CICITIKA Kulibilika kulabikkilizya akuyoowa.

Akaambo kakuti tupona munyika iitali kabotu, ziindi zimwi tulakonzya kulibilika.

NCOLYAAMBA BBAIBBELE Mwami Davida wakalemba kuti: “Ino ndilalibilika kwaciindi cilamfwu buti, akuusa mumoyo wangu buzuba abuzuba?” (Intembauzyo 13:2)

Ino ncinzi cakamugwasya Davida kuti aliyumye? Wakaambila Leza zyoonse zyakali mumoyo wakwe mumupailo, akusyoma muluyando lwa Leza cakumaninina. (Intembauzyo 13:5; 62:8) Mubwini Leza ulatutamba kuti tutole mapenzi eesu kulinguwe. Lugwalo lwa 1 Petro 5:7 lwaamba kuti: ‘Kamuwaala makatazyo aanu oonse kuli Leza, nkaambo ulamubikkila maano.’

Aboobo, tulakonzya kuleka kulibilika kwiinda mukucita zintu zikonzya kutugwasya kucesya kulibilika. Mucikozyanyo, ciindi mulembi wa Bbaibbele Paulo naakatalika “kulibilika kujatikizya mbungano zyoonse,” wakabeleka canguzu kutegwa abaumbulizye alimwi akubayumya-yumya aabo mbaakali kubikkila maano. (2 Bakorinto 11:28) Kwiinda mukucita boobo, kulibilika kwakwe kwakali kooko kugwasya, nkaambo kwakapa kuti ape lugwasyo luyandika. Andiswe tulakonzya kucita oobo. Kucita ciimpene aceeci kulakonzya kutondezya kutabikkila maano.—Tusimpi 17:17.

“Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.”—Bafilipi 2:4.

CICITIKA

Bantu balakonzya kulibilika akaambo kazintu zitali kabotu nzyobakacita kaindi, zintu zyakumbele, naa kujatikizya mali. *

NCOLYAAMBA BBAIBBELE Kulibilika akaambo kazintu zitali kabotu nzyobakacita kaindi: Kabatanaba Banakristo, bantu bamwi bamumwaanda wamyaka wakusaanguna bakali bakolwi, zigwebenga, basibwaamu, alimwi ababbi. (1 Bakorinto 6:9-11)

Muciindi cakuyeeya nzyobakali kucita kaindi, bakacinca nzila zyabo alimwi akusyoma muluse lwa Leza lupati, lwalo ndwatondezya cakuliyandila. Lugwalo lwa Intembauzyo 130:4 lwaamba kuti: “Yebo [Leza] ulalekelela ncobeni, ikutegwa bantu kabakulemeka.”

Kutazyiba ziyoocitika buzuba butobela: Jesu Kristo wakaamba kuti: “Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo.” (Matayo 6:25, 34) Ino wakali kupandulula nzi? Tweelede kubikkila buyo maano kumapenzi aabuzuba oobo. Mutanooyungizyi kulibilika kujatikizya mapenzi aabuzuba oobo kwiinda mukuyeeya kapati mapenzi aabuzuba butobela, calo cikonzya kupa kuti mutasali kabotu. Alimwi amuyeeye kuti zintu zinji nzyotulibilika tazicitiki pe.

Kulibilika kujatikizya mali: Mwaalumi umwi musongo wakapaila kuti: “Utandipi bucete naa buvwubi.” (Tusimpi 30:8) Muciindi caboobo, wakayandaula kukkutila—muuya walo Leza ngwakkomanina. Mulugwalo lwa Bahebrayo 13:5, tubala kuti: “Ibukkale bwanu butabi bwakuyandisya mali pe, pele amukkutile azintu nzyomujisi lino. Nkaambo [Leza] wakaamba kuti: ‘Ziyume zitete, tandikakusiyi pe alimwi tandikakulekelezyi pe.’” Mukwiimpana amali alo aakonzya kumana, Leza walo takonzyi kubalekelezya aabo basyoma mulinguwe alimwi akupona buumi buuba-uba.

“Tandinabwene mululami wakalekelezyegwa, nobaba bana bakwe kabalombelela cakulya.”—Intembauzyo 37:25.

NZYOBAAMBA BANTU Simubweza twaambo umwi wazina lya Harriet Green, mumuteende wa The Guadian mu 2008, wakaamba kuti: “Tunjila muciindi cimwi cakulibilika.”

Mu 2014, mumuteende uutegwa The Wall Street Journal, Patrick O’Connor wakalemba kuti: “Bana America mbebainda kulibilika.”

NCOLYAAMBA BBAIBBELE “Zintu nzyalibilika muntu nzyezipa kuti moyo wakwe utyompwe, pele jwi libotu ndelipa kuti ukkomane.” (Tusimpi 12:25)

Kwaambisya “ijwi libotu” lilakonzya kujanika mumakani mabotu aa Bwami bwa Leza. (Matayo 24:14) Bwami oobo, mfwulumende ya Leza, ino-ino buyoocita cintu swebo lwesu ncotutakonzyi kucita—kumana kulibilika kuli koonse kwiinda mukugwisya zintu ziletela kulibilika, kubikkilizya akuciswa alimwi akufwa! “[Leza] uyoosindula misozi yoonse kumeso [eesu], alimwi lufwu talukabi limbi, akwalo koomoka, kulila nokuba kucisa takukabi limbi pe.”—Ciyubunuzyo 21:4.

“Aboobo Leza uupa bulangizi amuzuzye kukondwa koonse alimwi aluumuno eelyo nomumusyoma.”—Baroma 15:13.