Johane 5:1-47
5 Nozyakainda zintu eezyi kwakali pobwe+ lyaba Juda, alimwi Jesu wakaunka ku Jerusalemu.
2 Lino mu Jerusalemu kufwaafwi a Mulyango+ wa Mbelele kuli zyiba eelyo mu Chihebrayo liitwa kuti Betezata,* ilijisi makkoce* osanwe mumbali.
3 Oomu mumakkoce momumo bantu banji ibaciswa, boofwu, balema abaabo bapuutide* maanza amaulu mobakalede.
4 *—
5 Pele kwakali amuntu umwi wakali kuciswa kwamyaka iili 38.
6 Naakamubona muntu ooyu kalede, alimwi mbwaanga wakalizyi kuti wakali mulwazi kwaciindi cilamfwu, Jesu wakamubuzya kuti: “Sena ulayanda kupona?”+
7 Imuntu ooyo uuciswa wakamwiingula kuti: “O Mwami, tandijisi muntu wakundibikka muzyiba eelyo maanzi naavwundauka, pele inga ndayanda kunjila ndijana kuti umwi wandiindila kale.”
8 Jesu wakati kulinguwe: “Nyamuka! Bweza macila* aako weende.”+
9 Eelyo muntu ooyo wakapona ndilyonya, alimwi wakabweza macila* aakwe akutalika kweenda.
Lino oobu bwakali buzuba bwa Sabata.
10 Aboobo ba Juda bakatalika kwaambila muntu ooyo wakaponesyegwa kuti: “Sunu mbuzuba bwa Sabata, aboobo toyelede kunyamuna macila* pe.”+
11 Pele wakabaingula kuti: “Ooyo wandiponya nguwandaambila kuti, ‘Bweza macila* aako weende.’”
12 Bakamubuzya kuti: “Nguni muntu ooyo wakwaambila kuti, ‘Bweza macila aako weende’?”
13 Pele muntu ooyo wakaponesyegwa tanaakamuzyiba, nkaambo Jesu wakanjila munkamu yabantu ibakali kooko.
14 Nozyakainda zintu eezyi Jesu wakamujana mutempele akumwaambila kuti: “Bona lino wapona. Utakabisyi limbi, kutegwa utakacitikilwi cintu ciinda kubija.”
15 Imuntu ooyo wakaunka akuyakwaambila ba Juda kuti ngu Jesu wakamuponya.
16 Akaambo kaceeci iba Juda bakatalika kumupenzya Jesu, nkaambo wakali kucita zintu eezyi mu Sabata.
17 Pele wakabaingula kuti: “Taata ulabeleka ambuli sunu, aboobo andime ndiluujisi kubeleka.”+
18 Nkakaambo kaako iba Juda bakatalika kusolekesya kumujaya, nkaambo tanaakali kutyola buyo mulawo wa Sabata, pele alimwi wakali kwaamba Leza kuti Mbaausyi,+ nkokuti wakali kulipa kweelana a Leza.+
19 Aboobo mukubaingula, Jesu wakati kulimbabo: “Ncobeni ndimwaambila masimpe kuti, Mwana takonzyi kulicitila cintu cili coonse mwini, pele ucita buyo ceeco ncabona kabacita Bausyi.+ Nkaambo kufwumbwa zintu nzyobacita balo, nzyezintu awalo Mwana nzyacita.
20 Nkaambo Taata ulamuyanda Mwana+ aboobo ulamutondezya zintu zyoonse nzyacita walo, alimwi uyoomutondezya milimo mipati kwiinda yeeyi, ikutegwa nywebo mukagambwe.+
21 Nkaambo mbubonya Taata mbwabusya bafwide akubapa kuba baumi,+ awalo Mwana ulamupa kuba muumi kufwumbwa muntu ngwayanda.+
22 Nkaambo kunyina muntu naba omwe ngwabeteka Taata, pele kubeteka koonse wakupa Mwana,+
23 kutegwa boonse bamulemeke Mwana mbubonya mbobalemeka Bausyi. Kufwumbwa uutalemeki Mwana tabalemeki a Bausyi bakamutuma.+
24 Ncobeni ndimwaambila masimpe kuti, kufwumbwa uumvwa majwi aangu akumusyoma ooyo wakandituma ulaabuumi butamani,+ alimwi tabetekwi pe, pele wazwa kulufwu akuya kubuumi.+
25 “Ncobeni ndimwaambila masimpe kuti, ciyoosika ciindi, alimwi ndilino, eelyo bafwide nobayoomvwa ijwi lya Mwana wa Leza alimwi aabo ibaliswiilila bayooba baumi.
26 Nkaambo mbubonya Taata mbwajisi buumi mulinguwe mwini,*+ awalo Mwana wakamupa mbubonya kuti abe abuumi mulinguwe mwini.+
27 Alimwi wamupa nguzu zyakubeteka,+ nkaambo Mwanaamuntu.+
28 Mutagambwi amakani aaya, nkaambo ciyoosika ciindi eelyo aabo boonse ibali muzyuumbwe* nobayoomvwa ijwi lyakwe+
29 akuzwa mulinzizyo, aabo ibakacita zintu zibotu kububuke bwabuumi, aabo ibakacita zintu zibyaabi kububuke bwalubeta.+
30 Tandilicitili cintu cili coonse ndemwini. Ndilabeteka kweelana ancondimvwa, alimwi lubeta ndondipa luliluleme+ nkaambo tanditobeli kuyanda kwangu ndemwini pe, pele nditobela kuyanda kwayooyo wakandituma.+
31 “Ikuti ndemwini kandilicitila bumboni, bumboni bwangu tabuli bwamasimpe.+
32 Nkwali umbi uupa bumboni kujatikizya ndime, alimwi ndilizyi kuti bumboni mbwapa kujatikizya ndime mbwamasimpe.+
33 Mwakatuma bantu kuli Johane, alimwi walo wakapa bumboni kukasimpe.+
34 Nokuba boobo, tandisyomi bumboni bwabantu, pele ndaamba zintu eezyi kutegwa mufwutulwe.
35 Uulya muntu wakali lambe liyaka akumunika, alimwi nywebo kwaciindi cisyoonto mwakali kuyandisisya kukondwa kapati mumumuni wakwe.+
36 Pele ndilijisi bumboni bupati kwiinda boobo mbwaakapa Johane, nkaambo milimo eeyo Taata njaakandipa kuti ndiicite, imilimo njiyona eeyi njendicita, ipa bumboni bwakuti Taata nguwakandituma.+
37 Alimwi Taata lwakwe iwakandituma wapa bumboni kujatikizya ndime.+ Kunyina ciindi cili coonse nywebo nomwakalimvwa ijwi lyakwe nokuba kumubona mbwabede ciimo,+
38 alimwi jwi lyakwe talikkalilili mulindinywe, nkaambo tamumusyomi pe ooyo ngwaakatuma.
39 “Mulavwuntauzya mu Magwalo+ nkaambo muyeeya kuti kwiinda mulingawo muyoojana buumi butamani; alimwi aaya ngangawo aapa bumboni kujatikizya ndime.+
40 Pele tamuyandi kuboola kulindime+ kuti mujane buumi.
41 Tanditambuli bulemu buzwa kubantu,
42 pele ndilizyi kabotu kuti nywebo tamumuyandi Leza pe.
43 Ndaboola muzina lya Taata, pele tiimwanditambula pe. Ikuti umbi naakaboola muzina lyakwe mwini, ooyo nomwakamutambula.
44 Ino inga mwasyoma buti, kakuli muzumina bulemu mbomupana mulicanu alimwi tamuyandauli bulemu oobo buzwa kuli Leza uuli alikke?+
45 Mutayeeyi kuti ndilamupa mulandu kuli Taata; pele nkwali uumupa mulandu, Musa,+ mwaalumi ooyo ngomusyoma.
46 Mubwini ikuti nomwali kumusyoma Musa nomwandisyoma andime, nkaambo ooyo wakalemba zijatikizya ndime.+
47 Pele ikuti kamutazisyomi nzyaakalemba walo, ino inga mwazisyoma buti nzyondaamba?”
Bupanduluzi buyungizyidwe
^ Malembe aa Bbaibbele amwi aansiku aamba kuti, ‘Betesaida’ naa ‘Betesida.’
^ Bamwi baamba kuti “maduze.”
^ Naa “balebukide.”
^ Amubone Makani Aayungizyidwe A3.
^ Naa “kalo.”
^ Naa “kalo.”
^ Naa “kalo.”
^ Naa “kalo.”
^ Naa “mbwajisi cipego cabuumi mulinguwe mwini.”
^ Mu Chigiriki, “muzyuumbwe zyaciibalusyo” naa “muzyuumbwe zijisi mulimo wakwiibalusya.”
