Jesu—Njenzila Yakujana Buumi Bukkomanisya

SENA ncobeni Jesu wakapona buumi bukkomanisya? Cakutadooneka, wakakomenena mumukwasyi watakavwubide, alimwi kunyina naakajisi zyintu zinji zyakumubili mubuumi bwakwe boonse. Kunyina ‘naakajisi aakooneka mutwe wakwe.’ (Luka 9:57,58) Kuyungizya waawo, wakasulaikwa, wabejelezyegwa, alimwi kumamanino basinkondonyina bakamujaya.

Mulakonzya kuyeeya kuti, ‘Buumi buli boobu tandiyeeyi kuti bulakkomanisya!’ Pele kuli twaambo tunji tujatikizya buumi bwa Jesu ntotweelede kulanga-langa. Atulange-lange mbazu zyone zyabuumi bwakwe.

1. JESU WAKAJISI MAKANZE MUBUUMI—KUCITA KUYANDA KWA LEZA.

“Cakulya cangu nkucita kuyanda kwayooyo wakandituma.”—Johane 4:34.

Kwiinda mumajwi alimwi amumilimo yakwe, Jesu wakali kuyanda kuzuzikizya kuyanda kwa Usyi wakujulu, Jehova. * Jesu wakajana lukkomano lunji mukucita kuyanda kwa Leza. Mane wakeezyanisya kucita oobo kucakulya, kweelana ambokutondezyedwe mulugwalo lwazubululwa atala aawa. Amubone bukkale mbobwakabede ciindi naakaamba boobo.

Jesu wakaamba majwi aayo ciindi camasikati. (Johane 4:6) Kuzwa mafwumofwumo wakeenda mumalundu aaku Samariya, aboobo tacidoonekwi kuti wakafwide nzala. Mane basikwiiya bakwe bakamwaambila kuti: “Labbi, kolya.” (Johane 4:31) Kwiinda mubwiinguzi bwakwe, Jesu wakatondezya kuti wakalimvwa kuyumizyigwa kwiinda mukucita mulimo wa Leza. Sena eeco tacilimvwisyi kuti wakali muntu wakapona buumi bukkomanisya?

2. JESU WAKALI KUBAYANDA KAPATI BAUSYI.

“Ndilamuyanda Taata.”—Johane 14:31.

Jesu wakajisi cilongwe ciyumu kapati a Bausyi kujulu. Luyando ndwaakajisi Jesu kuli Leza lwakamukulwaizya kwaambila bantu kujatikizya zyina lya Bausyi, makanze aabo, alimwi abube mbobajisi. Kwiinda mumajwi aakwe, milimo yakwe, alimwi abube bwakwe, Jesu wakatondezya cakulondoka bube bwa Bausyi—cakuti ciindi notubala kujatikizya Jesu, cili mbuli kuti tubala makani aajatikizya Bausyi. Aboobo, ciindi Filipo naakalomba Jesu kuti: “Kotutondezya Bauso,” Jesu wakaingula kuti: “Ooyo wandibona wamubona awalo Taata.”—Johane 14:8,9.

Jesu wakali kubayanda kapati Bausyi cakuti wakalilisungwide kufwa akaambo kakubamvwida. (Bafilipi 2:7,8; 1Johane 5:3) Luyando luyumu boobu Jesu  ndwaakajisi kuli Leza lwakapa kuti buumi bwakwe bube aampindu.

3. JESU WAKALI KUBAYANDA BANTU.

“Kunyina uujisi luyando lwiinda loolu, cakuti muntu umwi atuulile beenzinyina buumi bwakwe.”—Johane 15:13.

Akaambo kakuti tuli bantu batalondokede, bulangizi bwesu bwakumbele tabukkomanisyi pe. Bbaibbele lyaamba kuti: “Kwiinda mumuntu omwe [Adamu] alufwu kwiinda mucibi, eelyo lufwu lwakasikila bantu boonse nkaambo boonse bakabisya.” (Baloma 5:12) Lwesu tobeni tatukonzyi kuleya penzi liboola akaambo kacibi, nkokuti lufwu.—Baloma 6:23.

Mucoolwe, Jehova, kwiinda muluyando lwakwe wakabikka nzila yakunununa bantu. Wakazumizya Mwanaakwe uulondokede alimwi uutakwe cibi, Jesu, kuti apenge akufwa kutegwa ape cinunuzyo cakali kuyandika kunununa bantu kubuzike bwacibi alufwu. Akaambo kaluyando ndwaakajisi kuli Bausyi alimwi abantu, Jesu mukuliyandila wakazumina kwaaba buumi bwakwe bulondokede akaambo kandiswe. (Baloma 5:6-8) Luyando luli boobu lwakapa kuti buumi bwakwe bube aampindu. *

4. JESU WAKALIZYI KUTI BAUSYI BAKALI KUMUYANDA ALIMWI AKUMUKKOMANINA.

“Ooyu Mwanaangu, ngweyandisya, ngwekkomanina.”—Matayo 3:17.

Jehova wakaamba majwi aaya kuzwa kujulu ciindi Jesu naakali kubbapatizyigwa. Aboobo, caantangalala Jehova wakatondezya mbwamuyanda alimwi ambwamukkomanina Jesu, Mwanaakwe. Nkakaambo kaako cakusinizya Jesu wakali kukonzya kwaamba kuti: ‘Taata ulandiyanda’! (Johane 10:17) Kuzyiba kuti Bausyi bakali kumuyanda akumukkomanina, Jesu wakaliyumya ciindi naakali kukazyigwa alimwi akupenzyegwa. Eeci cakamugwasya kuti abe sicamba alimwi aliyumye naakali kulangila kujaigwa. (Johane 10:18) Kuzyiba kuti Bausyi bakali kumuyanda alimwi akumukkomanina kwakapa kuti Jesu apone buumi bukkomanisya.

Masimpe Jesu wakapona buumi bukkomanisya. Cakutadooneka, tulakonzya kwiiya zinji kulinguwe kujatikizya mbotukonzya kupona buumi bukkomanisya ncobeni. Mucibalo citobela tulalanga-langa lulayo lumwi lugwasya, Jesu ndwaakaambila basikumutobela kujatikizya mbobeelede kupona.

[Bupanduluzi buyungizidwe]