1, 2. (a) Ino “Mwami walyoonse alyoonse” nguni, alimwi nkaambo nzi zyina eelyo ncolyeelela? (Amubone cifwanikiso icili kumatalikilo aacibalo) (b) Kujatikizya bweendelezi bwa Jehova, ncinzi citupa kuswena kulinguwe?

MWAMI SOBHUZA WABILI waku Swaziland wakalela myaka iitandila ku 61. Myaka njaakalela minji kweezyanisya amyaka njobalela bami bamazuba aano. Nokuba kuti ciindi ncaakalela Mwami Sobhuza ciboneka kulampa, kuli mwami uujisi bulelo butakonzyi kufwiinsigwa akaambo kakufwiimpa kwaciindi ncobapona bantu. Bbaibbele limwaamba kuti “Mwami walyoonse alyoonse.” (1 Ti. 1:17) Sintembauzyo wakaamba zyina lya Mwami ooyu naakati: “Jehova ngumwami walyoonse alyoonse.”—Int. 10:16.

² Bulamfwu bwaciindi cabulelo bwa Leza mbobupa kuti bulelo bwakwe bwiindane abulelo bwabantu. Nokuba boobo, mbwayendelezya Jehova ncecipa kuti tuswene kulinguwe. Mwami umwi iwakalela mu Israyeli yansiku myaka iili 40 wakatembaula Leza amajwi aakuti: “Jehova ngusibuuya, ngusiluse, ulamuka kukalala, ulizwide luzyalo. Jehova ulikazikide cuuno cakwe cabwami mujulu, nkabela bwami bwakwe buleendelezya kuliboonse.” (Int. 103:8, 19) Jehova Mwami wesu alimwi ngu Taateesu—Taateesu wakujulu siluyando. Eeci cipa kubuzya mibuzyo yobilo: Muunzila nzi Jehova mwacita zyintu kali Taata? Mbuti Jehova mbwaatondezya bweendelezi bwakwe kuzwa ciindi cabuzangi mu Edeni? Bwiinguzi kumibuzyo eeyi bulatugwasya kuswena kuli Jehova alimwi akumukomba amoyo wesu woonse.

3. Ino nguni wakasaanguna kulengwa mumukwasyi wa Jehova wabubumbo boonse, alimwi mbaani bambi bakalengwa kabali “bana” ba Leza?

³ Kweelede kuti Jehova wakakkomana kaka kulenga Mwanaakwe simuzyalwaalikke! Leza tanaakamuubula Mwanaakwe mutaanzi kuzyalwa, kumubona mbuli muntu waansi kapati. Muciindi caboobo, wakamuyanda kali Mwanaakwe akubeleka anguwe calukkomano mukulenga zilenge zimbi zilondokede. (Kol. 1:15-17) Zilenge eezyi zyakazikubikkilizya amyaanda myaanda yabangelo. Kweelana ambobaambwa kuti ‘basimilimo bacita ncayanda,’ ibangelo balamubelekela Leza calukkomano alimwi ulabalemeka kwiinda mukubaamba kuti “bana” bakwe. Ibangelo ncibeela camukwasyi wa Jehova wabubumbo boonse.—Int. 103:20-22; Job. 38:7.

4. Ino bantu bakabikkilizyigwa buti mumukwasyi wa Leza wabubumbo boonse?

⁴ Naakamana kulenga ijulu anyika, Jehova wakakomezya mukwasyi wakwe wabubumbo boonse. Naakamana kubamba nyika, kauli munzi weebeka ncobeni, Jehova wakabotezya milimo yakwe kwiinda mukulenga muntu wakusaanguna, Adamu, mucinkozya cakwe. (Matl. 1:26-28) Mbwali Mulengi, Jehova wakali kulangila kuti Adamu ulamumvwida. Mbwali Taata, Jehova wakapa malailile aakwe oonse caluyando alimwi caluzyalo. Malailile aakwe kunyina naakali kubapa kubula lwaanguluko pe.—Amubale Matalikilo 2:15-17.

5. Mbubambe nzi mbwaakabikka Leza bwakuzuzya nyika abana bakwe bantunsi?

⁵ Mukwiindana abami bantunsi, Jehova ulikkomene kupa mikuli kubantu bakwe, kubabona kuba bantu basyomeka bamukwasyi wakwe. Mucikozyanyo, wakapa Adamu nguzu zyakweendelezya zilenge zyuumi amulimo mupati pele uukkomanisya wakuulika banyama mazyina. (Matl. 1:26; 2:19, 20) Leza tanaakalenga mamiliyoni aabantu balondokede kutegwa bazuzye nyika. Muciindi caboobo, wakasala kulenga muntu uulondokede kuba mugwasyi wa Adamu—imukaintu, Eva. (Matl. 2:21, 22) Mpoonya, wakabapa coolwe cakuzyala bana akuzuzya nyika. Mubukkale oobu bubotu, bantu bakali kukonzya kukomezya Paradaiso mane kusikila nyika yoonse yaba paradaiso. Antoomwe abangelo kujulu, bantu bakali kukonzya kukomba Leza lyoonse mbuli cibeela camukwasyi wabubumbo boonse. Eelo kaka oobu bwakali bulangizi bubotu! Eeci cakali citondezyo caluyando lwa Taateesu Jehova.

6. (a) Ino buzangi bwakatalika buti mumukwasyi wa Leza? (b) Nkaambo nzi buzangi ncobutaambi kuti Jehova wakasweekelwa nguzu zyakweendelezya?

⁶ Cuusisya ncakuti, ba Adamu a Eva tiibakakkutila kuti Jehova abe Mwami wabo. Muciindi caboobo, bakasala kutobela mwana wa Leza wamuuya iwakazanga, Saatani. (Matl. 3:1-6) Buumi oobu bwakulizandula kubweendelezi bwa Leza bwakaleta macise, kupenga alufwu kuli mbabo akubana babo. (Matl. 3:16-19; Lom. 5:12) Leza tanaakacijisi bantu bamumvwida anyika. Sena eeci cakali kwaamba kuti Leza wabula nguzu zyakweendelezya, cakuti wakaleka kweendelezya bantu anyika? Peepe! Wakatondezya nguzu zyakwe kwiinda mukutanda mwaalumi amukaintu kuzwa mumuunda wa Edeni akubikka bakerebimu kabali balindizi amulyango wamuunda kutegwa batajokeli mumuunda. (Matl. 3:23, 24) Aciindi nceena, Leza wakatondezya luyando lwabuzyali kwiinda mukusinizya kuti makanze aakwe aakuba amukwasyi wabubumbo boonse wabana bamuuya ibalyaabide alimwi abantu akali kuyakuzuzikizyigwa. Wakasyomezya “lunyungu” ilwakali kuyakugwisya Saatani alimwi amapenzi aakaletwa acibi ca Adamu.—Amubale Matalikilo 3:15.

7, 8. (a) Ino bubi bwakavwulide buti mumazuba aa Nowa? (b) Mbubambe nzi Jehova mbwaakabikkide bwakusalazya nyika akufwutula mukwasyi wabantu?

⁷ Mumyaanda yamyaka yakatobela, ibantu  bamwi bakasala kusyomeka kuli Jehova. Akati kabaabo kwakali Abelo alimwi a Enoki. Nokuba boobo, bunji bwabantu bakamukaka Jehova kuba Usyi alimwi a Mwami wabo. Kusikila mumazuba aa Nowa, nyika ‘yakazwide luuni.’ (Matl. 6:11) Sena eeci cakali kwaamba kuti Jehova tanaakacijisi nguzu zyakweendelezya zyintu zicitika anyika? Ino makani akaindi ayubununa nzi?

⁸ Amubone cibalo caamba zya Nowa. Jehova wakamupa malailile aakajisi bumpiyo-mpiyo alimwi amalailile aakupanga bwato bupati ibwakali kuyoofwutula Nowa amukwasyi wakwe. Leza wakatondezya luyando lwakwe lupati kubantu boonse ciindi naakapa Nowa mulimo wakuba “mukambausi wabululami.” (2 Pe. 2:5) Mulumbe ngwaakali kukambauka Nowa cakutadooneka wakali kubikkilizya kukulwaizya bantu kuti beempwe alimwi akucenjezya kujatikizya lunyonyooko ilwakali kuboola, pele bantu tiibakaswiilila pe. Kwamakumi aamyaka, Nowa alimwi amukwasyi wakwe bakali kupona akati kabantu basiluuni alimwi ibatakali kulilemeka. Jehova kali Usyi uulanganya, wakabakwabilila alimwi akubaleleka ibantu ibali lusele ibakali kusyomeka. Kwiinda mukuleta Zambangulwe, Jehova wakatondezya kuti ngomupati kunguzu kwiinda bantu bazangi alimwi abangelo babyaabi. Cakutadooneka, Jehova nguwakali kweendelezya.—Matl. 7:17-24.

9. Ncoolwe nzi Jehova ncaakapa bantu nolyakainda Zambangulwe?

⁹ Ciindi Nowa amukwasyi wakwe nobakanjila munyika iyakasalazyidwe alimwi akuumwa muwo mubotu, myoyo yabo yakazula kukondwa akulumba Jehova akaambo kakubalanganya akubakwabilila. Mpoonya-mpoonya, Nowa wakayaka cipaililo akutuula zituuzyo kutegwa akombe Jehova. Leza wakalongezya Nowa amukwasyi wakwe alimwi wakabapa malailile aakuti “amuzyalisye, muvule, muzuzye nyika.” (Matl. 8:20–9:1) Bantu alimwi bakaba acoolwe cakukamantana mukukomba alimwi akuzuzya nyika.

10. (a) Nkuukuli alimwi muunzila nzi kuzangila Jehova mbokwakakomena nolyakainda Zambangulwe? (b) Nintaamu nzi Jehova njaakabweza kusinizya kuti kuyanda kwakwe kucitwe?

¹⁰ Nokuba boobo, Zambangulwe kunyina nolyakagwisya kutalondoka, alimwi bantu bakacili kulwana amuuya wa Saatani alimwi abangelo bazangi. Tiilyakalampa, kuzangila bweendelezi bwa Jehova bubotu kwakaindila alimwi. Mucikozyanyo, muzyukululwa wa Nowa, Nimrodi, wakakazya bweendelezi bwa Jehova munzila iimbi. Nimrodi waambwa kuti wakali “muvwimi singuzu kumeso aa-Jehova.” Wakayaka minzi mipati, mbuli munzi wa Babelo, alimwi akulibikka kuba mwami “munyika ya-Sinara.” (Matl. 10:8-12) Ncinzi ncaakali kukonzya kucita Mwami walyoonse alyoonse kujatikizya mwami muzangi ooyu alimwi amakanze aakwe aakusinkila makanze aa Leza ‘aakuzuzya nyika’? Leza wakapilinganya mwaambo wabantu, akupa kuti balelwa ba Nimrodi ibakatyompedwe bamwaikizyanye “koonse koonse ansi.” Bakazumanana abukombi bwabo bwakubeja alimwi abweendelezi mbobakali kutobela.—Matl. 11:1-9.

11. Muunzila nzi Jehova mwaakatondezya kusyomeka kuli Abrahamu mulongwe wakwe?

¹¹ Nokuba kuti banji bakali kukomba baleza bakubeja nolyakainda Zambangulwe, baalumi bamwi basyomeka bakazumanana kulemeka Jehova. Umwi wabo wakali Abrahamu, walo iwakamvwida kwiinda mukusiya bubotu bwamumunzi wakwe wa Uri akuunka kuyakukkala mumatente myaka minji. (Matl. 11:31; Heb. 11:8, 9) Ciindi Abrahamu ncaakali kweenda kali simutuntuli mubuumi bwakwe, kanji-kanji wakalizingulukidwe abami, bunji bwabo bakali kukkala muminzi iyakajisi malambo. Pele Jehova wakakwabilila Abrahamu amukwasyi wakwe. Kujatikizya lukwabililo luli mbuli lwa usyi ndwajisi Jehova, sintembauzyo wakaamba kuti: ‘Leza taakwe  naakazumizya muntu uuli woonse kubapenzya. Wakatapatila bami nkaambo kabo.’ (Int. 105:13, 14) Akaambo kakuti wakali kusyomeka kumulongwe wakwe, Jehova wakasyomezya Abrahamu kuti: “Mulinduwe muyoozwa bami.”—Matl. 17:6; Jak. 2:23.

12. Ino Jehova wakatondezya buti bweendelezi bwakwe mucisi ca Egepita, alimwi ino eeci cakabajatikizya buti bantu bakwe basalidwe?

¹² Leza wakainduluka cisyomezyo cakwe cakubalongezya kumwana wa Abrahamu Izaka alimwi amuzyukulu wakwe Jakobo, calo cakali kubikkilizya akuti mulunyungu lwabo kuyoozwa bami. (Matl. 26:3-5; 35:11) Nokuba boobo, bami aabo kabatanaba, bana ba Jakobo bakaba bazike mu Egepita. Sena eeci caamba kuti Jehova tanaakali kukonzya kuzuzikizya cisyomezyo naa kuti wakaleka kweendelezya anyika? Peepe! Aciindi cakwe ceelede, Jehova wakatondezya nguzu zyakwe alimwi abweendelezi bwakwe kuli Farao iwakali muyumu moyo. Bana Israyeli ibakali bazike bakasyoma Jehova walo iwakabafwutula munzila iigambya nobakazabuka Lwizi Lusalala. Tacidoonekwi kuti Jehova wakacili Mwami Wabubumbo Boonse, alimwi wakali Taata uulanganya, iwakabelesya nguzu zyakwe kukwabilila bantu bakwe.—Amubale Kulonga 14:13, 14.

13, 14. (a) Ncinzi bana Israyeli ncobakaamba mulwiimbo kujatikizya bweendelezi bwa Jehova kali Mwami? (b) Ncisyomezyo nzi cijatikizya bweendelezi Leza ncaakaambila Davida?

¹³ Mbobakafwutulwa buyo camaleele kuzwa mu Egepita, bana Israyeli bakaimba lwiimbo lwakuzunda kutembaula Jehova. Lwiimbo oolo ilwakalembwa mubbuku lya Kulonga caandaano 15, lulabikkilizya akwaambilizya ikuli mukapango 18 kwakuti: “Jehova ngunooendelezya lyoonse alyoonse.” Masimpe, Jehova wakaba Mwami wacisi cipya. (Dt. 33:5) Nokuba boobo, bantu tiibakakkutila kuti Jehova abe Muleli wabo uutalibonyi. Myaka iibalilwa ku 400 nobakazwa mu Egepita, bakalomba Leza kuti abape mwami muntunsi mbubwenya mbocakabede kubasimukobonyina batakali kukomba Leza. (1 Sam. 8:5) Nokuba boobo, Jehova wakacili Mwami, eeci cakalibonya ciindi Davida mwami muntunsi wabili naakali kulela.

¹⁴ Davida wakaleta bbokesi lyacizuminano lisalala ku Jerusalemu. Ciindi eeci calukkomano, ba Levi bakaimba lwiimbo lwakutembaula ilwakajisi majwi aalembedwe mulugwalo lwa 1 Makani 16:31 aakuti: ‘Nyika isekelele. Baambe akati kabamasi kuti Jehova ngu Mwami.’ Muntu ulakonzya kubuzya kuti, ‘Mbwaanga Jehova  ngo Mwami walyoonse alyoonse, ino wakaba buti Mwami aciindi eeco?’ Jehova uba Mwami ciindi natondezya bulelo bwakwe naa nabikka muntu umwi kuti amwiiminine aciindi cimwi naa nalanganya bukkale bumwi bugaminide. Cibeela eeci cabweendelezi bwa Jehova cilijisi bupanduluzi buyandika kapati. Davida katanafwa, Jehova wakamusyomezya kuti bweendelezi bwakwe bwakali kuyoozumanana kukabe kutamani, naakati: “Njoobusya mwana wako iwakazyalwa kumaala aako, kuti alye izina lyako, nkabela njooimikizya bwami bwakwe.” (2 Sam. 7:12, 13) Kumamanino aamakani aaya, “mwana” ooyu wa Davida wakalibonya nokwakainda myaka iibalilwa ku 1,000. Ino ooyu wakazyooba ni, alimwi ndilili naakali kuyakuba Mwami?

15, 16. Ndilili Jesu naakananikwa kutondezya kuti nguuyakuba Mwami kumbele, alimwi naakacili anyika, mbubambe nzi Jesu mbwaakabikka bujatikizya bweendelezi bwakwe?

¹⁵ Mumwaka wa 29 C.E., Johane Mubbapatizi wakatalika kukambauka kuti ‘Bwami bwakujulu bwakaliswenede afwaafwi.’ (Mt. 3:2) Ciindi Johane naakabbapatizya Jesu, Jehova wakananika Jesu kuba Mesiya iwakasyomezyegwa alimwi akuti akabe Mwami wa Bwami bwa Leza kumbele. Jehova wakaamba majwi kuli Jesu aaluyando ndwajisi Usyi ku Mwanaakwe aakuti: “Ooyu Mwanaangu ngweyandisya, ngwekkomanina.”—Mt. 3:17.

¹⁶ Mumulimo wakwe woonse, Jesu wakalemeka ba Usyi. (Joh. 17:4) Wakacita oobo kwiinda mukukambauka kujatikizya Bwami bwa Leza. (Lk. 4:43) Kuyungizya waawo wakayiisya basikumutobela kupailila Bwami oobo kuti buboole. (Mt. 6:10) Mbwaakali Mwami Uusalidwe, Jesu wakali kukonzya kwaambilizya kuli basikumukazya kuti: “Bwami bwa Leza buli akati kanu.” (Lk. 17:21) Mukuya kwaciindi, mangolezya katanajaigwa, Jesu wakabamba ‘cizuminano cabwami’ abasikwiiya bakwe. Aboobo wakapa basikwiiya bakwe bamwi bulangizi bwakumusangana kabali bami mu Bwami bwa Leza.—Amubale Luka 22:28-30.

17. Muunzila nzi zimwi zisyoonto Jesu mwaakatalika kutondezya nguzu zyakwe zyabwami mumwaanda wamyaka wakusaanguna, pele ncinzi ncaakeelede kulindila?

¹⁷ Ndilili Jesu naakali kuyakutalika kulela kali Mwami wa Bwami bwa Leza? Tanaakali kuyakutalika mpoonya-mpoonya pe. Kumazuba buzuba mbubwenya oobo, Jesu wakajaigwa alimwi basikwiiya bakwe bakamwaika. (Joh. 16:32) Nokuba boobo, mbubwenya mbuli kaindi, Jehova wakazumanana kuzyeendelezya zyintu. Mubuzuba bwatatu, wakamubusya Mwanaakwe, mpoonya mubuzuba bwa Pentekoste 33 C.E., Jesu wakatalisya bwami bwakumuuya akati kambungano ya Banakristo yabanyina bananikidwe. (Kol. 1:13) Nokuba boobo, Jesu wakeelede kulindila kutegwa abweze nguzu zyabwami zizulide zyakweendelezya nyika kali “lunyungu” lwakasyomezyegwa. Jehova wakaambila Mwanaakwe kuti: “Kala kujanza lyangu lyalulyo, mbike basinkondonyoko babe citandabalilo camaulu aako.”—Int. 110:1.

18, 19. Notubona mbwabeendelezya Leza balelwa bakwe, ino tukulwaizyigwa kucita nzi, alimwi ncinzi ncotuyakwiiya mucibalo citobela?

¹⁸ Kwamyaanda yamyaka, bweendelezi bwa Jehova bwakali kukazyigwa kujulu alimwi aanyika. Jehova kunyina naakacileka kuba mweendelezi wabubumbo boonse; wakazumanana kweendelezya. Mbwaanga ngo Taata siluyando, wakali kubakwabilila akubalanganya balelwa bakwe basyomeka mbuli Nowa, Abrahamu, a Davida. Kaambo aaka keelede kutupa kulibombya ku Mwami wesu akuswena afwaafwi kulinguwe!

¹⁹ Pele lino tulakonzya kulibuzya kuti: Mbuti Jehova mbwaaba Mwami mumazuba eesu? Mbuti mbotukonzya kutondezya kuti tuli balelwa basyomeka ba Bwami bwa Jehova akuba bana balondokede mumukwasyi wakwe wabubumbo boonse? Ino caamba nzi notupaila kuti Bwami bwa Leza buboole? Mibuzyo eeyi ilaingulwa mucibalo citobela.