1, 2. (a) Ino kuba kamboni caamba nzi, alimwi muunzila nzi basimubweza twaambo bamunyika mobalibonya kuti baalilwa? (b) Nkaambo nzi Jehova tasyomi basimubweza twaambo bamunyika eeyi?

INO kuba kamboni caamba nzi? Bbuku limwi lipandulula mabala lyaamba kuti: “Kamboni muntu walibonena aameso cintu cimwi kacicitika akuluula kujatikizya cintu eeco. Mucikozyanyo, mudolopo lya Pietermaritzburg, mucisi ca South Africa, muteende umwi uutegwa The Witness wali kumwaya makani kwamyaka iinda ku 160. Izina eeli lilaweelela muteende ooyu nkaambo makanze aanguwo ngakusyomeka mukumwaya makani aazintu zicitika munyika. Mukamwini muteende ooyu wakasyomezya kuti muteende ooyu unakumwaya makani “aamasimpe, masimpe oonse kujatikizya cintu cimwi cacitika.”

² Nokuba boobo, cuusisya ncakuti, basimubweza twaambo banji tabaambi masimpe kujatikizya twaambo twamasimpe ituyandika mubuumi bwabantu. Oobu mbocibede nkaambo Leza singuzuzyoonse wakaamba kwiinda mumusinsimi wakaindi Ezekiele kuti: “Bamasi bayooziba kuti ndime Jehova.” (Ezk. 39:7) Pele Mweendelezi Wabubumbo Boonse tasyomi muli basimubweza twaambo bamunyika eeyi. Ulijisi Bakamboni ibabalilwa ku 8 miliyoni balo baambila bantu bamisyobo yoonse kujatikizya Leza alimwi ambwaakali kucita zintu abantu kaindi alimwi amazuba aano. Nkamu eeyi ya Bakamboni alimwi ilaambilizya zisyomezyo zya Leza zyakulongezya bantu kumbele. Kwiinda mukubikka mulimo wakupa bumboni ambele, tutondezya kuti tuleelela kwiitwa azina lya Leza,  kweelana ambokwaambidwe mulugwalo lwa Isaya 43:10 kuti: “Ndinywe bakamboni bangu, mbwaamba Jehova, alakwe mulanda wangu ngundisalide ngukamboni.”

3, 4. (a) Ndilili Basikwiiya Bbaibbele nobakatalika kwiitwa azina lipya, alimwi ino bakalimvwa buti kujatikizya izina eelyo? (Amubone cifwanikiso icili kumatalikilo aacibalo.) (b) Mibuzyo nzi njotutiilange-lange?

³ Eelo kaka ncoolwe cipati kwiitwa azina lya Jehova, nkaambo “Mwami walyoonse alyoonse,” walo iwaamba kuti: “Ndendilyo izina lyangu lyoonse; mbuboobo mbunjeelede kwiibalukwa mumazyalani amazyalani!” (1 Ti. 1:17; Kul. 3:15; amweezyanisye a Mukambausi 2:16.) Mumwaka wa 1931, Basikwiiya Bbaibbele bakasala izina lyakuti Bakamboni ba Jehova. Kuzwa waawo, magwalo manji aakulumba akasimbwa mumagazini ya Ngazi Yamulindizi. Mbungano imwi yaku Canada yakalemba kuti: “Makani mabotu aakuti tuli ‘Bakamboni ba Jehova’ atukkomanisya kapati, alimwi atupa kuti tube aamakanze aakweelela kwiitwa azina eeli lipya.”

⁴ Mbuti mbomukonzya kutondezya kulumba akaambo kakwiitwa azina lya Leza? Alimwi sena inga mwaamba twaambo twamu Magwalo tuzingulukide lugwalo mpolijanika izina lyesu lyakuti Bakamboni ba Jehova?

5, 6. (a) Muunzila nzi bazyali bana Israyeli mobakeelede kuba bakamboni ba Jehova? (b) Ncinzi acimbi ncobakalaililwa kucita bazyali bana Israyeli, alimwi nkaambo nzi eeci cilayandika kubazyali mazuba aano?

⁵ Muna Israyeli umwi aumwi mumazuba aa Isaya wakali “kamboni” wa Jehova, alimwi cisi coonse cakali mbuli “mulanda” wa Leza. (Is. 43:10) Nzila imwi bazyali bana Israyeli njobakali kupa bumboni yakali yakuyiisya bana babo kujatikizya Leza mbwaakali kucita zintu abamausyi. Mucikozyanyo, ciindi nobakali kulaililwa kucita Pobwe Lyakwiindilila amwaka, bantu bakali kwaambilwa kuti: “Bana banu nebayoomubuzya kuti, Ino milimo eyi ilaambanzi? muleelede kuvuwa kuti, Ncecipaizyo capasika ca-Jehova, nkaambo  wakaindilila maanda aabana ba-Israyeli bamu-Egepita ciindi eciya naakajaya ba-Egepita; wakavuna maanda esu.” (Kul. 12:26, 27) Bamazyali aabo ambweni alimwi bakali kubaambila bana babo kuti ciindi cakusaanguna Musa naakasika kumwami wa Egepita kumulomba kuti abazumizye kuunka munkanda kuyakukomba Jehova, Farao wakavwiila kuti: “Ma! Nguni Jehova? Sa ndakonzya kuswiilila ijwi lyakwe akuleka ba-Israyeli?” (Kul. 5:2) Masimpe, inga kwaambwa kuti, nozyakainda zipenzyo izili kkumi alimwi abana Israyeli nobakafwutuka kuli basikalumamba bana Egepita ku Lwizi Lusalala, bwiinguzi kumibuzyo ya Farao bwakalibonya caantangalala kubantu boonse. Jehova wakaba Singuzuzyoonse—alimwi ucili Singuzuzyoonse. Alimwi cisi cabana Israyeli bwakali bumboni bulimvwisya bwakuti Jehova ngu Leza uuzuzikizya zisyomezyo zyakwe zyoonse.

⁶ Bana Israyeli ibakali kutondezya kulumba kucoolwe cakwiitwa azina lya Jehova, bakali kwaamba kujatikizya zintu zibotu eezyi izyakacitika kutali buyo kubana babo pele akuli bamuzwakule ibakali bazike mumaanda aabo. Alimwi cimbi icakali kuyandika, bana Israyeli bakalaililwa kuyiisya bana babo kutobela zyeelelo zya Leza zyakusalala. Jehova wakaamba kuti: “Amusalale, nkaambo ndasalala mebo nde-Jehova Leza wanu.” (Lev. 19:2; Dt. 6:6, 7) Eelo kaka eeci ncikozyanyo cibotu kubazyali Banakristo mazuba aano, abalo ibayiisya bana babo nzila zyakusalala, calo cigwasya bana kulemeka izina lya Leza lilemekwa!—Amubale Tusimpi 1:8; Baefeso 6:4.

7. (a) Ino zisi zyakazingulukide zyakajatikizyigwa buti ciindi bana Israyeli nobakali kusyomeka kuli Jehova? (b) Mukuli nzi ngobajisi boonse ibaitwa azina lya Leza?

⁷ Aboobo, ciindi bana Israyeli nobakali kusyomeka, bakali kupa bumboni bubotu bwazina lya Leza. Bakaambilwa kuti: “Lino bantu boonse baansi balabona kuti izina lya-Jehova lili aandinywe, aboobo balamuyoowa.” (Dt. 28:10) Nokuba boobo, cuusisya ncakuti, bunji bwaziindi bana Israyeli tiibakali kusyomeka pe. Ciindi aciindi bakali kukomba mituni. Kuyungizya waawo, mbubwenya mbuli baleza babana Kanana mbobakali kukomba, bakaba basilunya, akutuula bana babo alimwi akudyaaminina bacete. Eelo kaka eeci nciiyo citukulwaizya kusoleka canguzu kutegwa katusalala ciindi notumwiiya Ooyo Uusalalisya, walo ngotwiitwa azina lyakwe!

8. Ino Jehova wakamwaambila kucita nzi Isaya, alimwi ino Isaya wakacita buti?

⁸ Jehova wakalaambilide limwi kuti bana Israyeli bakali kuyakubona bumboni bugambya bwakufwutulwa kwabo kuzwa mubuzike. (Is. 43:19) Zyaandaano zyakusaanguna izili cisambomwe zyabbuku lya Isaya zyaamba kapati kucenjezya kujatikizya mapenzi aakali kuyakucitikila Jerusalemu aminzi yakazingulukide. Jehova, walo uli nguubona izili mumyoyo, wakaambila Isaya kuzumanana kwaambilizya kucenjezya ooku nokuba kuti mulumbe tiiwakali kuyakutambulwa pe. Isaya wakagambwa alimwi wakali kuyanda kuzyiba naa cisi cabantu ba Leza icatakali kweempwa naa cakali kuyakuzumanana kwaciindi cilamfwu buti. Ino Leza wakaingula buti? Wakaamba kuti: “Mane lumwi minzi iyoosaalwa akubula bakede mumo, aalo maanda ayoobula bantu, ayalo nyika iyoosaalwa cakugambya.”—Amubale Isaya 6:8-11.

9. (a) Ino businsimi bwa Isaya ibujatikizya Jerusalemu bwakazuzikizyigwa lili? (b) Mbukkale buli buti ibuliko mazuba aano ibutondezya kuti tweelede kupakamana?

⁹ Isaya wakapegwa mulimo ooyu mumwaka wamamanino wabulelo bwa Mwami Uziya, naa cakuma 778 B.C.E. Wakazumanana amulimo wakwe wabusinsimi myaka iili 46 kusikila nowakainda mwaka wa 732 B.C.E., mubulelo bwa Mwami Hezekiya. Kwakacili myaka iili 125 kuti Jerusalemu anyonyoonwe mu 607 B.C.E. Aboobo, bantu ba Leza bakacenjezyegwa kakucili ciindi cinji kujatikizya icakali kuyakucitikila cisi cabo kumbele. Mazuba aano, Jehova wabacenjezya bantu bakwe  kakucili ciindi cinji kujatikizya zintu ziboola kumbele. Myaka iili 135, kuzwa ciindi magazini yakusaanguna ya Ngazi Yamulindizi noyakatalika kumwaigwa, magazini eeyi yakulwaizya babali kuti bacenjele nkaambo bweendelezi bwa Saatani bubyaabi buli aafwaafwi kumana akunjililwa busena a Bulelo bwa Myaka Iili Cuulu bwa Jesu Kristo.—Ciy. 20:1-3, 6.

10, 11. Nkuzuzikizyigwa kuli kwabusinsimi bwa Isaya nkobakalibonena bana Israyeli nobakacili mu Babuloni?

¹⁰ Ba Juda banji ibasyomeka ibakazumina kutolwa mubuzike ku Babuloni bakafwutuka ciindi Jerusalemu naakanyonyoonwa, mpoonya bakatolwa mubuzike ku Babuloni. (Jer. 27:11, 12) Nokwakainda myaka iili 70 kabacili mubuzike, bantu ba Leza bakabona kuzuzikizyigwa kugambya kwabusinsimi bwakuti: “Mbuboobu mbwaamba Jehova, Munununi wanu, Uusalala wa-Israyeli. Nkaambo kandinywe ncindatumina Babuloni. Njoobaselusya boonse kuti bacije.”—Is. 43:14.

¹¹ Kweelana ambokwakasinsimwa, cintu cimwi cipati ciyoosya cakacitika masiku kumatalikilo aamwezi wa October 539 B.C.E. Ciindi mwami wa Babuloni abasilutwe bakwe nobakali kunywa waini kubelesya nkapu zisalala nzyobakabweza mutempele ku Jerusalemu alimwi akukomba baleza babo ibakapangwa abantu, impi zyabana Mediya aba Persia zyakazunda Babuloni. Mumwaka wa 538 naa 537 B.C.E., sikuzunda Babuloni Koresi wakazumizya ba Juda kuti bapiluke ku Jerusalemu akuyakuyakulula tempele lya Leza. Zyoonse eezyi zyakaambidwe kale a Isaya, kubikkilizya acisyomezyo ca Jehova cakuti wakali kuyakubalanganya akubakwabilila bantu bakwe ibakeempwa ciindi nobakali kuyakupiluka ku Jerusalemu. Leza wakabaamba kuti “bantu mbendakalibumbila kuti banditembaule.” (Is. 43:21; 44:26-28) Kuzwa ciindi nobakali kuyakupiluka ku Jerusalemu akuyakulula tempele lya Jehova, bakaba bakamboni nkaambo Jehova, Leza mwini-mwini alikke, ulazuzikizya kufwumbwa ncaamba.

12, 13. (a) Mbaani bakabikkilizyigwa abana Israyeli mukubukulusyigwa kwabukombi bwa Jehova? (b) Ncinzi cilangilwa kuli ‘bambelele zimbi’ nobagwasyilizya “iba Isilayeli ba Leza,” alimwi ino bajisi bulangizi nzi?

¹² Bantu banji ibatakali bana Israyeli bakali akati kacisi cipya eeci, alimwi mukuya kwaciindi, bantu ibatakali ba Juda bakaba basandule. (Ezr. 2:58, 64, 65; Es. 8:17) Mazuba aano, “nkamu mpati” ‘yambelele zimbi’ zya Jesu igwasyilizya Banakristo bananike cakusyomeka, balo ibapanga ‘Isilayeli wa Leza.’ (Ciy. 7:9, 10; Joh. 10:16; Gal. 6:16) Bankamu mpati abalo balalibelesya izina lyakuti Bakamboni ba Jehova.

¹³ Mu Bulelo bwa Myaka Iili Cuulu bwa Kristo, bankamu mpati bayakukkomana citaambiki acoolwe cakwaambila bantu bayakubusyigwa  mbocakabede kuba Bakamboni ba Jehova mumazuba aakumamanino aabweende oobu bwazintu. Eeci inga cacitika lilikke kuti twapona kweelana azina lyesu alimwi akusoleka kuzumanana kusalala. Noliba leelyo notusola kucita boobo, tweelede kuzumanana kulomba kulekelelwa abuzuba, kuzyiba kuti tuli basizibi alimwi akuzyiba kuti ncoolwe citaliboteli kwiitwa azina lya Leza lisalala.—Amubale 1 Johane 1:8, 9.

14. Ino izina lyakuti Jehova lyaamba nzi?

¹⁴ Kutegwa tube bantu batondezya kulumba kucoolwe cakwiitwa azina lya Leza, ncibotu kuti tuzinzibale kuyeeya kujatikizya ncolyaamba izina eeli. Izina lya Leza kanji-kanji ilisandululwa kuti “Jehova,” lizwa kubbala lya Chihebrayo ilikonzya kwaamba kucita cintu cimwi alimwi lilakonzya kusandululwa kuti “kupa kuti kube.” Aboobo, izina lyakuti Jehova lizibidwe kuti lyaamba “Uupa Kuti Kube.” Bupanduluzi oobu buli mweelede Jehova mbwali Mulengi wabubumbo boonse bulibonya kubikkilizya abantu alimwi azilenge zyamuuya alimwi ngu Sikuzuzikizya makanze aakwe. Zintu mboziyaabuyubununwa, wazumanana kupa kuti kuyanda kwakwe kucitike alimwi akupa kuti makanze aakwe alibonye nokuba kuti kuli basikukazya, mbuli Saatani, balo basola kulesya kuti kuyanda kwa Leza kutacitiki.

15. Muunzila nzi Jehova mwaakatondezya bube bwakwe bumwi kweelana ancolyaamba zina lyakwe? (Amubone kabbokesi kakuti “ Izina Lijisi Bupanduluzi.”)

¹⁵ Ciindi naakalailila Musa kusololela bana Israyeli kuzwa mu Egepita, Jehova wakatondezya bube bwakwe bumwi bujatikizya nguwe ciindi naakalyaamba lwakwe mwini. Bbaibbele lyaamba kuti: “Mpawo Leza wakaambila Musa kuti, Ndime Uuliwo Lyoonse. Wakati, Mbuboobu mboelede kwaambila bana ba-Israyeli. Ndime ngowakandituma kulindinywe.” (Kul. 3:14) Aboobo, kufwumbwa mubukkale buli buti, Jehova uyakupa kuti kube kufwumbwa ciyandika kutegwa azuzikizye makanze aakwe. Kubana Israyeli balo ibakali bazike aciindi cimwi, wakatondezya kuti ngu Sikufwutula, Sikukwabilila, Sikusololela, alimwi a Sikupa Ziyandika, walo wakakkutya zintu zyakumubili azyakumuuya nzyobakali kuyandika.

16, 17. (a) Mbuti mbotukonzya kutondezya kulumba kucoolwe ncotujisi cakwiitwa azina lya Leza? (b) Ncinzi ncotuyakulanga-langa mucibalo citobela?

¹⁶ Mazuba aano, Jehova wazumanana kucita kweelana ancolyaamba zina lyakwe kwiinda mukukkutya nzyotuyandika kumubili akumuuya. Kaambo akamwi nkakuti, izina lya Leza talyaambi buyo ncapa kuti cibe. Lilabikkilizya ncapa kuti cicitike kujatikizya mulimo wa Bakamboni bakwe mukuzuzikizya makanze aakwe. Kuzinzibala kuyeeya kujatikizya zina eeli, kuyakutupa kuti tuzumanane kupona kweelana ancolyaamba zina lyakwe. Ba Kåre balo bajisi myaka yakuzyalwa iili 84, balo ibali Bakamboni basungu mucisi ca Norway kwamyaka iili 70 yainda, bakaamba kuti: “Ndilimvwa kuti ncoolwe cipati kubelekela Jehova, Mwami walyoonse alyoonse, alimwi akuba akati kabantu baitwa azina lyakwe lisalala. Ncoolwe cipati kukambauka kasimpe kamu Bbaibbele alimwi akubona bantu kabakamvwisya akukkomana. Mucikozyanyo, cindipa kukkutila ciindi nondiyiisya bantu mbocibeleka cinunuzyo ca Kristo alimwi ambobakonzya kujana buumi butamani munyika mpya ya Leza yaluumuno kwiinda mucinunuzyo.”

¹⁷ Masimpe, muzilawo zimwi ciyaabwiindila kukatazya kujana bantu bayanda kwiiya zya Leza. Nokuba boobo, mbuli ba Kåre, sena tamukkomani kapati ciindi nomwajana muntu uuswiilila akumuyiisya kujatikizya zina lya Jehova? Pele mbuti mbotukonzya kuba Bakamboni ba Jehova aciindi nciconya akuba bakamboni ba Jesu? Mubuzyo ooyu uyakulangwa-langwa mucibalo citobela.