Matayo 9:1-38
9 Eelyo naakatanta bwato, wakazabuka akuunka kumunzi okwabo.+
2 Lino bakamuletela mwaalumi uulebukide mubili wakalede amacila. Naakabona lusyomo lwabo, Jesu wakaambila muntu ooyo uulebukide mubili kuti: “Koba acamba mwanaangu! Walekelelwa zibi zyako.”+
3 Lino bamwi balembi bakalyaambauzya kuti: “Muntu ooyu usampaula Leza.”
4 Pele Jesu akaambo kakuzyiba mizeezo yabo wakati: “Ino nkaambo nzi ncomuyeeya zintu zibi mumyoyo yanu?+
5 Mucikozyanyo, ncili cuuba-uba, ikwaamba kuti, ‘Walekelelwa zibi zyako,’ naa kwaamba kuti, ‘Nyamuka weende’?+
6 Pele kutegwa muzyibe kuti Mwanaamuntu ulijisi nguzu zyakulekelela bantu zibi anyika—” mpoonya wakaambila muntu ooyo uulebukide mubili kuti: “Nyamuka, bweza macila aako, uunke kuŋanda yako.”+
7 Mpoonya wakanyamuka akuunka kuŋanda yakwe.
8 Makamu aabantu naakabona cakacitika, akayoowa alimwi akalemeka Leza iwakapa nguzu zili boobu kubantu.
9 Kuzwa waawo, naakali kuyaabweenda kuzwa kooko, Jesu wakabona mwaalumi wazina lya Matayo kakkede aŋanda iitelelwa mitelo, eelyo wakamwaambila kuti: “Koba sikunditobela.” Mpoonya wakanyamuka akumutobela.+
10 Aciindi cimwi, Jesu naakali kulya* muŋanda, basimutelo abasizibi banji bakaboola akulya* anguwe alimwi abasikwiiya bakwe.+
11 Pele nobakabona boobu, ba Farisi bakaambila basikwiiya bakwe kuti: “Ino nkaambo nzi mwiiyi wanu ncalida antoomwe abasimutelo alimwi abasizibi?”+
12 Eelyo naakabamvwa, wakaamba kuti: “Bantu bataciswi tabayandiki musilisi, pele aabo baciswa mbabayandika musilisi.+
13 Aboobo kamuya mukaiye ncaamba majwi aaya aakuti: ‘Ndiyanda luse kutali cipaizyo.’+ Nkaambo ndakaboolela kwiita basizibi ikutali bantu baluleme.”
14 Mpoonya basikwiiya ba Johane bakaboola kulinguwe akumubuzya kuti: “Ino nkaambo nzi swebo aba Farisi ncotuliimya kulya, pele basikwiiya bako tabaliimyi?”+
15 Aboobo Jesu wakabaambila kuti: “Sena balongwe basibwiinga balijisi kaambo kabapa kulila ciindi sibwiinga+ nacili ambabo? Pele ciyoosika ciindi ncobayoonyangwa sibwiinga,+ eelyo bayooliimya kulya.
16 Kunyina muntu uusuma cigamba camulembo mupya acisani caatala cakaindi, nkaambo cigamba camulembo mupya cilakonzya kukwela cisani eeco, aboobo cimonko cilakomena kapati.+
17 Alimwi bantu tababikki waini mupya munkomo zyazipaya zyakaindi. Ikuti bacita boobo, nkomo zilaanduka, waini ulatika ankomo zilanyonyooka. Pele bantu babikka waini mupya munkomo zyazipaya zipya, eelyo zyoonse zyobilo zilayobolwa.”
18 Naakacili kubaambila zintu eezyi, kwakasika muleli umwi iwakamufwugamina* akwaamba kuti: “Mwanaangu musimbi weelede kuti lino wafwa kale, pele koboola uzoobikke janza lyako alinguwe, eelyo ulaba muumi.”+
19 Mpoonya Jesu wakanyamuka akumutobela antoomwe abasikwiiya bakwe.
20 Mpoonya mukaintu iwakali kuciswa kalobola kwamyaka iili 12,+ wakaboola kusyule lya Jesu akujata maaya aacisani cakwe caatala,+
21 nkaambo wakali kulyaambauzya kuti: “Kuti ndijate buyo cisani cakwe caatala, ndilapona.”
22 Jesu wakacenguluka, eelyo naakamubona wakati: “Koba acamba, mwanaangu! Lusyomo lwako lwakuponya.”+ Kuzwa aciindi eeco mukaintu ooyu wakapona.+
23 Lino naakanjila muŋanda yamuleli akubona basikusiba muntolilo ankamu yabantu kabayobeka,+
24 Jesu wakati: “Amuzwe omuno, nkaambo musimbi ooyu tafwide pe, pele uloona.”+ Aboobo bakatalika kumuseka.
25 Mpoonya nkamu mboyakazwida buyo anze, wakanjila akumujata kujanza,+ eelyo musimbi wakabuka.+
26 Aboobo makani aaya akamwaika mucooko coonse eeco.
27 Lino Jesu naakali kweenda kuzwa kooko, baalumi boofwu bobilo+ bakamutobela kaboongolola kuti: “Tufwide luse, O Mwana wa Davida.”
28 Naakanjila muŋanda, baalumi boofwu bakaboola kulinguwe eelyo Jesu wakababuzya kuti: “Sena mulaalusyomo lwakuti ndilakonzya kucicita eeci?”+ Bakamwiingula kuti: “Inzya Mwami.”
29 Aboobo wakajata meso aabo,+ akwaamba kuti: “Kweelana alusyomo lwanu, acicitike kulindinywe.”
30 Eelyo meso aabo akatalika kubona. Alimwi Jesu wakabacenjezya kuti: “Kutabi muntu naba omwe uuzyiba makani aaya.”+
31 Pele nobakazwa anze, bakamwaya mpuwo yakwe mucooko coonse eeco.
32 Nobakatalika kweenda, bantu bakamuletela syaataambi wakanjidwe daimona;+
33 eelyo naakalitanda daimona, syaataambi wakaambaula.+ Lino makamu aabantu akagambwa akwaamba kuti: “Takunabwenwe cintu cili boobu mu Israyeli.”+
34 Pele ba Farisi bakali kwaamba kuti: “Utanda madaimona kwiinda munguzu zyamweendelezi wamadaimona.”+
35 Lino Jesu wakali kuyaabweenda muminzi yoonse amutunzi, kayaabuyiisya muzikombelo zyabo akukambauka makani mabotu aa Bwami, akuponya malwazi aamisyobo yoonse.+
36 Lino naakabona makamu aabantu, wakabeetelela+ nkaambo bakali kupenzyegwa alimwi bakalimwaikide mbuli mbelele zitakwe mweembezi.+
37 Mpoonya wakaambila basikwiiya bakwe kuti: “Masimpe, mulimo wakutebula mupati, pele babelesi mbasyoonto.+
38 Aboobo, amulombe Simalelo wabutebuzi kuti atume babelesi mumulimo wakwe wakutebula.”+
Bupanduluzi buyungizyidwe
^ Naa “naakakkede kutebulu.”
^ Naa “akukkala kutebulu.”
^ Naa “iwakamukotamina.”
