Matayo 4:1-25
4 Lino Jesu wakasololelwa amuuya munkanda kutegwa akasunkwe+ a Diabolosi.+
2 Naakaliimya kulya kwamazuba aali 40 isyikati amasiku, wakafwa nzala.
3 Mpoonya Sikusunka+ wakasika kulinguwe akumwaambila kuti: “Ikuti naa uli mwana wa Leza, ambila mabwe aaya kuti abe zinkwa.”
4 Pele wakaingula kuti: “Kulilembedwe kuti: ‘Muntu teelede kuponena acinkwa cilikke pe, pele weelede kuponena amajwi oonse aazwa kumulomo wa Jehova.’”*+
5 Mpoonya Diabolosi wakaunka anguwe kumunzi uusalala,+ waakumwiimika atala aabwaanda bwaatala* lyatempele+
6 akumwaambila kuti: “Ikuti naa uli mwana wa Leza, koliwaala ansi, nkaambo kulilembedwe kuti: ‘Uyoolailila bangelo bakwe kujatikizya nduwe,’ alimwi, ‘Bayookutemba amaanza aabo kutegwa utakalinontoli abbwe.’”+
7 Jesu wakamwiingula kuti: “Alimwi kulilembedwe kuti: ‘Utasunki Jehova* Leza wako.’”+
8 Alimwi Diabolosi wakamutola kucilundu cilamfwu kapati akumutondezya mami oonse aamunyika abulemu bwangawo.+
9 Mpoonya wakamwaambila kuti: “Zyoonse eezyi ndilakupa ikuti naa ufwugame akundikomba ciindi comwe buyo.”
10 Mpoonya Jesu wakamwaambila kuti: “Kozwa aawa Saatani! Nkaambo kulilembedwe kuti: ‘Ngu Jehova* Leza wako ngoelede kukomba,+ alimwi ngonguwe alikke ngoelede kubelekela mulimo uusetekene.’”+
11 Mpoonya Diabolosi wakamusiya,+ eelyo bangelo bakaboola akutalika kumukutaukila.+
12 Lino naakamvwa kuti Johane waangwa,+ wakaunka ku Galilaya.+
13 Alimwi naakazwa ku Nazareta, wakaboola akukkala ku Kapernauma+ kumbali aalwizi muzyooko zya Zebuloni a Nafutali,
14 ikutegwa azuzikizyigwe majwi aakaambwa kwiinda mumusinsimi Isaya iwakati:
15 “Ocisi ca Zebuloni acisi ca Nafutali, ooli mumbali aanzila iitozya kulwizi, mutala lya Jordano mu Galilaya wabamasi!
16 Bantu bakkede mumudima bakabona mumuni mupati, abaabo bakkede munyika yacimvwule calufwu bakamunikilwa.”+
17 Kuzwa kuciindi eeco, Jesu wakatalika kukambauka akwaamba kuti: “Amweempwe, nkaambo Bwami bwakujulu bwaswena afwaafwi.”+
18 Naakali kweenda mumbali aa Lwizi lwa Galilaya, wakabona babunyina bobilo, Simoni uutegwa Petro,+ a Andreya munyina kabawaala lunsabwe mulwizi, nkaambo bakali bazubi.+
19 Aboobo wakabaambila kuti: “Amunditobele, eelyo ndilamupa kuba bazubi babantu.”+
20 Mpoonya aawo bakasiya nsabwe zyabo akumutobela.+
21 Kuzwa waawo kayaabweenda, wakabona abamwi bobilo ibakali babunyina, Jakobo mwana wa Zebedayo a Johane imunyina.+ Bakali mubwato a Zebedayo bausyi kabasuma nsabwe zyabo, eelyo wakabaita.+
22 Mpoonya aawo bakasiya bwato bwabo abausyi akumutobela.
23 Mpoonya wakeenda mu Galilaya moonse,+ kayaabuyiisya muzikombelo zyabo+ akukambauka makani mabotu aa Bwami, akuponya bantu malwazi oonse alimwi amacise aamisyobo yoonse.+
24 Lino mpuwo yakwe yakamwaika mu Siriya moonse, eelyo bakamuletela boonse aabo ibakali kupenga amalwazi alimwi azicisa ziindene-indene,+ aabo bakanjidwe madaimona,+ basikasuntu+ alimwi abalebukide mibili, eelyo wakabaponya.
25 Aboobo makamu-makamu aabantu akamutobela kuzwa ku Galilaya, ku Dekapole,* ku Jerusalemu, ku Judaya amutala lya Jordano.
Bupanduluzi buyungizyidwe
^ Amubone Makani Aayungizyidwe A5.
^ Naa “ansonje.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “Cooko Caminzi Iili Kkumi.”
