wakasoleka kujana nzila yakuti amwaangunune, pele ba Juda bakoompolola kuti: “Ikuti naa umwaangunune muntu ooyu, nkokuti toli mulongwe wa Kaisara. Kufwumbwa muntu uulyaamba kuti mwami, ukazyanya* a Kaisara.”+
13 Mpoonya Pilato naakamvwa majwi aaya, wakaleta Jesu anze, akukkala acuuno calubeta kubusena butegwa Ibbuwa Lyakayalwa Mabwe, pele mu Chihebrayo ibutegwa Gabbata.
14 Lino bwakali buzuba bwa Kulibambila+ Pobwe Lyakwiindilila; ciindi cakali afwaafwi awoola lyacisambomwe.* Eelyo wakaambila ba Juda kuti: “Amubone! Ngooyu mwami wanu!”
15 Pele bakoompolola balaamba: “Komutolooko! Komutolooko! Komugagaila aacisamu!”* Pilato wakati kulimbabo: “Sena ndimujaye mwami wanu?” Basilutwe babapaizi bakaingula kuti: “Tatujisi mwami umbi kunze lya Kaisara.”
16 Mpoonya wakamupa kulimbabo kutegwa akajaigwe aacisamu.+
Aboobo basikalumamba bakamutola Jesu.
17 Kanyamwide cisamu cakwe cakupenzyezya,* wakazwa akuya kubusena butegwa Busena bwa Cipapa Camutwe,+ ibutegwa Gologota mu Chihebrayo.+
18 Ooko bakamugagaila aacisamu,+ abantu bamwi bobilo ibakali anguwe, kulubazu alumwi kakuli omwe, walo Jesu kali akati.+
19 Alimwi Pilato wakalemba zina lyabulemu akulibikka acisamu cakupenzyezya.* Lyakalembedwe kuti: “Jesu Muna Nazareta Mwami Waba Juda.”+
20 Iba Juda banji bakalibala zina eeli, nkaambo ibusena ooko nkwaakagagaililwa aacisamu Jesu bwakali afwaafwi amunzi, alimwi lyakalembedwe mu Chihebrayo, mu Chilatini amu Chigiriki.
21 Pele basilutwe babapaizi baba Juda bakaambila Pilato kuti: “Utalembi kuti ‘Mwami Waba Juda,’ pele kolemba kuti wakaamba kuti, ‘Ndili Mwami Waba Juda.’”
22 Pilato wakaingula kuti: “Eeci ncindalemba, ndalemba.”
23 Lino basikalumamba nobakamana kumugagaila aacisamu Jesu, bakabweza zisani zyakwe zyaatala akuzizapaula muzibeela zyone, sikalumamba aumwi wakabweza cibeela comwe. Alimwi bakabweza acisani cakwe camukati. Pele cisani eeci kunyina mpocakaswaanganizyidwe amuluko wantali, mbwaanga cakali buyo comwe kuzwa mujulu kusikila ansi.
24 Aboobo bakaambauzyanya kabati: “Tutacizapauli pe, pele atuume cisolo kutegwa tubone naa cilaba cani.”+ Bakacita boobo kutegwa luzuzikizyigwe lugwalo lwaamba kuti: “Bakaabana zisani zyangu, alimwi bakacuumina cisolo cisani cangu.”+ Aboobo basikalumamba bakazicita ncobeni zintu eezyi.
25 Pele munsi aacisamu cakupenzyezya* ca Jesu kwakaimvwi banyina alimwi amwanookwabo banyina+ mukaintu; Mariya muka Kulopa a Mariya Magadalene.+
26 Aboobo Jesu naakabona banyina alimwi asikwiiya ngwaakali kuyandisya+ kabaimvwi munsi-munsi, wakaambila banyina kuti: “Amubone! Ngooyu mwanaanu!”
27 Mpoonya wakaambila sikwiiya ooyo kuti: “Bona! Mbaaba banyoko!” Aboobo kuzwa aciindi eeco sikwiiya ooyo wakabatola kuŋanda yakwe.
28 Nozyakainda zintu eezyi, Jesu naakazyiba kuti lino zintu zyoonse zyazuzikizyigwa, ikutegwa azuzikizye lugwalo wakati: “Ndafwa nyota.”+
29 Aawo kwakali nongo yakazwide waini uupapide. Aboobo bakasomeka nsinsa iinyikidwe muwaini ooyo uupapide kukasamu kahisopo* akwiitambikizya kumulomo wakwe.+
30 Naakaulabila waini uupapide, Jesu wakati: “Zyazuzikizyigwa!”+ Mpoonya wakakotama, waleka kuyoya.*+
31 Mbwaanga bwakali buzuba bwa Kulibambila,+ ikutegwa mibili itazumanani kuba aazisamu+ zyakupenzyezya mu Sabata (nkaambo buzuba oobo bwa Sabata bwakali bupati),+ iba Juda bakalomba Pilato kuti maulu atyolaulwe akuti mibili igusyigwe.
32 Aboobo basikalumamba bakaboola akutyola maulu aamwaalumi wakusaanguna aamwaalumi ooyo uumbi iwakali aacisamu kumbali lyakwe.
33 Pele nobakasika aali Jesu, bakabona kuti ulifwide kale, aboobo kunyina nobakaatyola maulu aakwe.
34 Nokuba boobo, umwi wabasikalumamba wakamuyasa sumo mumabambo,+ eelyo mpoonya aawo kwakazwa bulowa amaanzi.
35 Eelyo ooyo iwakalibonena zintu eezyi wapa bumboni oobu, kunze lyaboobo bumboni bwakwe mbwamasimpe alimwi muntu ooyo ulizyi kuti nzyaamba nzyamasimpe, kutegwa anywebo musyome.+
36 Mubwini, zintu eezyi zyakacitika ikutegwa luzuzikizyigwe lugwalo ilwaamba kuti: “Kunyina cifwuwa cakwe nociba comwe iciyootyolwa.”+
37 Alimwi lugwalo lumbi lwaamba kuti: “Bayoolanga kuli yooyo ngobakayasa.”+
38 Lino zintu eezyi nozyakainda, Josefa waku Aremateya, sikwiiya wa Jesu iwakali kulisisa akaambo kakuyoowa ba Juda,+ wakalomba Pilato kuti agusye mubili wa Jesu, eelyo Pilato wakamuzumizya. Aboobo wakaboola akutola mubili wakwe.+
39 Nikodemo+ imuntu uulya wakaswaya Jesu masiku ciindi cakusaanguna, awalo wakaboola, wakaleta cibbudu catununkilizyo twamuro alimwi aaloye tuvweledwe, icilema makkilogilamu aatandila ku 33.+
40 Aboobo bakabweza mubili wa Jesu akuuvwungaila mumilembo antoomwe atununkilizyo,+ kweelana acilengwa ncobacita ba Juda nobazikka.
41 Lino kubusena ooko nkwaakajailwa* kwakali muunda, alimwi mumuunda ooyo kwakali cuumbwe cipya+ catakaningazikkilwa muntu.
42 Akaambo kakuti bwakali buzuba bwa Kulibambila+ bwaba Juda, alimwi mbwaanga cuumbwe cakali afwaafwi, bakamuzikka Jesu oomo.
Bupanduluzi buyungizyidwe
^ Naa “Komujaya aacisamu! Komujaya aacisamu!”
^ Naa “mukamujaye aacisamu.”
^ Naa “zyakukujaya aacisamu?”
^ Naa “ulwana.”
^ Nkokuti, cakuma 12 koloko.
^ Naa “Komujaya aacisamu!”
^ Amubone Bupanduluzi Bwamabala.
^ Amubone Bupanduluzi Bwamabala.
^ Amubone Bupanduluzi Bwamabala.
^ Amubone Bupanduluzi Bwamabala.
^ Naa “wafwa.”
^ Naa “nkwaakajailwa aacisamu.”
