Luka 23:1-56
23 Aboobo nkamu yoonse yakanyamuka akumutola kuli Pilato.+
2 Mpoonya bakatalika kumutamikizya,+ balaamba: “Imuntu ooyu twakamujana kayunga bantu kuti babukile cisi cesu, kabakasya kutela mitelo kuli Kaisara+ akwaamba kuti walo ngo Kristo, imwami.”+
3 Lino Pilato wakamubuzya kuti: “Sena uli Mwami waba Juda?” Wakamwiingula kuti: “Yebo omwini waamba.”+
4 Mpoonya Pilato wakaambila basilutwe babapaizi amakamu aabantu kuti: “Kunyina mulandu ngundajana kumuntu ooyu.”+
5 Pele bakazumanana balaamba: “Unyonganya bantu kwiinda mukuyiisya mu Judaya moonse, kutalikila ku Galilaya mane akusikila kokuno.”
6 Naakamvwa boobo, Pilato wakabuzya naa muntu ooyu wakali muna Galilaya.
7 Mpoonya, naakasinizya kuti wakali wakucooko cilelwa a Heroda,+ wakamutuma kuli Heroda, nkaambo awalo wakali mu Jerusalemu imazuba aayo.
8 Heroda naakamubona Jesu, wakakondwa kapati. Nkaambo kwaciindi cilamfwu wakali kuyanda kubona Jesu mbwaanga wakamvwide zintu zinji kujatikizya nguwe,+ alimwi wakali kulombozya kubona citondezyo cimwi cicitwa anguwe.
9 Aboobo wakatalika kumubuzya kwaciindi cilamfwu, pele kunyina naakamwiingula.+
10 Pele basilutwe babapaizi abalembi ciindi aciindi bakali kunyamuka akumubejelezya cabukali.
11 Mpoonya Heroda abasikalumamba bakwe bakamunyasya,+ alimwi wakamusampaula+ kwiinda mukumusamika cisani ceebeka amane wakamupilusya kuli Pilato.
12 Lino Heroda a Pilato bakaba balongwe buzuba oobo, nkaambo kacitanacitika eeci tiibakali kumvwana pe.
13 Mpoonya Pilato wakaita basilutwe babapaizi abaleli abantu antoomwe
14 akubaambila kuti: “Mwakaleta muntu ooyu kulindime kamwaamba kuti ukulwaizya bantu kubukila cisi. Lino amubone! Ndamubuzya-buzya kumbele lyanu, pele ndajana kuti kunyina kaambo muntu ooyu nkayelede kupedwa milandu njomumutamikizya.+
15 Alimwi naba Heroda kunyina kaambo nkaakajana, nkaambo wakamupilusya kulindiswe, alimwi amubone! Kunyina mulandu ngwaakacita ngwayelede kujailwa.
16 Aboobo ndilamusubula+ buyo akumwaangununa.”
17 *—
18 Pele nkamu yoonse yakoompolola kuti: “Komujaya muntu ooyu,* utwaangunwide Baraba!”+
19 (Baraba wakabikkidwe muntolongo akaambo kamanyongwe amwi aakubukila cisi aakacitika mumunzi alimwi akaambo kakujaya muntu.)
20 Pilato alimwi wakaambaula ambabo, nkaambo wakali kuyanda kumwaangununa Jesu.+
21 Mpoonya bakatalika koongololesya balaamba: “Komugagaila aacisamu! Komugagaila aacisamu!”*+
22 Ciindi catatu wakati kulimbabo: “Nkaambo nzi? Ino ncibi nzi ncaakacita muntu ooyu? Kunyina mulandu ngundajana ngwayelede kujailwa; aboobo ndilaide kumusubula akumwaangununa.”
23 Nobakamvwa boobo, bakazumanana koompolola kwaamba kuti ajaigwe,* eelyo majwi aabo akuzunda.+
24 Aboobo Pilato wakasala kuti kucitwe kweelana ambobakali kuyanda.
25 Wakaangununa muntu ngobakali kuyanda kuti aangununwe ooyo iwakabikkidwe muntolongo akaambo kamanyongwe aakubukila cisi alimwi akaambo kakujaya muntu, pele wakaaba Jesu kulimbabo kweelana ambobakali kuyanda.
26 Lino nobakali kumutola, bakajata Simoni, imuna Kurene iwakali kuzwida musyokwe, aboobo bakamukulika cisamu cakupenzyezya* kuti acinyamune akutobela Jesu musyule.+
27 Alimwi kwakali bantu banji bakali kumutobela, kubikkilizya abamakaintu ibakali kulyuuma-uma acaamba akaambo kakuusa akumulila.
28 Jesu wakacengulukila kuli bamakaintu akwaamba kuti: “Nobana basimbi bamu Jerusalemu, amuleke kulila ndime. Amulilile nobeni alimwi abana banu;+
29 nkaambo amubone! Imazuba ayoosika ibantu nobayakwaamba kuti, ‘Balikkomene bamakaintu aabo batazyali, abaabo batakazyala bana alimwi abaabo batakanyonsya!’+
30 Mpoonya bayootalika kwaambila zilundu kuti, ‘Amutulimbe!’ akutulundu bayakwaamba kuti, ‘Amutuvwumbe!’+
31 Ikuti kabacita zintu eezyi cisamu nocicili citete, ino ncinzi ciyoocitika caakuyuma?”
32 Zigwebenga zyobilo azyalo zyakali kutolwa kuyoojaigwa antoomwe anguwe.+
33 Alimwi nobakasika kubusena bwiitwa kuti Cipapa Camutwe,+ ooko bakamugagaila acisamu antoomwe azigwebenga eezyo, cimwi kululyo lwakwe acimwi kulumwensyi lwakwe.+
34 Pele Jesu wakali kwaamba kuti: “Taata, kobalekelela nkaambo tabazyi ncobacita.” Kuyungizya waawo, bakauma cisolo ikutegwa baabane zisani zyakwe.+
35 Lino bantu bakaima kabalangilila. Pele baleli bakali kumufwubaazya akwaamba kuti: “Bamwi wakali kubafwutula; kalifwutula we ikuti kali Kristo wa Leza, Ooyo Uusalidwe.”+
36 Abalo basikalumamba bakamufwubaazya, bakali kuswena munsi lyakwe akumupa waini uupapide+
37 balaamba: “Ikuti koli Mwami waba Juda, kolifwutula.”
38 Alimwi atala lyakwe kwakalembedwe mabala aakuti: “Ooyu Mwami Waba Juda.”+
39 Pele cimwi cazigwebenga icakali acisamu cakatalika kumusampaula+ ategwa: “Sena toli Kristo? Kolifwutula we omwini andiswe utufwutule!”
40 Mukwiingula ceenzinyina cakacikalalila cilaamba: “Mbokunga lino wapegwa cisubulo comwe anguwe, sena tomuyoowi Leza naaceya?
41 Alimwi swebo cilitweelede cisubulo eeci nkaambo tusubulilwa zintu nzyotwakacita; pele muntu ooyu kunyina cibi ncaakacita pe.”
42 Alimwi wakati: “Jesu, ukandiyeeye waakunjila mu Bwami bwako.”+
43 Eelyo Jesu wakati kulinguwe: “Ncobeni sunu ndikwaambila kuti, uyooba andime mu Paradaiso.”+
44 Lino ciindi cakali afwaafwi kusika awoola lyacisambomwe,* pele kwakaba mudima mucisi coonse kusikila kuwoola lyafwuka,*+
45 nkaambo zuba lyakaleka kubala; mpoonya mulembo wamutempele+ wakayauka akati kuzwa atala mane kusikila ansi.+
46 Mpoonya Jesu wakoongolola ajwi pati akwaamba kuti: “Taata, ndabikka muuya wangu mumaanza aako.”+ Naakamana kwaamba boobu, wakafwa.+
47 Naakabona cakacitika, silutwe wabasikalumamba wakatalika kutembaula Leza, ulaamba: “Masimpe, muntu ooyu wakali mululami.”+
48 Alimwi makamu oonse aabantu ibakabungene kubusena oobo kuti balangilile zintu eezyi, nobakabona zintu zyakacitika bakapiluka kuŋanda, kabalyuuma-uma azyamba.
49 Kunze lyaboobo, bantu boonse ibakamuzyi bakaliimvwi alaale. Abalo bamakaintu aabo ibakamutobela kuzwa ku Galilaya bakaliko alimwi bakazibona zintu eezyi.+
50 Alimwi amubone! Kwakali mwaalumi uutegwa Josefa walo wakali umwi wa Nkuta Mpati Yaba Juda, imwaalumi mubotu alimwi uululeme.+
51 (Imuntu ooyu kunyina naakaizuminizya mizeezo amicito ya Nkuta Mpati Yaba Juda.) Wakali kuzwa ku Aremateya, imunzi wabana Judaya alimwi wakali kulindila Bwami bwa Leza.
52 Imuntu ooyu wakaunka kuli Pilato akuyoolomba mubili wa Jesu.
53 Mpoonya wakawaangula+ akuuzambaila mumulembo mubotu, amane wakauzikka mucuumbwe cakasyidwe mumwala,+ oomo mwatakalinabuzuba mwazikkwa muntu.
54 Lino bwakali buzuba bwa Kulibambila,+ alimwi Sabata+ yakali afwaafwi kutalika.
55 Pele bamakaintu ibakaboolede anguwe kuzwa ku Galilaya, bakatobela akulanga mbocakabede cuumbwe alimwi ambowakabikkidwe mubili wakwe,+
56 bamane bakapiluka kuyoobamba tununkilizyo amafwuta aanunkilila. Pele mbuli cilengwa mu Sabata+ bakalyookezya kweelana amulawo.
Bupanduluzi buyungizyidwe
^ Amubone Makani Aayungizyidwe A3.
^ Mu Chigiriki, “Mutolooko muntu ooyu.”
^ Naa “Komujaya aacisamu! Komujaya aacisamu!”
^ Naa “ajaigwe aacisamu.”
^ Amubone Bupanduluzi Bwamabala.
^ Nkokuti, afwaafwi a 12 koloko.
^ Nkokuti, afwaafwi a 3 koloko yakumazuba.
