Ndakajisi buyo myaka yakuzyalwa iili kkumi mu 1985 ciindi bana ibakazwida ku Cambodia nobakasika kucikolo nkondakali kwiiya ku Columbus, Ohio, mucisi ca U.S.A. Mwana umwi musankwa wakali kukonzya kwaamba mabala masyoonto aamu Cingisi. Kwiinda mukubelesya zifwanikiso, wakatalika kundaambila bantu mbobakali kupenzyegwa, kujaigwa, alimwi ambobakali kutija. Ndakali kulila masiku nondakali kuyeeya kujatikizya bana aaba. Ndakali kuyanda kuti kandibaambila makani aajatikizya bulangizi bwa Paradaiso alimwi abubuke, pele tiibakali kukonzya kumvwa mwaambo ngondakali kukanana. Nokuba kuti ndakali buyo mwana musankwa muniini, ndakasala kwiiya mwaambo waci Cambodian kutegwa kandaambila basicikoloma makani aajatikizya Jehova. Aciindi eeco tiindakazyi pe buumi bwangu mbobwakali kuyakuba kumbele akaambo kakusala ooku.

Kwiiya mwaambo waci Cambodian kwakali kukatazya. Ziindi zyobilo ndakali kuyanda kucileka kwiiya mwaambo ooyu, pele Jehova wakandiyumya-yumya kwiinda mubazyali bangu. Mukuya kwaciindi, bamayi bangu alimwi abasicikoloma bakatalika kundikulwaizya kuba amulimo uusumpukide. Pele mebo ndakali kuyanda kuba mupainiya, alimwi ndakasala ziiyo zyakusekondali izyakali kuyakundigwasya kujana mulimo uubelekwa ciindi cisyoonto kutegwa ndikacikonzye kuzuzikizya mbaakani yangu. Ndakotoka kucikolo, ndakali kubeleka mumulimo wakukambauka antoomwe abapainiya bamwi. Alimwi ndakalisungula kuyiisya basicikolo ibakali kwiiya Cingisi—kusala ooku kwakandigwasya kapati kumbele.

Nondakaba amyaka yakuzyalwa iili 16, ndakamvwa makani aakali kujatikizya kabunga ikakali kubelesya mwaambo waci Cambodian mu Long Beach, California, mucisi ca U.S.A. Ndakaswaya ookuya alimwi akwiiya kubala mwaambo waci Cambodia. Mbondakamanina buyo cikolo, ndakaba mupainiya alimwi ndakazumanana kukambaukila bantu ibakali kukanana mwaambo waci Cambodian ibakali kukkala afwaafwi ankondakali kukkala. Kuzikusika ciindi nondakali amyaka yakuzyalwa iili 18, ndakali kuyeeya kulongela ku Cambodia. Bwakacili busena bubi kukkala, pele ndakalizyi kuti kwakali buyo bantu basyoonto akati kabantu ibali 10 miliyoni ibakali kukkala mu Cambodia ibakamvwide kale makani mabotu aa Bwami. Aciindi eeco, mucisi coonse kwakali buyo mbungano yomwe iyakajisi basikumwaya ibali 13. Ndakaswaya cisi ca Cambodia ciindi cakusaanguna nondakali amyaka yakuzyalwa iili 19. Nokwakainda myaka yobilo ndakasala kuyakukkala mucisi eeci. Ndakajana mulimo uubelekwa ciindi cisyoonto wakusandulula akuyiisya Cingisi kutegwa kandiligwasya mumulimo wangu. Mukuya kwaciindi, ndakajana mukaintu iwakajisi mbaakani izikozyenye ambaakani zyangu. Antoomwe twakkomana kugwasya bantu banji bamu Cambodia kulyaaba kuli Jehova.

Jehova wandipa ‘nzyuuyanda moyo wangu.’ (Int. 37:4) Kugwasya bantu kuba basikwiiya ngomulimo uuletela lukkomano kwiinda milimo yoonse. Mumyaka iili 16 njondakkala mu Cambodia, kabunga kasyoonto akaya ikakajisi babelesi ba Jehova ibakali 13 kakomena akuba mbungano izili 12 atubunga 4 ituli mumasena aali kulamfwu!—Akaluulwa aba Jason Blackwell.