1-3. (a) Ino Intembauzyo 147 kuboneka kuti yakalembwa lili? (b) Ncinzi ncotukonzya kwiiya kubbuku lya Intembauzyo 147?

IKUTI muntu umwi waubeleka kabotu mulimo ngwaapegwa naa kutondezya bube bubotu bwa Bunakristo, weelede kulumbaizyigwa. Ikuti naa tweelede kucita oobo kubantu, nkokuti tulijisi twaambo tunji ncotweelede kumutembaula Jehova Leza! Tweelede kumutembaula akaambo kamilimo yakwe mipati yalo njotubona muzilenge zyakwe alimwi aluyando ndwaakatondezya kulindiswe kwiinda mukutupa cinunuzyo ca Mwanaakwe simuzyalwaalikke.

² Mulembi wa Intembauzyo 147 wakakulwaizyigwa kumutembaula Jehova. Alimwi wakakulwaizya abamwi kuti bamusangane mukutembaula Leza.—Amubale Intembauzyo 147:1, 7, 12.

³ Mulembi wantembauzyo eeyi tazyibidwe pe, pele kuboneka kuti sintembauzyo ooyu wakali kupona kuciindi Jehova naakapilusya bana Israyeli ku Jerusalemu kuzwa mubuzike bwaku Babuloni. (Int. 147:2) Kupilusyigwa kwabantu ba Leza kubusena bwabo bwabukombi bwakasimpe cakutadooneka kwakapa kuti sintembauzyo atembaule Jehova. Nokuba boobo, wakaamba twaambo atumbi ncotweelede kucitila boobo. Ino twakali twaambo nzi? Ino mujisi twaambo nzi twakwaambila kuti “Aleluya!” mubuumi bwanu?—Int. 147:1, bupanduluzi buyungizyidwe.

4. Ciindi Mwami Koresi naakabaangununa bazike bana Israyeli, ino bakalimvwa buti alimwi nkaambo nzi ncobakalimvwida boobo?

⁴ Amweezyeezye buyo mbobakalimvwide bazike bana Israyeli ku Babuloni. Ibakabajatide buzike bakali kubafwubaazya kwiinda mukubaambila kuti: “Amutwiimbile lwiimbo lumwi lwaku Ziyoni.” Aciindi eeco Jerusalemu, munzi iwakali kubapa kuti bakkomanine Jehova, wakalinyonyookede. (Int. 137:1-3, 6) Ba Juda tiibakali kuyanda kwiimba pe. Bakalityompedwe mumoyo alimwi bakali kuyandika kuumbulizyigwa. Nokuba boobo, kweelana ajwi lya Leza lyabusinsimi, kwaangununwa kwabo kwakaboola kwiinda muli Koresi, imwami wa Persia. Wakabazunda bana Babuloni akwaamba kuti: “Jehova . . . wandituma kuti ndimuyakile ŋanda mu Jerusalemu . . . Kufwumbwa uuliko akati kabantu bakwe boonse, Jehova Leza wakwe aabe anguwe alimwi kaya ku Jerusalemu.” (2Mak. 36:23) Eelo kaka eeci cakabaumbulizya kapati bana Israyeli ibakali kukkala mu Babuloni!

5. Ino sintembauzyo wakazyi nzi kujatikizya nguzu zya Jehova zyakuponya?

⁵ Jehova wakapa luumbulizyo ikutali buyo kucisi ca Israyeli kaili nkamu, pele akumuntu umwi aumwi kumugama. Oobu mbocibede amazuba aano. Sintembauzyo wakalemba boobu kujatikizya Leza: “Ulabaponya aabo batyompedwe mumoyo; alimwi ulaanga zilonda zyabo.” (Int. 147:3) Inzya, Jehova ulabalanganya aabo ibajisi mapenzi—kufwumbwa naa ngakumubili naa ngaayo aalwanina mumizeezo. Naaba mazuba aano, Jehova ulayandisisya kutuumbulizya alimwi akutugwasya mumapenzi aatukatazya mumizeezo. (Int. 34:18; Is. 57:15) Ulatupa busongo alimwi anguzu kutegwa tucikonzye kuliyumya mumapenzi aali woonse ngotukonzya kujana.—Jak. 1:5.

6. Ino inga twagwasyigwa buti amakani sintembauzyo ngaakacinca akutalika kwaamba zyanyenyeezi ku Intembauzyo 147? (Amubone cifwanikiso icili kumatalikilo aacibalo.)

⁶ Mpoonya sintembauzyo wakaamba kujatikizya zintu izili kujulu kumane wakati, Jehova “ulabala mweelwe wanyenyeezi” alimwi “ulaziita zyoonse mazina aazyo.” (Int. 147:4) Ino nkaambo nzi ncaakacincila makani ngaakali kwaamba kumatalikilo akutalika kwaamba zyanyenyeezi? Amuyeeye kaambo aaka: Sintembauzyo wakali kukonzya kubona nyenyeezi ameso aakwe, pele taakwe naakalizyi kuti zili zyongaye. Mazuba aano, imweelwe wanyenyeezi nzyobakonzya kubona bantu wakomena citaambiki. Bamwi bayeeya kuti kuli mabbiliyoni aanyenyeezi mumulalabungu wesu uutegwa Milky Way galaxy. Alimwi ambweni kuli milalabungu minji kapati mububumbo boonse! Kulindiswe tobantu, nyenyeezi nzinji kapati cakuti tazibaliki pe! Pele Mulengi ulazipa mazina zyoonse. Eeci caamba kuti nyenyeezi imwi aimwi ililibedelede kuli Jehova. (1Kor. 15:41) Pele ino mbuti kujatikizya bantu ibakkala anyika? Leza, walo uuzyi nyenyeezi imwi aimwi mpoibede, ulituzyi umwi aumwi wandiswe kumugama—nkokuti busena bugaminide aumwi mpabede, ulizyi bwini mbotulimvwa alimwi ulizyi kabotu-kabotu zyoonse nzyotuyandika!

7, 8. (a) Ciindi Jehova navwuna bantu bakwe kumasunko aabasikila, ino ncinzi ncalanga-langa? (b) Amupe cikozyanyo icitondezya Jehova calubomba mbwagwasya bantu batalondokede.

⁷ Kunze lyakumubikkila maano nywebo lwanu kumugama, Jehova ulijisi nguzu iziyandika kutegwa amugwasye ciindi nomwasikilwa mapenzi mubuumi. (Amubale Intembauzyo 147:5.) Ambweni inga mwalimvwa mbuli kuti mapenzi aanu manji kapati alimwi akuti ali mbuli cibbudu cilema kapati ncomutakonzyi kunyamuna. Jehova ulakumvwisya kulezya kwanu, ‘ulizyi kabotu kuti muli bulongo buyo.’ (Int. 103:14) Akaambo kakuti tatulondokede, tulalubizya cakwiinduluka-induluka. Eelo kaka cilatuusisya ikwaamba zintu nzyotuteelede kwaamba, kwaalilwa kulwana zisusi zyesu zyanyama naa kunyonokela zintu nzyobajisi bamwi! Jehova talezyi mumbazu zyoonse eezyi; pele ulatumvwisya kapati!—Is. 40:28

⁸ Ambweni mwakabona kale janza lya Jehova  lyanguzu mbolyakamugwasya kuzunda sunko limwi. (Is. 41:10, 13) Mucikozyanyo, ba Kyoko, mucizyi imupainiya wakatyompwa kapati naakali kubusena nkwaakalongela kutegwa akabelekele nkuko. Ino mbuti Jehova mbwaakatondezya kuti mapenzi aakwe wakali kwaamvwisya? Mubukkale bwakwe oobu bupya, mucizyi Kyoko wakajana kuti wakazingulukidwe abantu ibakali kumvwisya mbwaakali kulimvwa. Wakalimvwa mbuli kuti Jehova wakali kumwaambila kuti: “Ndilakuyanda, ikutali akaambo kakuti uli mupainiya pe, pele akaambo kakuti uli mwanaangu alimwi ulandibelekela cakulyaaba. Ndiyanda kuti kokkomana mubuumi mbuli umwi wa Bakamboni bangu!” Pele kujatikizya ndinywe kumugama, mbuti Singuzuzyoonse mbwaatondezya kuti “busongo bwakwe tabweeli”?

9, 10. Ciindi Jehova natupa lugwasyo, ncinzi ncasaanguna kutupa? Amupe cikozyanyo.

⁹ Zimwi ziindi, zintu nzyomuyandika zilakonzya kuba zintu zyakumubili. Mucikozyanyo, mulakonzya kulibilika kuti cilamumanina cakulya. Nokuba boobo, ngu Jehova uuwisya mvwula kutegwa katulima akuba acakulya, ulasanina nobaba bana babacikwangala ibalilila cakulya! (Amubale Intembauzyo 147:8, 9.) Mbwaanga wazumanana kubapa cakulya bacikwangala, mulakonzya kusyoma kuti Jehova uyoomupa andinywe nzyomuyandika kumubili.—Int. 37:25.

¹⁰ Icikkomanisya kapati ncakuti, Jehova ulatupa nzyotuyandika kumuuya, ulatupa “luumuno lwa Leza oolo lwiinda maano oonse.” (Flp. 4:6, 7) Mucikozyanyo, amubone cikozyanyo caba Mutsuo alimwi abakaintu babo, balo ibakalibonena nguzu zya Jehova zyakufwutula ciindi maanzi naakapaya kucisi ca Japan mu 2011. Kwakasyeede buyo asyoonto kuti abatole maanzi, pele bakafwutuka kwiinda mukutanta atala aaciluli caŋanda yabo. Nokuba boobo, buzuba oobo bakasweekelwa zintu zyoonse nzyobakajisi. Busiku oobo bakabucesya mumudima akwaandwa mpeyo kabali muŋanda yabo mpoili atala pele iyakanyonyookede. Nobwakaca mafwumofwumo, bakayandaula mabbuku aakali kukonzya kubayumya kumuuya. Lilikke bbuku ndyobakali kukonzya kujana lyakali Bbuku Lyaamwaka lya Bakamboni ba Jehova Lyamu 2006. Mbobakalijalwida buyo, bakagamika mizeezo yabo yoonse kumutwe iwakali kwaamba kuti “Kupaya Kwamaanzi Ikwakajaya Bantu Banji Kapati Kwiinda Kupaya Kuli Koonse Ikuzyibidwe” (The Deadliest Tsunamis Ever Recorded.) Cibalo eeci cakali kwaamba muzuzumo wanyika iwakacitika ku Sumatra mu 2004 ooyo iwakapa kuti kube kupaya kwamaanzi ikwakajaya bantu banji kapati kwiinda kupaya kuli koonse ikuzyibidwe. Ba Mutsuo abakaintu babo bakalila ciindi nobakali kubala zyakuluula zyabakwesu abacizyi. Bakalibonena Leza mbwalanganya caluyando kwiinda mukubakulwaizya kumuuya aciindi cini nobakali kuyandika kukulwaizyigwa. Alimwi Jehova wakabapa zintu nzyobakali kuyandika kumubili. Kwiinda mu Banakristonyina, bakatambula zintu zyakumubili nzyobakali kuyandika. Pele icakabakulwaizya kapati nkuswaya kwakali kucitwa kumbungano abaiminizi bamumbunga ya Leza. Ba Mutsuo bakaamba kuti: “Ndakalimvwa mbuli kuti Jehova uli ambali lyaumwi aumwi wesu alimwi uli mukutupa nzyotuyandika. Eelo kaka twakaumbulizyigwa kapati!” Leza usaanguna kutupa nzyotuyandika kumuuya, kumane naya atupe nzyotuyandika kumubili.

11. Ino ncinzi ncobeelede kucita aabo ibayanda kugwasyigwa anguzu zya Leza zyakufwutula?

¹¹ Jehova ulilibambilide lyoonse kugwasya alimwi ‘akubusya babombe myoyo.’ (Int. 147:6a) Pele ino mbuti mbotukonzya kugwasyigwa akaambo kakulibambila nkwalibambilide Leza kuti atugwasye? Tweelede kuti katujisi cilongwe cibotu anguwe. Kutegwa tube acilongwe cili boobo, tweelede kuba babombe myoyo. (Zef. 2:3)  Babombe myoyo balangila Leza kuti abambulule zintu zibyaabi zyoonse nzyobacitikilwa. Jehova ulabakkomanina kapati bantu ibali boobu.

12, 13. (a) Kutegwa tugwasyigwe aa Leza, ino ncinzi ncotweelede kweeleba? (b) Ino mbantu bali buti Jehova mbakkomanina?

¹² Kulubazu lumwi, Leza “babi ubafwusila ansi.” (Int. 147:6b) Majwi aaya alaanguzu kapati! Kutegwa tugwasyigwe aluyando lwa Jehova lutamani alimwi akweeleba bukali bwakwe, tweelede kusulaika zintu nzyasulaika. (Int. 97:10) Mucikozyanyo, tweelede kubusulaika bwaamu. Eeci caamba kuti tweelede kuzitantamuka zintu izikonzya kutupa kuti tucite cibi cili boobu, kubikkilizya akweebelela zintu ziletela muzeezo wakoonana. (Int. 119:37; Mt. 5:28) Kucita boobo kuyandika kubeleka canguzu, pele zilongezyo nzyayootupa Jehova zilainda aakubeleka canguzu kuli koonse nkotukonzya kucita.

¹³ Kutegwa tuzunde munkondo eeyi, tweelede kusyoma Jehova ikutali kusyoma nguzu zyesu tobeni. Sena uyookkomana ikuti naa twasola kuligwasya kwiinda mukubelesya “nguzu zyabbiza,” nkokuti mbunga bantu nzyobayeeyela kuti inga zyabagwasya? Peepe! Alimwi buya tatweelede kusyoma “nguzu zyamaulu aamuntu,” kucita mbuli kuti swebo naa bantu bambi inga twaleta lufwutuko. (Int. 147:10) Muciindi caboobo, tweelede kupaila kuli Jehova akumukombelezya kuti atugwasye. Mukwiimpana abantu basikupa lulayo, Leza walo takatali kumvwa kulomba kwesu, noliba leelyo notumulomba cakwiinduluka-induluka. “Jehova ulabakkomanina aabo bamuyoowa, aabo balindila luyando lwakwe lutamani.” (Int. 147:11) Tulakonzya kusyoma kuti akaambo kaluyando lwakwe lutamani, uyoozumanana kuba andiswe alimwi akutugwasya kuzunda kulombozya zintu zibi.

14. Ino ndusyomo luli buti ilwakamuyumya sintembauzyo?

¹⁴ Jehova ulapa kaambo ikatupa kusyoma ncobeni kuti uyoobagwasya bantu bakwe nobayandika lugwasyo. Kayeeya kujatikizya kuyakululwa kwa Jerusalemu, sintembauzyo wakaimba boobu kujatikizya Jehova: “Nguuyumya mpingizyo zyamilyango yamunzi wako; nguuleleka bana bako ibali mulinduwe. Nguuleta luumuno mucilawo cako.” (Int. 147:13, 14) Eelo kaka wakaumbulizyigwa sintembauzyo kuzyiba kuti Leza wakali kuyooziyumya mpingizyo zyamilyango yamunzi kutegwa bakwabililwe bakombi bakwe!

15-17. (a) Ino zimwi ziindi inga tulimvwa buti akaambo kamapenzi aatusikila, pele mbuti Jehova mbwabelesya Jwi lyakwe kutegwa atugwasye? (b) Amupandulule ‘jwi lya Leza mbolyeenda cakufwambaana.’

¹⁵ Mulakonzya kusikilwa mapenzi aakonzya kumupa kulibilika. Jehova ulakonzya kumupa busongo ibukonzya kumugwasya kuti muliyumye. Sintembauzyo wakaamba kuti Leza wakwe “nguutuma mulawo wakwe anyika; ijwi lyakwe lileenda cakufwambaana.” Mpoonya kaamba kuti Jehova ‘nguutuma caanda, nguumwaya civwulamabwe akulosya civwulamabwe,’ sintembauzyo wakabuzya kuti: “Ino nguni uukonzya kuliyumya kumpeyo yakwe?” Mpoonya wakazumanana kwaamba kuti Jehova “nguutuma jwi lyakwe eelyo zilanyenguluka.” (Int. 147:15-18) Leza wesu singuzuzyoonse, imusongo kwiinda, ooyo weendelezya civwulamabwe alimwi acaanda, ulakonzya kumugwasya kuzunda penzi lili lyoonse likonzya kumusikila.

¹⁶ Mazuba aano, Jehova ulatusololela kwiinda mu Jwi lyakwe, Ibbaibbele. Alimwi “ijwi lyakwe lileenda cakufwambaana” mukuti ulilibambide kutupa busolozi bwakumuuya ciindi notubuyanda. Amuyeeye buyo mbomugwasyigwa kwiinda mukubala Bbaibbele amabbuku ngatupa “muzike uusyomeka alimwi uucenjede,” kweebelela JW Broadcasting, kulanga-langa zintu zili a jw.org, kubandika abaalu alimwi akuyanzana a Banakristoma. (Mt. 24:45) Sena mwabona kuti ncobeni Jehova ulafwambaana kutupa busolozi bwakwe?

¹⁷ Ba Simone bakalibonena nguzu izili mu Jwi lya Leza. Bakali kulitenga kapati cakuti bakali kudooneka naa inga baba muntu Leza ngwakonzya  kukkomanina. Nokuba boobo, ciindi nobakali kutyompwa, bakali kuzumanana kupaila kulomba kuti Jehova abagwasye. Kuyungizya waawo, bakali kujata bubi mukubala Bbaibbele. Bakaamba kuti, “Kufwumbwa bukkale mondibede, lyoonse ndilalibonena nguzu alimwi abusolozi bwa Jehova mbozindigwasya.” Eeci cabagwasya kuti bazumanane kuzilanga munzila yeelede zintu.

18. Ino nkaambo nzi ncomulimvwa kuti mulakkomaninwa a Leza alimwi ntwaambo nzi ntomujisi itumupa kwaamba kuti “Amumutembaule Ja!”?

¹⁸ Sintembauzyo wakalizyi Leza mbwaakali kubayanda bantu bakwe bansiku. Bantu aaba ncecakali cisi celikke icakapedwe “jwi” lya Leza ‘amalailile aakwe alimwi ambeta zyakwe.’ (Amubale Intembauzyo 147:19, 20.) Mazuba aano, tulaacoolwe cakuba tolikke anyika notwiitwa azina lya Leza. Akaambo kakuzyiba Jehova alimwi akusololelwa a Jwi lyakwe mubuumi bwesu, tulikkomene kuti tujisi cilongwe cilibedelede anguwe. Mbubwenya mbuli mulembi wa Intembauzyo 147, sena andinywe mulijisi twaambo tubotu itumupa kwaamba kuti “Amumutembaule Ja!” alimwi akukulwaizya bamwi kucita mbubwenya oobo?