AMWIIYE LUSYOMO LWABO

‘Wakali Kweenda a Leza Wakasimpe’

AMWEEZYEEZYE kuti Nowa ulalyoolola, akuti ulikkede acipulanga cipati kalyookezya kumulimo wakwe kumwi kalangilila bwato bupati buli mukuyakwa. Kulimvwisya kanunko kataala, alimwi acoongo cakufwala mapulanga. Abusena mpakkede, Nowa ulibabwene bana bakwe kababeleka canguzu muzibeela ziindene-indene zyacibbokesi cipati camapulanga. Bana bakwe abamakaintu babo, alimwi amukaintu wakwe uuyandwa kapati bali kubelekela antoomwe mulimo ooyu kwamyaka minji. Bakamanizya cibeela cimwi cabwato, pele kwakacili mulimo mupati wakeelede kucitwa kutegwa bamane kuyaka bwato.

Bantu bamucilawo eeco bakali kuyeeya kuti Nowa amukwasyi wakwe mbafwubafwuba. Ciindi Nowa abana bakwe nibakali kuyaka bwato, bantu bakali kuseka kuyeeya makani ngaakali kwaamba aakuti kuyooba zambangulwe munyika yoonse. Ntenda Nowa njaakali kubacenjezya bantu yakali kuboneka kuba cintu citakonzyi kucitika. Cakabakatazya kumvwisya kuti muntu inga wasowa ciindi cakwe—acamukwasyi wakwe kubeleka mulimo ooyu wabufwubafwuba. Nokuba boobo, Jehova, Leza wa Nowa, wakabona mwaalumi ooyu munzila iindene.

Ijwi lya Leza lyaamba kuti: “Nowa wakali kweenda a-Leza.” (Matalikilo 6:9) Ino eeci cakali kupandulula nzi? Tiicakali kupandulula kuti Leza wakeenda anyika, naa kuti Nowa wakaunkide kujulu. Muciindi caboobo, Nowa wakamumvwida Leza wakwe alimwi akumuyanda kapati cakuti cakali mbuli kuti walo a Jehova bali kweenda antoomwe mbuli balongwe. Nokwakainda zyuulu zyamyaka, Ibbaibbele lyakaamba Nowa kuti: ‘Kwiinda mulusyomo lwakwe wakaipa mulandu nyika.’ (Bahebulayo 11:7) Ino wakacita buti oobo? Ncinzi ncotukonzya kwiiya kulusyomo lwakwe mazuba aano?

MUNTU UUNYINA KAMPENDA MUNYIKA MBYAABI

Nowa wakakomenena munyika yakali kuyaabwiindila buya kubija. Yakali mbyaabi kuzwa kuciindi ca Enoki, syaanyinakulu, muntu aumwi wakaluleme alimwi iwakeenda a Leza. Enoki wakasinsimide kuti kuyooboola buzuba bwalubeta kubantu babyaabi boonse baanyika. Lino, muciindi ca Nowa bubi bwakaindila. Kweelana ambwazilanga zyintu Jehova, nyika yakali kunyonyookede nkaambo yakazwide lunya. (Matalikilo 5:22; 6:11; Juda 14, 15) Ino ncinzi cakapa kuti zyintu zibije boobu?

Mapenzi aataambiki akatalikila akati kabana ba Leza bamuuya, ibangelo. Umwi wambabo wakalimuzangilide kale Jehova, akuba Saatani Diabolosi kwiinda mukubejekezya Leza alimwi akoongelezya ba Adamu a Eva kucibi. Mumazuba aa Nowa, abamwi bangelo bakamuzangila Jehova. Bakasiya mulimo wabo kujulu, bakaboola anyika akuba muciimo cabantu, mpoonya bakabweza bamakaintu babotu kuba bamakaintu babo. Aaba bangelo basikulisumpula, bakabayunga bantu kuti batalike kucita zyintu zibi.—Matalikilo 3:1-5; 6:1, 2; Juda 6, 7.

Kuyungizya waawo, akaambo kakuti bangelo bakakwata bamakaintu bantunsi cakapa kuti bazyale bana bajisi nguzu zitaambiki. Ibbaibbele libaamba kuti babbabbani, ibbala lipandulula “Basikuusya”—aabo bakali kuusya bantu ansi kwiinda mukubauma. Ibabbabbani bakali basilunya aboobo bakapa kuti bukkale bwamunyika bwiindile kubija. Aboobo tacigambyi kuti Mulengi wakabona “kuti bubi bwa bantu baansi bulayoosya, amiyeeyo yoonse bantu nibayeeya mumyoyo yabo mibi luzutu mazuba oonse.” Jehova wakabona kuti cakali kuyandika kubanyonyoona bantu babyaabi mumyaka iili 120.—Matalikilo 6:3-5.

 Amweezyeezye buyo mbocakali kukatazya kukomezya bana munyika iili boobu! Pele Nowa wakacita oobo. Wakajana mukaintu uuli kabotu. Nowa naakakkwanya myaka yakuzyalwa iili 500, mukaintu wakwe wakamuzyalila bana basankwa botatwe—Semu, Hamu, alimwi a Jafeti. * Bazyali boonse antoomwe bakeelede kubakwabilila bana babo basankwa kutegwa batayungwi amuuya mubyaabi wakabazingulukide. Kanji-kanji bana basyoonto balagambwa akubanyomenena bantu “basinguzu” alimwi “basimpuwo”—aboobo bana ba Nowa beelede kuti bakali kubagambwa akubanyomenena Babbabbani. Tiicakali cuuba-uba kuli Nowa amukaintu wakwe kubakwabilila bana babo kuzyintu zyoonse nzyobakali kucita babbabbani aabo, pele bakali kukonzya kubayiisya kasimpe kajatikizya Jehova Leza, walo uusulaika bubi boonse. Bakeelede kugwasya bana babo kubona kuti Jehova wakacimwa akaambo kalunya alimwi abuzangi bwabantu munyika.—Matalikilo 6:6.

Mazuba aano, bazyali balakonzya kumweetelela Nowa amukaintu wakwe. Mbubwenya buyo ayalo nyika yesu izwide lunya alimwi abuzangi. Noziba zyintu zyakulikondelezya izibambilwa bana inga kazikulwaizya lunya alimwi abuzangi. Bazyali basongo balasolekesya kukwabilila bana babo kukuyungwa kuli boobu kwiinda mukubayiisya kujatikizya Jehova, Leza waluumuno, walo uuyoomanizya bubi boonse. (Intembauzyo 11:5; 37:10, 11) Nomuba munyika mbyaabi, bana balakonzya kwiiya kucita cintu ciluzi. Nowa alimwi amukaintu wakwe bakacikonzya. Bana babo bakakomena kabali bantu bali kabotu, alimwi akukwata bamakaintu abalo bakalisungwide kubikka Leza wakasimpe, Jehova, mubusena butaanzi mubuumi bwabo.

“KOLIPANGILA BWAATO”

Bumwi buzuba, buumi bwa Nowa bwakacinca kucincilalimwi. Jehova wakabandika kumubelesi ooyu uuyandwa akumwaambila makanze aakwe aakunyonyoona nyika yakuciindi eeco. Leza wakalailila Nowa kuti: “Kolipangila bwaato bwazisamu zyagofa.”—Matalikilo 6:14.

Bwato oobu tiibwakali mbuli mato aamazuba aano kweelana ambobayeeya bamwi. Bwakali mbuli bbokesi, nkuti buyo abwalo bwakali kukonzya kwiibauka ameenda. Cakali cibbokesi cipati. Jehova wakaambila Nowa nsaizi yabwato iigaminide, malailile aajatikizya mbobwakeelede kupangwa, alimwi akuti bumatwe ataala mukati akunze. Alimwi wakaambila Nowa kaambo ncaakamulailila kucita boobo naakati: “Lino mebo ndaleta izambangulwe lyamaanzi ansi . . . Boonse buyo bali munyika bayoo[nyonyooka].” Nokuba boobo, Jehova wakapa malailile kuli Nowa naakati: “Aboobo uyoonjila mubwaato, webo abana bako amukaako abamukabana bako.” Alimwi Nowa wakeelede kuleta banyama bamisyobo misyobo. Balikke aabo bakanjila mubwato mbobakali kukonzya kufwutuka.—Matalikilo 6:17-20.

Nowa wakajisi mulimo mupati kapati. Bwato oobu bwakeelede kuti kabuli bupati—mamita aali 133 mubulamfwu, 22 mubufwaafwi, alimwi aali 13 kuya mujulu. Bwakali bupati kapati kwiinda amato aamazuba aano aamulwizi apangidwe aazisamu. Sena Nowa wakatolwaala kuubeleka mulimo ooyu, kutongooka kujatikizya buyumuyumu bwakaliko kumulimo ooyu, naa kutatobela malailile aamwi kutegwa umuubile-ubile? Bbaibbele liingula kuti: “Nowa wakacita obo. Wakacita  mbubonya mbuli Leza mbwaakamulailila.”—Matalikilo 6:22.

Mulimo wakatola myaka minji, ambweni myaka iili 40 naa 50. Kwakali zisamu zyakeelede kugonkwa, kukwelwa, alimwi akwaandula mapulanga, kwaafwala, alimwi akwaaswaanganya antoomwe. Bwato bwakeelede kuba amaanda otatwe kuya mujulu, zibeela-beela zinji, alimwi amulyango mukati. Cakutadooneka, kwakali mawindo mumbali alimwi aciluli icakanyamukide mpocili akati kutegwa meenda kaaselemukila ansi.—Matalikilo 6:14-16.

Mukuya kwamyaka alimwi abwato nibwakali kuyaabumana kuyakwa, kweelede kuti Nowa wakalikkomene akaambo kakugwasyilizyigwa abamukwasyi wakwe. Kwakali mulimo umbi uulangilwa kuti wakali kukatazya kapati kwiinda wakuyaka bwato. Ibbaibbele litwaambila kuti Nowa wakali “mukambausi wabululami.” (2 Petulo 2:5) Aboobo, cabusicamba wakali kucenjezya bantu babyaabi aabo kujatikizya lunyonyooko lwakali kuboola. Ino bantu bakacita buti? Jesu Kristo wakaciyeeya ciindi eeco akwaamba kuti bantu aaba “tiibakabikkila maano.” Wakaamba kuti bakajisi bubi azyintu zyabuumi zyabuzuba abuzuba—kulya, kunywa, alimwi akukwata naa kukwatwa—cakuti tiibakazibikkila maano anzyaakali kwaamba Nowa. (Matayo 24:37-39) Cakutadooneka, bantu banji bakamusampaula Nowa amukwasyi wakwe; ambweni bamwi bakali kumukonga alimwi akumukazya cabukali.

Pele Nowa amukwasyi wakwe kunyina nibakaleka. Nokuba kuti bakali kukkala abantu ibakali kubikkila maano kapati kuzyintu zyakumubili, akuyeeya kuti kuyaka bwato wakali mulimo uutayandiki, alimwi wabufwubafwuba, bakazumanana kuubeleka mulimo cakusyomeka. Aboobo, mazuba aano mikwasyi ya Banakristo ilakonzya kwiiya lusyomo lwa Nowa amukwasyi wakwe. Alimwi kayi tupona muciindi Bbaibbele ncolyaamba kuti “kumazuba aamamanino” aabweende oobu bwanyika. (2 Timoteyo 3:1) Jesu wakaamba kuti ciindi cesu ciyooba mbubonya mbuli ciindi Nowa naakali kuyaka bwato. Kuti bantu baukaka mulumbe uujatikizya Bwami bwa Leza kwiinda mukutabikkila maano, kubasampaula, naa kubapenzya, Banakristo beelede kuyeeya Nowa. Tabali bakusaanguna kujana buyumuyumu buli boobu.

“NJILA MUBWAATO”

Nokwakainda myaka minji, bwato bwakali kuyaabumana kuyakwa. Ciindi Nowa naakali afwaafwi kukkwanya myaka iili 600 yakuzyalwa, wakafwidwa bayandwa bakwe. Bausyi Nowa, ba Lameki, bakafwa. * Nikwakainda myaka yosanwe, basyaanyinakulu Nowa, bausyi ba Lameki, ba Metusela bakafwa kabajisi myaka iili 969—mbobakapona myaka minji anyika akati kabantu boonse baambwa mu Bbaibbele. (Matalikilo 5:27) Metusela alimwi a Lameki bakapona ciindi comwe amuntu wakusaanguna, Adamu.

Mumwaka nguwenya ooyo, Nowa wakatambula mulumbe mupya kuzwa kuli Jehova Leza wakuti: “Njila mubwaato, webo abeŋanda bako boonse.” Aciindi nciconya eeco, Leza wakaambila Nowa kuti abikkilizye abanyama bamisyobo yoonse mubwato—banyama basalala ibeelela kutuulwa, ibali musanu ababili musyobo umwi aumwi, alimwi banyama bamwi boonse kabali bobilo-bobilo.—Matalikilo 7:1-3.

Kweelede kuti wakali mulimo uutalubiki. Myaanda myaanda yabanyama bakaboola kabeenda, kabauluka, kabayavwula—boonse kabaindene-indene misyobo, nsaizi alimwi banyama bamwi kabali bakali kwiinda bamwi. Nowa taakwe naakabasungilizya banyama kutegwa banjile mubwato. Cibalo caamba kuti ‘bakanjila mubwaato kuli-Nowa.’—Matalikilo 7:9.

Basikudooneka bamwi balakonzya kubuzya kuti: ‘Ino cintu cili boobu cakali kukonzyeka buti kucitika?’ Ino banyama aaba bakacikonzya buti kukkala caluumuno mubusena busyoonto?’ Amuciyeeyele buyo eeci: Sena Mulengi wabubumbo boonse inga camwaalila  kweendelezya banyama mbaakalenga, naa kubapa kuti baleke kuyoowa bantu kuti kakuyandika? Kamuyeeya kuti, Jehova ngu Leza wakaandaanya Lwizi Lusalala alimwi akwiimika zuba. Sena naakaalilwa kucita zyintu zyoonse zyaambidwe mucibalo caamba kujatikizya Nowa? Peepe, naatakaalilwa.

Masimpe ngakuti, Leza naakasala nzila iimwi kutegwa afwutule banyama bakwe. Nokuba boobo, cabusongo wakasala kubelesya nzila iituyeezya mulimo ngwaakapede bantu wakulanganya banyama boonse bapona anyika. (Matalikilo 1:28) Aboobo, bazyali banji mazuba aano balaabelesya makani aa Nowa kuyiisya bana babo kuti Jehova ulabayanda banyama alimwi abantu mbaakalenga.

Jehova wakaambila Nowa kuti Zambangulwe lyakali kuyooboola kwainda nsondo yomwe buyo. Kweelede kuti mukwasyi wakajata bubi aciindi eeci. Amuyeeye buyo mulimo wakuyobolola banyama boonse azyakulya zyabo alimwi akunyamuna zyintu zyamukwasyi kuzibikka mubwato. Kulangilwa kuti mukaintu wa Nowa antoomwe amukaintu wa Semu, Hamu, alimwi a Jafeti bakajisi bubi kupanga busena bubotu bwakukkala mubwato.

Ino bantu bakabazingulukide bakacita buti? “Tiibakabikkila maano”—nokuba kuti kwakali bumboni bwakali kutondezya kuti Jehova wakamulongezya Nowa alimwi amulimo wakwe. Bakababona banyama kabanjila mubwato. Pele tatweelede kugambwa akaambo kakuti tiibakabikkila maano. Mazuba aano, mbubwenya buyo bantu tababikkili maano kubumboni butondezya kuti lino tupona kumazuba aamamanino aabweende oobu bwazyintu. Alimwi kweelana amwaapostolo Petulo mbwaakasinsima, basikasampusampu baboola akusampaula kwabo, ikufwubaazya baabo batobela kucenjezya kwa Leza. (2 Petulo 3:3-6) Mbubwenya buyo, bantu bakamusampaula Nowa amukwasyi wakwe.

Ino kusampaulwa ooku kwakamana lili? Cibalo citwaambila kuti ciindi Nowa naakanjila mubwato antoomwe amukwasyi wakwe alimwi abanyama, “Jehova wakamujalila.” Ikuti basikusampaula bakali aafwaafwi, tacidoonekwi kuti ntaamu eeyo njaakabweza Leza yakapa kuti baleke kusampaula. Ikuti naa pe, nkokuti ciindi mvwula niyakaboola bakacileka kusampaula. Alimwi yakazumanana kuwa kusikila meenda apaya munyika yoonse mbubwenya mbwaakaamba Jehova.—Matalikilo 7:16-21.

Sena Jehova wakakondwa akaambo kalufwu lwabasizibi aabo? Peepe! (Ezekiele 33:11) Mukwiimpana, wakalibapede coolwe cakuti bacince bukkale bwabo kutegwa bacite zili kabotu. Sena bakali kukonzya kucinca? Zyaakacita Nowa zilawiingula mubuzyo ooyu. Kwiinda mukweenda a Jehova, kumvwida Leza wakwe muzyintu zyoonse, Nowa wakatondezya kuti lufwutuko lwakali kukonzyeka. Munzila eeyi, kwiinda mulusyomo lwakwe wakaipa mulandu nyika yamuciindi cakwe; wakatondezya kuti cakali kukonzyeka kupona buumi bukkomanisya Leza. Lusyomo lwakwe lwakapa kuti afwutuke antoomwe amukwasyi wakwe. Kuti mwaiya lusyomo lwa Nowa, anywebo inga mwalifwutula nobeni abaabo mbomuyanda. Mbubwenya mbuli Nowa, mulakonzya kweenda a Jehova Leza mbuli mulongwe wanu. Alimwi cilongwe canu inga cazumanana mane kukabe kutamani!

[Bupanduluzi buyungizidwe]

[Cifwanikiso icili apeeji 12]

[Cifwanikiso icili apeeji 13]

Nowa amukaintu wakwe bakeelede kukwabilila bana babo kukuyungwa kubyaabi

[Cifwanikiso icili apeeji 14 a 15]

Nokuba kuti kwakali bumboni bwakali kutondezya kuti Leza wakamulongezya Nowa, bantu bakazumanana kumusampaula alimwi akutaubikkila maano mulumbe wakwe