ICICITIKA MAZUBA AANO

Nyika yoonse, muuya wakuteengelela ulidumide kapati, akaambo kazintu mbuli kusalulula akaambo kamubala, mwaambo, cisi muntu nkwazwa alimwi abukombi.

NCOLYAAMBA BBAIBBELE

Ciindi Jesu Kristo naakali anyika, muuya wakuteengelela wakaliko koonse-koonse. Kwaambisya ba Juda aba Samariya tiibakali kumvwana. (Johane 4:9) Bamakaintu bakali kubonwa kuti tabajisi mulimo. Alimwi basololi bazikombelo ba Juda bakali kubasampaula bantu-bantu buyo. (Johane 7:49) Jesu Kristo wakaliindene kapati ambabo. Basikumukazya bakamwaambila kuti: “Muntu ooyu ulabatambula basizibi akulya ambabo.” (Luka 15:2) Jesu wakali aalubomba, wakali kukkazika moyo alimwi wakali kweengelela akaambo kakuti wakaboolela kugwasya bantu kumuuya ikutali kubabeteka. Luyando ndolwakali kumupa kuti keengelela.—Johane 3:17; 13:34.

Iluyando, lwalo lupa kuti katweengelela, lupa kuti katujalula moyo kubantu bambi nokuba kuti tabalondokede alimwi bacita zintu nzyotutakkomanini. Lugwalo lwa Bakolose 3:13 lwaamba kuti: “Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina.”

“Ikwaambisya, amuyandane kapati, nkaambo luyando lulavwumba zibi zinji kapati.”—1 Petro 4:8.

ICICITIKA

Bantu balabikka milawo alimwi akusola kwiitobela. Aboobo bukkale bumwi tabuzumizyigwi.

NCOLYAAMBA BBAIBBELE

“Luyando talukwe cisapi.” (1 Bakorinto 13:5) Nokuba kuti Jesu wakasiya cikozyanyo cakweengelela, tanaakali kuzumizya cisapi, kuupaupa ameso alimwi amicito iimbi mibyaabi. Muciindi caboobo, cakutayoowa wakaikasya micito iili boobu. (Matayo 23:13) Wakaamba kuti: “Kufwumbwa ooyo uucita zintu zibi uluusulide mumuni [wakasimpe].”—Johane 3:20.

Mwaapostolo Munakristo Paulo wakalemba kuti: “Amusesemwe acintu cibi; amukakatile kucibotu.” (Baroma 12:9) Wakaatobela majwi aaya. Mucikozyanyo, ciindi Banakristo ba Juda bamwi nobakalyaandaanya kubasyomi batakali ba Juda, Paulo—walo iwakali mu Juda—tanaakaumuna buyo, pele wakaambaula calubomba. (Bagalatiya 2:11-14) Wakalizyi kuti Leza, ‘uutasalululi,’ takonzyi kuzumizya bantu bakwe kusalululana akaambo kamubala.—Milimo 10:34.

Mbwaanga Mbanakristo, Bakamboni ba Jehova batobela busolozi buli mu Bbaibbele bujatikizya mbobeelede kupona. (Isaya 33:22) Aboobo, tabazumizyi bubi akati kabo. Mbungano ya Bunakristo iisalala tayeelede kusofwaazyigwa abantu ibatayandi kutobela zyeelelo zya Leza. Akaambo kaceeci, Bakamboni batobela mulawo wamu Bbaibbele waamba kuti: “Amumugusye muntu ooyo mubi akati kanu.”—1 Bakorinto 5:11-13.

“Nywebo nomuyandisya Jehova, amusulaike bubi.”—intembauzyo 97:10.

NZYOBASYOMA BANTU

Akaambo kakutalondoka kwabantu, bubi bunooliko lyoonse.

NCOLYAAMBA BBAIBBELE

Musinsimi Habakuku wakapaila kuli Jehova Leza kuti: “Nkaambo nzi ncolekelela mapenzi kuti kaacitika? Nkaambo nzi ncokuli lunyonyooko abugwebenga kumbele lyangu? Alimwi nkaambo nzi mazwanga akulwana ncozivwulide?” (Habakuku 1:3) Kutegwa musinsimi aleke kulibilika, Leza wakamusyomezya kuti bubi uyoobumana. Kujatikizya cisyomezyo eeci, Leza wakaamba kuti: “Ciyoozuzikizyigwa. Tacikamuki pe!”—Habakuku 2:3.

Calino, basizibi balijisi coolwe cakuleka micito yabo mibyaabi. “‘Sena mebo ndilalukkomanina naaceya lufwu lwamuntu mubi?’ mbwaamba Mwami Singuzuzyoonse Jehova. ‘Sena ncendiyanda tacili cakuti aleke nzila zyakwe akuzumanana kupona?’” (Ezekieli 18:23) Aabo bayandaula Jehova kwiinda mukuleka nzila zyabo zibi balakonzya kulangila kumbele kabajisi lusyomo. Lugwalo lwa Tusimpi 1:33. lwaamba kuti: “Ooyo uundiswiilila uyookkala kaliibide alimwi takanyongani akaambo kakuyoowa mapenzi.”

“Kusyeede kaindi kaniini buyo, ibantu babi tabakabi limbi pe . . . Babombe myoyo bayookona nyika, eelyo bayoobotelwa kapati muluumuno lunji.” —Intembauzyo 37:10, 11.