AKATI kazyakwaambilizya zili boobu, eeci ncecakwaambilizya cibyaabi kapati. Alimwi ncibeela cakwaambilizya camu Cisipanishi ciitwa kuti el Requerimiento, calo basikuzunda bana Spain bamumwaanda wamyaka wa 16 ncobakabala cakupozya ciindi nibakasika muzisi zyaku America kabajisi makanze aakuzunda.

Makani nzi basikuzunda ngobakaambila bantu bakubusena ooku, alimwi nkaambo nzi?

Ciindi Columbus naakasika ku America mu 1492, cisi ca Spain alimwi a Portugal zyakalijisi nguzu zyakulela zisi zipya. Muzisi eezyi zyobilo, paapa bakali kumubona kuba mwiiminizi wa Kristo anyika. Alimwi kuti kwaba mazwanga, bakali kumulomba kutegwa abagwasye kubamba twaambo. Kwiinda mukulaililwa apaapa, basicikombelo bakazyaapaula zisi eezyi zipya akati ka Spain alimwi a Portugal kutegwa zisi eezyi zyobilo zikatume bamisyinali bayoosandula bantu bakubusena oobu.

Ciindi basikuzunda aaba nibakazumanana munkondo yabo, mfwulumende yaku Spain yakasola kujana nzila yakulitamizya kuti nkondo yabo yakaliluzi. Bana Spain bakayeeya kuti, mbwaanga paapa wakali kwiiminina Leza ciindi naakabapa zisi eezyi zipya, bakalaangulukide kubatundulula bantu bamuzisi eezyi.

Bana Spain bakalemba mulawo kuzyibya bantu bakumasena  aaya kujatikizya ncayanda paapa. Bantu bakeelede kuzumina kuba Banakristo alimwi akuba balelwa bamwami waku Spain. Ikuti nibakakaka, bana Spain bakali kulimvwa kuti bakalijisi nguzu zyakubalwana alimwi akuti balizumizyidwe a Leza kucita boobu.

Makanze aakubala Mulawo ooyu akali aakupa kuti bana Spain batapenzyegwi amanjezyeezya alimwi akuti ncobakacita ciboneke mbuli kuti cakali kweelela. Kanji-kanji basikuzunda bakali kuubala mulawo ooyu kabali mubwato kabayanda kutalika kulwana alimwi zimwi ziindi bakali kuubala kabali ansi buyo kubalila bantu batakali kwiimvwa myaambo yaku Europe. Zimwi ziindi wakali kubalwa mumaanda aakasiya bantu bakali kutija kujaigwa.

Ooku kusinikizya bantu kunjila cikombelo, kwakapa kuti bantu banji bajaigwe. Mucikozyanyo, bana Araucan basika ku 2,000 bakajaigwa munkondo yakali ku Chile mu 1550. Kujatikizya baabo batakajaigwa, sikuzunda wazyina lya Pedro de Valdivia wakaambila mwami kuti: “Bantu bali 200 bakakosolwa maanza alimwi ampemo kwiinda mubantu mbondakali kutuma ziindi zinji akubapa mulawo ooyu [mulawo wa el Requerimiento] kweelana ambookaamba Omwami.” *

Kubala mulawo ooyu ndiza kwakali kubagwasya basikuzunda kuti batapenzyegwi amanjezyeezya. Nokuba boobo, mulawo ooyu tiiwakagwasya mukukulwaizya bukombi mu Spain. Misyinali wamumwaanda mwamyaka wa 16 Bartolomé de las Casas, iwakalibonena mulawo ooyu kaubeleka wakalemba kuti: “Eelo kaka ooyu mulawo wakali mubi kapati! Alimwi tandikonzyi kwaamba mbolyakabija zyina lyacikombelo ca Bunakristo.” Syaabupampu wazyina lya Gonzalo Fernández de Oviedo wakaamba kuti zyintu zibyaabi nzibakacitila bantu baku America, zyakapa kuti Bunakristo babubone munzila mbyaabi.

Sena Leza weelede kutongookwa akaambo kazyintu zibyaabi nzyobakacita muzyina lyakwe basitwaambo twacisi alimwi abasololi bazikombelo? Bbaibbele lyaamba kuti: “Kacili kule a-Leza kuti acite bubi, akuli-Singuzuzyoonse kuti alubizye!”—Jobu 34:10.