Amwiiye Ncolyaamba jwi lya Leza

Ino Ncinzi Ciyakucitika Mubuzuba Bwalubeta?

Cibalo eeci cili amibuzyo imwi ambweni njomwakalibuzyide kale alimwi cilatondezya nkomukonzya kubujana bwiinguzi mu Bbaibbele lyanu. Bakamboni ba Jehova bayookkomana kubandika andinywe bwiinguzi kumibuzyo eeyi.

1. Ino Buzuba Bwalubeta Ninzi?

Mbuli mbokutondezyedwe acifwanikiso cili kululyo, bantu banji bayeeya kuti Mubuzuba Bwalubeta, mabbiliyoni aabantu bayakuletwa kumbele lyacuuno ca Leza kutegwa bakabetekwe kweelana amicito njobakali kucita kaindi—bamwi kupegwa bulumbu bwakuba abuumi bwakujulu, bamwi kuti bakasubulwe mumulilo wahelo. Nokuba boobo, Bbaibbele litondezya kuti makanze Aabuzuba Bwalubeta ngakufwutula bantu kukutalulama. (Intembauzyo 96:13) Leza wakasala Jesu kuba Mubetesi uutikalete bululami kubantu boonse.—Amubale Isaya 11:1-5; Milimo 17:31.

2. Ino Buzuba Bwalubeta buyakubuleta buti bululami?

Ciindi muntu wakusaanguna Adamu naakabisya acaali, wakapa kuti bana bakwe boonse babisye, kabapenga alimwi akufwa. (Baloma 5:12) Kutegwa akalulamike kutalulama ooku, Jesu uyakubusya mabbiliyoni aabantu bafwide. Ibbuku lya Ciyubunuzyo lyaamba kuti eeci ciyakucitika ciindi Jesu anakulela mumyaka iili cuulu.—Amubale Ciyubunuzyo 20:4, 11, 12.

Aabo batiikabusyigwe bayakubetekwa, kuleka azyintu nzyobakali kucita kabatanafwa, pele azyintu nzyobayoocita ciindi izili ‘mumabbuku aakuvwunga’ aambidwe mulugwalo lwa Ciyubunuzyo caandaano 20 zyaakuyubununwa. (Baloma 6:7) Mwaapostolo Paulo wakaamba kuti, akati kabantu ibatiikabusyigwe akupegwa coolwe cakwiiya kujatikizya Leza mbabaabo ‘baluleme abataluleme.’—Amubale Milimo 24:15.

  3. Ino Buzuba Bwalubeta buyakuzuzikizya nzi?

Aabo bakafwa kakunyina kumuzyiba Jehova Leza alimwi akumubelekela bayakupegwa coolwe cakucinca akucita zibotu. Kuti bakacite oobo, bubuke bwabo buyakuba ‘bubuke bwabuumi.’ Nokuba boobo, bantu bamwi batiikabusyigwe tabakayandi kwiiya nzila zya Jehova. Bubuke bwabo buyakuba ‘bubuke bwalubeta.’—Amubale Johane 5:28, 29; Isaya 26:10; 65:20.

Myaka iili cuulu yaakumana ya Buzuba Bwalubeta, Jehova uyakubabambulula bantu bamumvwida kuba mbuli mbobakabede mumakanze aakwe aakusaanguna. (1 Bakolinto 15:24-28) Eelo kaka tabuliboteli bulangizi oobu kubantu boonse aabo bamvwida! Musunko lyamamanino, Leza uyakumwaangununa Saatani Diabolosi kuzwa mumulindi uutagoli, mwaakangidwe kwamyaka iili cuulu. Saatani alimwi uyakusola kuzandula bantu kuli Jehova, pele aabo bayakumukaka Saatani bayakukkomana kuba abuumi butamani anyika kukabe kutamani.—Amubale Isaya 25:8; Ciyubunuzyo 20:7-9.

4. Ino mbuzuba nzi bumbi bwalubeta buyakuleta bubotu kubantu?

Bbaibbele alimwi libelesya bbala lyakuti “buzuba bwalubeta lwa Leza” kwaamba zyintu ziyakuleta mamanino abweende bwazyintu. Buzuba bwalubeta oobu buyakuboola cakutayeeyelwa mbuli Zambangulwe lyamuciindi ca Nowa, lyakanyonyoona zyalani lyoonse lyabasizibi. Cikkomanisya ncakuti, “lunyonyooko lwabantu basampaula Leza” luyakupa kuti ‘kukabe bululami.’—Amubale 2 Petulo 3:6, 7, 13.

Kutegwa muzyibe zinji, amubone mapeeji 213-215 mubbuku eeli lya Ino Ncinzi Cini Bbaibbele Ncoliyiisya? lyakamwaigwa a Bakamboni ba Jehova.

[Cifwanikiso icili apeeji 16]

“The Last Judgement,” Lyakalembwa aba Gustave Doré, 1832-1883

[Kulumba]

Zyakazekaulwa aba Doré