Zicitika Munyika
Kulanga-langa Zicitika ku Europe
Kaindi ku Europe bantu banji bakali kukomba pele mazuba aano bunji bwabo tabakombi. Nokuba boobo, makani mapya aazwa ku Europe aamba kujatikizya Bbaibbele munzila zikonzya kumugambya.
MBOLIYANDIKA JWI LYAMUZYALI KUMWANA
Basikuvwuntauzya ku Milan, Italy, bakaamba kuti bana bavwanda ibakazyalwa kacitanakkwana ciindi, balagwasyigwa kapati kwiinda mukubikkwa kancini akuboko kwabo kalo kabagwasya kumvwa jwi lyabanyina nobacili mucibbadela. Kancini aaka kaiya mwana mbwaakali kumvwa jwi lyabanyina ciindi naakali mwida. Basikuvwuntauzya aaba kumamanino bakaamba kuti: “Ikutalika kumvwa jwi lyabanyina cakufwambaana cigwasya bana bakazyalwa kacitanakkwana ciindi kuzumanana kupona.”
NCOLYAAMBA BBAIBBELE: “Moyo wangu ndawuumbulizya akuwuumuzya, mbuli mwana mulesi mumaanza aabanyina.”—Intembauzyo 131:2.
SENA MUSUMPULA MUUYA WAKULIYANDA?
Kweelana akuvwuntauzya kwakacitwa kubana bali 565 ku Netherlands, bana bajisi bazyali ibakabaamba kuti “balayandika kwiinda bana bamwi” alimwi akuti mbana beelede “kulanganizyigwa munzila iilibedelede” bakajanika kuti bajisi muuya wakuliyanda kwiinda bana bambi alimwi bakatondezya muuya wakulisumpula. Sikuvwuntauzya umwi wakaamba kuti: “Bana balasyoma ikuti bazyali babaambila kuti balayandika kwiinda bana bamwi. Eeci tacili kabotu kubana akubuleya.”
NCOLYAAMBA BBAIBBELE: “Ndaambila nyoonse ooko kuti mutayeeyi kuti mulayandika kapati kwiinda bwini mbomubede, pele kamuyeeya kabotu.”—Baroma 12:3.
BANTU IBAPONA MYAKA IILI 100 IBAJISI BULANGIZI
Basikuvwuntauzya baku Heidelberg University ku Germany bakaamba kuti nokuba kuti bantu ibapona myaka iili 100 balaciswa-ciswa, baciyanda kupona. Akati kabantu bone ibakabuzyigwa-buzyigwa, botatwe bakaamba kuti bayanda kuzumanana kupona akucita zintu nzyobakonzya. Bakazuzikizya mbaakani zyabo, bakalijisi bulangizi, bakali kulimvwa kuti buumi bulaampindu, alimwi bakazumanana abukombi bwabo alimwi akutobela zyeelelo zyabo.
AMUYEEYE KUJATIKIZYA MAKANI AAYA: Kweelana ambokutondezyedwe mulugwalo lwa Mukambausi 3:11, ino luyandisisyo lwesu lwakuzyalwa andulo lwakuyanda kuzumanana kupona lutondezya nzi?
Andiza Inga Mwaakkomanina Ayaaya
SINSIMUKA!
Ino Inga Mwapona Ciindi Cilamfwu Buti?
Kuzyiba kaambo ncotufwida alimwi akucembaala matalikilo akumvwisya myaka njotukonzya kupona
