Amube Acilongwe A Leza

Ciindi Leza Nalekelela, Sena Ulaluba?

BWIINGUZI mbwakuti inzya. Kulibaabo mbayanda Jehova, waamba kuti: “Nzoobalekelela milandu yabo, azyalo zibi zyabo nsikoozooziibalukwa limbi.” (Jeremiya 31:34) Aboobo, Jehova utusyomezya kuti ulabalekelela basizibi beempwa, alimwi ulaziluba zibi zyabo zyoonse. Pele sena eeci caamba kuti Mulengi wabubumbo boonse takonzyi kuziyeeya ncobeni zibi nzyaakalekelela? Majwi aa Ezekiele alatugwasya kumvwisya mbuli Leza mbwalekelela alimwi akuluba.—Amubale Ezekiele 18:19-22.

Kwiinda mumusinsimi Ezekiele, Jehova wakaambide kuti uyoobabeteka ba Juda ibakali kukkala mu Jerusalemu ibatakali kusyomeka. Cisi coonse cakaleka kukomba Jehova alimwi cakazuzya nkondo munyika yoonse. Jehova wakaambilalimwi kuti munzi wa Jerusalemu uyoonyonyoonwa abana Babuloni. Pele ciindi naakali kubaambila kujatikizya lubeta, Jehova wakabapa mulumbe uujisi bulangizi. Muntu umwi aumwi wakeelede kulisalila; wakali kuyoobetekwa kweelana amicito yakwe.—Tupango 19, 20.

Pele ino mbuti kuti umwi waleka micito mibi akutalika kucita zibotu? Jehova wakaamba kuti: “Pele sizibi, na waleka zibi zyakwe zyoonse nzyaakacita, na watalika kubamba imbeta zyangu akubeteka kabotu akucita bululami, ncobeni uyoopona, takooyoofwa pe.” (Kapango 21) Masimpe, Jehova ‘wakalilibambilide kulekelela’ sizibi wakaleka nzila zyakwe zibyaabi akutondezya kweempwa.—Intembauzyo 86:5.

Pele ino mbuti kujatikizya zibi nzyaakacita? Jehova upandulula kuti: “Zibi zyakwe zyoonse nzyaakacita tazikooyooyeeyegwa limbi.” (Kapango 22) Amubone kuti zibi zyamuntu weempwa “tazikooyooyeeyegwa limbi.” Nkaambo nzi eeci ncociyandika?

Mu Bbaibbele, ibbala lya Chihebrayo lisandulwidwe kuti “kuyeeya” lilakonzya kwaamba zinji, ikutali buyo kuyeeya zyintu izyakacitika musyule. Kujatikizya ibbala eeli bbuku limwi lyaamba kuti: “Mubwini, kanji-kanji lyaamba kucita cimwi cintu naa lilajanika antoomwe amabala aamba kucita cimwi cintu.” Aboobo, “kuyeeya” kulakonzya kwaamba “kucita cimwi cintu.” Nkokuti ciindi Jehova naambila muntu iwakacita cibi akweempwa kuti zibi zyakwe “tazikooyooyeeyegwa limbi,” waamba kuti takabwezi ntaamu kumuntu ooyo akaambo kazibi eezyo, kwiinda mukumupa mulandu naa kumusubula. *

Munzila iikulwaizya lugwalo lwa Ezekiele 18:21, 22 lutondezya mbokumaninide kulekelela kwa Leza. Ciindi Jehova nalekelela zibi zyesu, takatupi mulandu kumbele kujatikizya zibi eezyo. Muciindi caboobo, uzisowela kusyule lyakwe zibi zyabaabo beempwa. (Isaya 38:17) Cili mbuli kumwaya zyintu zijatikizya zibi eezyo.—Milimo 3:19.

Mbotuli bantu batalondokede, tuyandika luzyalo lwa Leza. Kayi ziindi zinji tulabisya. (Baloma 3:23) Pele Jehova uyanda kuti tuzyibe kuti ulilibambilide kutulekelela ikuti naa tweempwa ncobeni. Alimwi kuti naa walekelela, ulaluba—nkokuti, takatupi mulandu naa kutusubula akaambo kazibi nzyaakatulekelela kale. Eelo kaka eeci cilaumbulizya! Sena luzyalo lwa Leza lulamukulwaizya kuyanda kuba acilongwe anguwe?

[Bupanduluzi buyungizidwe]