Juda 1:1-25
1 Ndime Juda, muzike wa Jesu Kristo pele imunyina Jakobo,+ nendilembela baabo bakaitwa+ ibayandwa a Leza Taata alimwi ibabambilidwe Jesu Kristo kuti:+
2 Amuyungizyilwe luse, luumuno alimwi aluyando.
3 Nobayandwa, nokuba kuti ndakali kusoleka kusikila mpondigolela kuti ndimulembele makani aalufwutuko ndotujisi toonse,+ ndakabona kuti ndeelede kumulembela makani aakumukulwaizya kuti muyume kulwanina lusyomo+ ilwakapegwa ciindi comwe buyo kubasalali.
4 Ndacita boobo nkaambo kuli bantu bamwi ibali kunjila akati kanu cakusobelela, aabo kuzwa kaindi ibasalidwe a Magwalo kuti babe alubeta oolu; ibantu basampaula Leza, ibasandula luzyalo lwa Leza kuba cilitamizyo cakuba abukkale busesemya,*+ alimwi batasyomeki kuli yooyo mukamwini* alimwi Mwami wesu uuli alikke, Jesu Kristo.+
5 Nokuba kuti mulizizyi kabotu zintu zyoonse eezyi, ndiyanda kumuyeezya kuti Jehova* wakabafwutula bantu bamwi kuzwa mucisi ca Egepita,+ pele kumbele wakabanyonyoona aabo ibatakali kutondezya lusyomo.+
6 Alimwi ibangelo batakazumanana mubusena bwabo bwakusaanguna pele ibakasiya busena bwabo bwakukkala bubeelede,+ ulibayobwede kabaangidwe nketani lyoonse mumudima uusiya mbi kusikila nobayoobetekwa mubuzuba bupati.+
7 Mbubonya buyo, Sodoma a Gomora alimwi aminzi yakali munsi-munsi, ayalo yakacita bwaamu* butaambiki akutobela zisusi zyanyama zitondwa;+ eeyi ibikkidwe kumbele lyesu kuti cibe cikozyanyo cakutucenjezya kwiinda mukwiibeteka akwiipa cisubulo camulilo uutamani.+
8 Nokuba boobo, bantu aaba abalo mbaasikulota, basofwaazya mubili, banyansya beendelezi alimwi basampaula baabo balemekwa.+
9 Pele Mikayeli+ silutwe wabangelo+ naakaimpana a Diabolosi alimwi naakali kukazyanya anguwe kujatikizya mubili wa Musa,+ kunyina naakasola kumubeteka cakumusampaula pe,+ pele wakati: “Jehova* akukalalile.”+
10 Nokuba boobo, bantu aaba basampaula zintu zyoonse nzyobatamvwisyi kabotu.+ Alimwi zintu zyoonse nzyobamvwisya kweelana aluzyibo ndobakalengwa andulo mbubonya mbuli banyama batayeeyi,+ nzyezintu nzyobazumanana kulisofwaazya anzizyo.
11 Maawe kulimbabo, nkaambo batobela nzila ya Kaini,+ alimwi babalikila munzila iilubide ya Balamu+ kutegwa bajane bulumbu, alimwi banyonyooka muŋambawido+ yabuzangi ya Kora!+
12 Aaba bantu mabwe aatalibonyi mumaanzi mumapobwe aanu aaluyando ciindi nobalya andinywe,+ mbeembezi balisanina beni cakutayoowa;+ makumbi aatakwe maanzi aapepululwa amuwo ooku akooku;+ masamu aatazyede micelo kuciindi cangawo,* aafwide ziindi zyobilo, aazyulidwe;
13 mayuwe aamulwizi aayoosya aagusya ccovwu lyangawo lyazintu zyuusya nsoni;+ ninyenyeezi zitakwe nzila ini-ini moziinda, iziyobwedwe mudima uusiya mbi mane kukabe kutamani.+
14 Inzya, Enoki,+ imuntu waciloba mumulongo kuzwa kuli Adamu awalo wakasinsima kujatikizya mbabo, naakati: “Amubone! Jehova* wakaboola amakumi-makumi aazyuulu zyabangelo bakwe basalala,+
15 kuti abeteke bantu boonse,+ akubazula boonse basampaula Leza mumicito yabo iisampaula Leza njobakacita munzila iisampaula Leza, alimwi akujatikizya zintu zyoonse ziyumya mate nzyobakali kumwaamba basizibi basampaula Leza.”+
16 Aaba bantu mbaasikuŋuŋuna,+ lyoonse balatongooka kujatikizya bukkale bwabo, batobela zisusi zyabo beni,+ alimwi milomo yabo yaamba majwi aakulidunda, kulubazu lumwi balumbaizya bantu kutegwa baligwasye lwabo beni.+
17 Pele nywebo nobayandwa, amuyeeye majwi aakaambwa musyule* abaapostolo ba Mwami wesu Jesu Kristo,
18 mbobakali kumwaambila kuti: “Kuciindi camamanino kuyooba basikasampusampu, ibayootobela zisusi zyabo beni kutegwa bacite zintu zisampaula Leza.”+
19 Aaba mbabantu baandaanya bamwi,+ ibajisi zilengwa zyabunyama,* ibatabikkili maano kuzintu zyakumuuya.*
20 Pele nywebo, nobayandwa, amuliyake nobeni aantalisyo yalusyomo lwanu lusalalisya alimwi kamupaila amuuya uusalala,+
21 ikutegwa muzumanane kukkala muluyando lwa Leza,+ eelyo nomulindila luse lwa Mwami wesu Jesu Kristo ilusololela kubuumi butamani.+
22 Kunze lyaboobo, amuzumanane kubafwida luse+ aabo bamwi ibadooneka;+
23 amubafwutule+ kwiinda mukubakwempa kuzwa mumulilo. Pele amuzumanane kubafwida luse bamwi, kamucita boobo cakuyoowa, kumwi kamusulaika nociba cisani cabisyigwa amubili wanyama.+
24 Lino kuli yooyo uukonzya kumukwabilila kutegwa mutalebwi alimwi akumupa kwiima nji cakukondwa kapati kamutakwe kampenda+ kumbele lyabulemu bwakwe,
25 kuli Leza omwe buyo Mufwutuli wesu kwiinda muli Jesu Kristo Mwami wesu, akube bulemu, bupati, nguzu alimwi abweendelezi kuzwa lili alili asunu alimwi alyoonse mane kukabe kutamani. Ameni.
Bupanduluzi buyungizyidwe
^ Naa “abukkale bwakutalisenda.” Mu Chigiriki, a·selʹgei·a. Amubone Bupanduluzi Bwamabala.
^ Naa “simaleleesu.”
^ Amubone Makani Aayungizyidwe A5.
^ Amubone Bupanduluzi Bwamabala, “Koonana ikutali kwamumulawo.”
^ Amubone Makani Aayungizyidwe A5.
^ Mu Chigiriki, “kumamanino aaciindi (citegwa) lituba maila.”
^ Amubone Makani Aayungizyidwe A5.
^ Naa “zintu zyakasinsimwa musyule.”
^ Naa “bantu banyama.”
^ Mu Chigiriki, “ibatajisi muuya.”
