Jesu ucili mu Samariya naa mu Galilaya. Lino ba Farisi bamubuzya zyakuboola kwa Bwami, oobo mbobalangila kuti buyakuboola munzila iigambya yakuti boola ubone. Pele wabaambila kuti: “Bwami bwa Leza tabukabooli munzila iilibonya kubantu boonse; alimwi bantu kunyina nobayakwaamba kuti, ‘Amulange okuno!’ naa ‘Okuya!’ Nkaambo amubone! Bwami bwa Leza buli akati kanu.”—Luka 17:20, 21.

Bamwi bantu bayeeya kuti Jesu upandulula kuti Bwami buleendelezya mumyoyo yababelesi ba Leza. Nokuba boobo, cilisalede kuti tacili boobo pe, nkaambo Bwami tabuli mumyoyo yaba Farisi aabo mbaambaula ambabo Jesu. Nokuba boobo, buli akati kabo, nkaambo Mwami uusalidwe wa Bwami bwa Leza, Jesu, uli mpamunya aawo akati kabo.—Matayo 21:5.

Kuboneka kuti nobazwawo ba Farisi, Jesu waambila basikwiiya bakwe makani aambi aajatikizya kuboola kwa Bwami. Ikujatikizya kubako kwakwe kali Mwami mu Bwami oobu kumbele, wasaanguna kucenjezya kuti: “Ayoosika mazuba nomuyoolombozya kubona bumwi bwamazuba aa Mwanaamuntu, pele tamukabuboni.” (Luka 17:22) Jesu utondezya kuti kulela kwa Mwanaamuntu mu Bwami kucili kumbele. Kacitanasika ciindi eeci, basikwiiya bakwe bamwi balangilwa kuti baliyandide kapati kububona, pele bayandika kuzumanana kulindila kusikila cikasike ciindi Leza ncabikkide cakuti Mwanaamuntu aboole.

Jesu wazumanana kwaambaula, wati: “Bantu bayoomwaambila kuti, ‘Amulange okuya!’ naa ‘Amulange okuno!’ Mutakaunki nokuba kubatandila. Nkaambo mbubonya mbuli lulabo mbolumweka kuzwa kubbazu limwi lyajulu kusikila kubbazu limbi, oobo mbwayooba awalo Mwanaamuntu mubuzuba bwakwe.” (Luka 17:23, 24) Ino ncinzi ciyakugwasya basikwiiya ba Jesu kuti batatandili bamesiya bakubeja? Jesu waamba kuti kuboola kwa Mesiya mwini-mwini kuyakuba mbuli kumweka kwalulabo ikulibonya koonse-koonse. Ibumboni bwakubako kwakwe mu Bwami buyoolibonya caantangalala kubantu boonse balangilila ibabikkila maano.

Mpoonya Jesu wabelesya cikozyanyo cazintu zyakacitika kaindi ikutondezya muuya ngobanakujisi bantu kuciindi eeco ciboola kumbele, ulaamba: “Mbubonya mbocakacitika kumazuba aa Nowa, mbokuyooba oobo kumazuba aa Mwanaamuntu . . . Ncimwi buyo, mbubonya mbocakacitika kumazuba aa Loti: bakali kulya, bakali kunywa, bakali kuula, bakali kusambala, bakali kusyanga, bakali kuyaka. Pele ibuzuba Loti naakazwa mu Sodoma, kwakaloka mulilo asulufa kuzwa kujulu akubanyonyoona boonse. Mbokuyooba mubuzuba oobo Mwanaamuntu aakuyubununwa.”—Luka 17:26-30.

Aawa Jesu taambi kuti bantu bakumazuba aa Nowa alimwi a Loti bakanyonyoonwa akaambo kakuti bakali kucita zintu nzibacita bantu boonse mbuli kulya, kunywa, kuula, kusambala, kusyanga, alimwi akuyaka. Nowa a Loti alimwi amikwasyi yabo bakali kucita zintu zimwi akati kazyeezyi. Pele  bantu bambi bakali kucita zintu eezyi cakutaabikkila maano makanze aa Leza alimwi tiibakali kubikkila maano kubona kuti naa bapona muciindi cili buti. Aboobo, Jesu ulailila basikwiiya bakwe kubikkila maano kumakanze aa Leza alimwi akusungwaala kucita kuyanda kwakwe. Kwiinda mukucita boobo, ubatondezya mbobakonzya kufwutuka, nkokuti kuzumanana kupona ciindi Leza aakuleta lunyonyooko kumbele.

Basikwiiya bayooyandika kutantamuka zintu zyamunyika, nkokuti “zintu zili musyule,” kuti zitabanyonganyi. Jesu wati: “Ibuzuba oobo muntu uuli aciluli caŋanda pele zintu zyakwe kazili muŋanda atakaseluki kuti azibweze, mbubonya buyo imuntu uuli mumuunda atakapilukili zintu zili musyule. Amuyeeye muka Loti.” (Luka 17:31, 32) Wakaba cuulu camunyo.

Kazumanana kupandulula mbobunoobede bukkale ciindi Mwanaamuntu aakulela kali Mwami, Jesu waambila basikwiiya bakwe kuti: “Imasiku aayo bantu bobilo banoolede abulo bomwe; omwe uyootolwa pele umwi uyoosiigwa.” (Luka 17:34) Aboobo, bamwi bayakufwutuka, pele bambi bayoosiigwa, bayoosweekelwa buumi bwabo.

Basikwiiya babuzya kuti: “Ikuli O Mwami?” Jesu wavwiila kuti: “Ikuli mutunta, nkukonya ooko nkobayoobungana basikwaze.” (Luka 17:37) Inzya, bamwi bayooba mbuli sikwaze uukonzya kubona zintu zili kulamfwu kapati. Basikwiiya aaba bayoobungana kuli Kristo mwini-mwini, Mwanaamuntu. Kuciindi eeco ciboola kumbele, Jesu uyoopa basikwiiya bakwe kasimpe ikabapa buumi aabo bajisi lusyomo.