Bakalyaaba Amoyo Woonse Kuyakubelekela mu Brazil

MYAKA misyoonto yainda, ba Rúbia (1), mucizyi lino uujisi myaka yakuzyalwa iili 30 wakaswaya ba Sandra (2), mupainiya iwakali kubelekela mumbungano nsyoonto mucisi ca Brazil nkocili kumusanza. Mukuswaya ooko, kwakacitika cintu cimwi icakabakkomanisya kapati ba Rúbia akubapa kucinca buumi bwabo. Ino ncinzi cakacitika? Atumvwe mbobapandulula ba Rúbia.

“TIINDAKASYOMA NCONDAKAMVWA”

“Ba Sandra bakanditola kumukaintu ngobakali kwiiya limwi Bbaibbele. Notwakali kwiiya, mukaintu ooyu wakaamba kuti: ‘Ba Sandra, nkondibelekela kuli basimbi botatwe bayanda kwiiya Bbaibbele, pele ndakabaambila kuti beelede kulindila ciindi cabo caakusika. Ndilizyi kuti mwaka uuno mwakajana kale bantu bakuyiisya.’ Tiindakasyoma ncondakamvwa  pe. Bantu ibakali kuyanda kumuzyiba Jehova bakabikkwa amulongo wakulindila kuyiisyigwa. Mumbungano mondakazwa, ndakajisi buyumuyumu bwakujana nociba ciiyo comwe. Aciindi nciconya eeco, katuli muŋanda yasikwiiya Bbaibbele ooyo, ndakalimvwa kuba aluyandisisyo lupati lwakugwasya bantu mudolopo lyakwe lisyoonto. Nokwakainda buyo ciindi cisyoonto, ndakalonga kuzwa mudolopo lipati mondakali kukkala akuunka kudolopo nkobakali kucitila bupainiya ba Sandra.”

Ino zyakabeendela buti zyintu ba Rúbia? Bakaamba kuti: “Mumyezi yobilo kuzwa nondakaunka okuya, ndakali kusololela ziiyo zya Bbaibbele zili 15 mpoonya kakutanainda ciindi cilamfwu, ndakaba amulongo wabantu ibakali kulindila kuyiisyigwa Bbaibbele mbubwenya mbuli ba Sandra.”

WAKAKULWAIZYIGWA KULINGAULA MULIMO WAKWE WAKUKAMBAUKA ALIMWI

Diego (3), mukwesu lino uujisi myaka yakuzyalwa iinda buyo asyoonto ku 20, wakaswaya bapainiya bali mbobabede ibabelekela mudolopo lisyoonto lya Prudentópolis mu Brazil nkoili kumusanza. Kuswaya ooko kwakamunjila kapati mumoyo; mubwini wakakulwaizyigwa kulingaula mulimo wakwe. Wakapandulula kuti: “Ndakali kubeleka mumbungano akubeleka mawoola masyoonto amwezi mumulimo. Pele nondakabaswaya bapainiya aabo akuswiilila zyakuluula zyabo, ndakeezyanisya lukkomano lwabo alimwi amuuya ngondakajisi wakutabikkila kapati maano kumulimo. Nondakabona mbobakakkomene, ndakalombozya kuti buumi bwangu bube ampindu mbuli bwabo.” Naakapiluka kuzwa kukuswaya ooko, Diego wakatalika mulimo wabupainiya.

Mbubwenya mbuli Diego, sena muli Bakamboni bacili bana ibatola lubazu mumulimo wakukambauka alimwi akujanika kumiswaangano ya Bunakristo, pele alimwi mulimvwa kuti mulimo wakukambauka waile kuba buyo cilengwa alimwi munyina lukkomano? Kuti kacili boobo, sena tamukonzyi kubambulula zyintu mubuumi bwanu kutegwa mube acoolwe cakujana lukkomano iluboola kwiinda mukubelekela kubusena kuyandika basikumwaya ba Bwami ibanji? Mubwini, muzeezo wakusiya buumi bubotu ulakonzya kuti ulamuyoosya. Nokuba boobo, bakubusi banji ncobasala kucita eeco. Kakunyina kuyoowa bacinca mbaakani zyabo alimwi azyintu nzyobalombozya kutegwa babelekele Jehova cakulitakata. Acimbi cikozyanyo ncotutiilange-lange, ncaba Bruno.

 SYAAZIBWENE MUKWIIMBA NAA MUBELESI?

Myaka misyoonto yainda, ba Bruno (4), lino ibajisi myaka yakuzyalwa iili 28 bakali kucikolo cakwiimba cidumide, alimwi makanze aabo akali aakuba basyaazibwene mukusololela baimbi. Mubwini, bakacita kabotu mulwiiyo lwabo cakuti ziindi zili mbozibede bakali kutambwa kuti basololele baimbi kubelesya ziimbyo ziindene indene. Bakali kulangila mulimo mubotu kapati. Ba Bruno bakaamba kuti: “Nokuba boobo ndakali kulimvwa kuti kuli cakabulide kulindime. Ndakalilyaabide kuli Jehova, pele ndakalizyi kuti tiindakali kumubelekela cakumaninina, aboobo eeco cakali kundipenzya. Ndakamwaambila Jehova mumupailo kujatikizya mbondakali kulimvwa alimwi ndakaambaula abakwesu bajisi luzyibo mumbungano. Nondakakkala ansi kuyeeyesya, ndakasala kubikka mulimo wangu wakukambauka mubusena bwakusaanguna muciindi cakwiimba, ndakazwa kucikolo cakwiimba akusala kubelekela kubusena kubulide ncobeni basikumwaya ba Bwami.” Ino ncinzi cakacitika akaambo kakusala kwabo?

Ba Bruno bakalongela kudolopo lya Guapiara (mweelwe wabantu uubalilwa ku 7,000), makkilomita aali 260 kuzwa kudolopo lya São Paulo. Kwakali kucinca kupati. Bakaamba kuti: “Ndakatalika kukkala mukaanda kasyoonto munyina filiji, TV naa Intaneti. Mbubwenya buyo, ŋanda yakalijisi zyintu nzyondatakajisi musyule—gaadeni yacisyumani alimwi amicelo.” Kababelekela kubusena oobuya mumbungano nsyoonto, ciindi comwe ansondo ba Bruno bakali kubikka cakulya mucoola cabo, meenda alimwi amabbuku akuyakukukambauka muminzi kababelesya honda yabo. Bantu banji mubusena oobuya kunyina nobakamvwide kale makani mabotu. Bakaamba kuti: “Ndakali kusololela ziiyo zya Bbaibbele zisika ku 18. Kubona basikwiiya aaba mbobakacinca mubuumi bwabo cakandipa kukkomana kapati.” Bakayungizya kuti: “Aciindi eeci, ndakabona kuti ndacijana ncindakabulide mubuumi bwangu—kukkutila kapati ikuboola akaambo kakubikka zyintu zya Bwami mubusena bwakusaanguna. Kukkutila ooku nondatakakubona nondakazumanana kutobela mbaakani zyakumubili.” Pele mbuti ba Bruno mbobakali kujana mali aakuligwasya mu Guapiara? Kumwi kabamwetamweta bakaamba kuti: “Kwiinda mukuyiisya mbokulizyigwa gita.” Bakacili basyaazibwene mukwiimba.

“NDAKAILE KUKKALA”

Mariana (5), lino uujisi myaka yakuzyalwa iitandila ku 20 wakalijana mubukkale mbuli bwaba Bruno. Wakali  kubeleka mulimo wabuloya, pele nokuba kuti wakajisi mulimo uusumpukide, tanaakali kukkutila pe. Wakaamba kuti: “Ndakali kulimvwa ‘kutakkutila mumoyo.’” (Muk. 1:17) Bakwesu abacizyi banji bakamukulwaizya kucita bupainiya. Naakamana kwaayeeyesya makani aaya, Mariana abeenzyinyina ba Bianca (6), ba Caroline (7), alimwi aba Juliana (8), bakasala kugwasyilizya mbungano muBarra do Bugres dolopo lili kulamfwu a Bolivia, ikulampa zyuulu zyamakkilomita kuzwa kumunzi wabo. Ncinzi cakacitika kuzwa waawo?

Mariana wakaamba kuti: “Makanze aangu akali aakukkala buyo kwamyezi yotatwe. Pele nocakakkwana ciindi cakuti ndipiluke, ndakali kusololela ziiyo zya Bbaibbele zili 15. Mubwini, basikwiiya aabo bakacili kuyandika lugwasyo lupati kutegwa bayaambele mukasimpe. Aboobo, cakandiyumina kuti ndibaambile kuti ndiyanda kuunka. Ndakakkala buyo.” Ibacizyi boonse bone ncencico ncobakacita. Aboobo, sena mulimo mupya wa Mariana wakapa kuti buumi bwakwe bube amulimo? Wakaamba kuti: “Coolwe ncaandipa Jehova cakundibelesya kugwasya bantu kucinca buumi bwabo kuti bube kabotu cindipa kulimvwa kabotu. Ncilongezyo kulindime kuzyiba kuti lino ciindi cangu alimwi anguzu ndizibelesya kucita cintu cimwi cilaampindu kapati.” Ba Caroline bakaamba boobu kujatikizya mbobalimvwa bacizyi boonse bone kuti: “Ciindi nendoona masiku, ndilimvwa kukkutila kapati nkaambo ndalitakata kucita zyintu zya Bwami. Buumi bwangu buyeeme kapati ambondikonzya kugwasya Basikwiiya Bbaibbele bangu. Cilakkomanisya kubona mbobayaambele. Ndalibonena mbwaali aamasimpe majwi aakuti: ‘Amulabile, mubone kuti Jehova mubotu.’”—Int. 34:8.

Eelo kaka Jehova ulakkomana kubona mweelwe uuyaabukomena wabakwesu abacizyi bacili bana-bana nyika yoonse ‘ibalyaaba amoyo woonse’ kuti bakambauke makani mabotu aa Bwami bwakwe mumasena aali kulamfwu! (Int. 110:3; Tus.27:11) Boonse babelesi bali boobo ibalyaaba, balalongezyegwa a Jehova.—Tus.10:22.

[Kabbokesi/Cifwanikiso icili apeeji 5]

“Kunyina Ncotubulide”

Ciindi ba João Paulo abakaintu babo ba, Noemi, nobakatondezya kulombozya kwabo kwakubelekela kubusena kubulide, bamwi bakali kubatyompya. Bamwi mumbungano bakali kwaamba kuti: “Kuunka kudolopo lisyoonto, nkuyanda kuliletela mapenzi aamali. Ino nkuunkila nzi? Kucili zyintu zinji zyakucita mumbungano yesu.” Ba João Paulo bakaamba kuti: “Cakali ciyumu kukazya majwi aamvwika kuti mabotu pele aatyompya kapati kuti atulesye kucita makanze eesu.” Nokuba boobo, mazuba aano nobabeleka kwamyaka minji kucilawo kubulide kapati basikumwaya, ba João Paulo aba Noemi balikkomene kuti bakazumanana akusala kwabo kwakuyungizya mulimo wabo. Ba João Paulo bakapandulula kuti: “Kuzwa ciindi mebo abakaintu bangu ncotwakasika okuno, kunyina ncotubulide. Alimwi caboola kuzyintu ziyandika ncobeni, tulijisi zinji kwiinda nzyotwakajisi kaindi.” Ba Noemi bakayungizya kuti: “Kusolekesya kwesu kwakagwasya kapati.”

Buumi bulayuma mumadolopo masyoonto. Ino aabo bakalongela kumasena aali kulamfwu bacikonzya buti kujana mali aakubelesya? Nkwiinda mukutalilekelela. Bamwi balayiisya mwaambo wa Cingisi naa mwaambo umbi, kuyiisya bana mulwiiyo lwabo lwakucikolo, kusuma naa kupenta maanda naa kucita kufwumbwa milimo njobakonzya kubeleka kwaciindi cisyoonto. Alimwi, ino aabo boonse babelekela kubusena kubulide kapati balimvwa buti? Balajana zilongezyo zinji kwiinda buyumuyumu mbobajisi.

[Kabbokesi/Cifwanikiso icili apeeji 6]

Buyumuyumu Bwakuyeeya Kuŋanda

Ba Tiago bakaamba kuti: “Nokwakainda buyo ciindi cisyoonto kuzwa nondakasika mumbungano mpya, ndakatalika kulimvwa kutyompwa. Kwakali basikumwaya basyoonto kapati mudolopo alimwi kwakanyina zyintu zyakulikondelezya. Ndakakuyeeya kuŋanda. Ndakabona kuti ndakeelede kucita cintu cimwi kutegwa ndikkomane. Aboobo, ndakatalika kusolekesya kubazyiba kabotu bakwesu abacizyi mumbungano—aboobo cakandigwasya. Ndakaba abalongwe bapya alimwi muciindi buyo cisyoonto ndakakkomana kapati akwaanguluka.”

[Cifwanikiso icili apeeji 3]

Ba Noemi aba João Paulo, Ascurra, Santa Catarina