Malaki 3:1-18
3 “Bona! Mebo ndilatuma mutumwa wangu, eelyo uyoondibambila nzila.+ Alimwi cakutayeeyelwa Mwami mwini-mwini, ooyo ngomuyanda, uyooboola kutempele lyakwe,+ awalo mutumwa wacizuminano, ooyo ngomukkomanina, uyooboola. Bona! Uyooboola ncobeni,” mbwaamba Jehova wamakamu.
2 “Pele ino nguni uuyooliyumya ibuzuba mbwayooboola, alimwi ino nguni uuyakwiima nji aakulibonya? Nkaambo unooli mbuli mulilo wasikunyengulula akusalazya lubulo ambuli nsipa+ yabasikuwasya zisani.
3 Uyookkala mbuli sikunyengulula asikusalazya nsiliva,+ eelyo uyoosalazya bana ba Levi; uyoobasalazya mbuli ngolida ambuli nsiliva, eelyo bayooba bantu ba Jehova ibatuula zituuzyo zyacipego mubululami.
4 Aboobo cituuzyo cacipego ca Juda alimwi aca Jerusalemu ciyoomubotela Jehova, mbubonya mbuli kumazuba aakaindi ambuli kumyaka yansiku.+
5 “Ndiyooboola afwaafwi andinywe kuti ndimubeteke, aboobo ndiyoofwambaana kuba kamboni uubapa mulandu balozi,+ basimamambe, basikukonka cakubeja+ alimwi abaabo baunina mubelesi zyakuvwola zyakwe,+ badyaaminina mukamufwu alimwi amucaala,+ alimwi abaabo batayandi kugwasya muzwakule.+ Aaba tabandiyoowi mebo pe,” mbwaamba Jehova wamakamu.
6 “Nkaambo ndime Jehova; tandicinci pe.*+ Nywebo muli bana ba Jakobo; tiimwamana pe.
7 Kuzwa kumazuba aabamauso mwali kuleya kumilawo yangu alimwi tiimwaibamba pe.+ Amujokele kulindime, eelyo andime ndilaboola kulindinywe,”+ mbwaamba Jehova wamakamu.
Pele nywebo mubuzya kuti: “Ino tulajoka buti?”
8 “Sena muntu uulya maila weelede kumubbida Leza? Pele nywebo muluujisi kundibbida.”
Mwabuzya kuti: “Ino twakubbida buti?”
“Muumakani aazyakkumi alimwi azyakusanga.
9 Ncobeni mulisinganizyidwe, nkaambo muluujisi kundibbida—cisi coonse mbocizulwa ciluujisi kucita boobo.
10 Amuzilete muciyobwedo+ zyakkumi zyoonse, kutegwa kube cakulya muŋanda yangu;+ alimwi amundisole buyo munzila eeyi,” mbwaamba Jehova wamakamu, “mubone naa tandikoomujalwida milyango yakujulu+ akumupoomweda zileleko zinji kapati cakuti tamukoobulizya cintu cili coonse.”+
11 “Alimwi ndiyoomukalalilila sikunyonyoona,* eelyo takanyonyooni micelo iizwa munyika yanu, awalo musaansa uuli mumuunda wanu taukaalilwi kuzyala micelo,”+ mbwaamba Jehova wamakamu.
12 “Masi oonse ayoomwaamba kuti mulilelekedwe,+ nkaambo nywebo muyooba cisi cikkomanisya,” mbwaamba Jehova wamakamu.
13 “Mwabelesya majwi mabi kapati kulindime,” mbwaamba Jehova.
Lino nywebo mubuzya kuti: “Ino ncibi nzi ncotwaamba akati kesu kujatikizya nduwe?”+
14 “Mwaamba kuti, ‘Tacigwasyi pe kubelekela Leza.+ Ino nimpindu nzi njotwajana mukuzuzikizya mikuli yesu kulinguwe alimwi amukweenda katuuside kumbele lya Jehova wamakamu?
15 Lino basikulisumpula tubabona kuti balilelekedwe. Abalo basimucita zibi balazwidilila.+ Tabayoowi kusunka Leza pele balekwa buyo kakunyina akusubulwa.’”
16 Aciindi eeco aabo bamuyoowa Jehova bakali kwaambaula, umwi amweenzinyina, awalo Jehova wakali kubikkila maano akuswiilila. Mpoonya ibbuku lyakwiibalusya lyakalembwa kumbele lyakwe+ kujatikizya baabo bamuyoowa Jehova alimwi abaabo bazinzibala kuyeeya* zina lyakwe.+
17 “Lino bayooba bantu bangu,”+ mbwaamba Jehova wamakamu, “mubuzuba mbondiyoopanga lubono luyandisi.+ Ndiyoobafwida lubomba, mbubonya muntu mbwamufwida lubomba mwanaakwe uumubelekela.+
18 Eelyo nywebo muyoolubona alimwi lwiindano luliko akati kamuntu mululami amubi,+ akati kayooyo uubelekela Leza ayooyo uutamubelekeli.”
Bupanduluzi buyungizyidwe
^ Naa “tiindacinca pe.”
^ Ambweni kwaamba cipenzyo cazyuuka.
^ Naa “bayeeya.” Naa ambweni, “bayandisya.”
