Ino Twakazwa Kuli?

Mubufwaafwi, bbuku lyakusaanguna mu Bbaibbele lya Matalikilo, lilaamba kujatikizya mbobwakatalika bubumbo: “Kumatalikilo Leza wakalenga ijulu anyika.” (Matalikilo 1:1) Leza naakamana kulenga zisyango alimwi abanyama, wakalenga bantu bakusaanguna, ba Adamu a Eva. Bakaliindene abanyama nkaambo bakali kukonzya kutondezya bube bwa Leza kubikkilizya anguzu zyakulisalila. Aboobo, bakali kuyoolyaambilila kujatikizya zyintu nzyobakali kucita. Ikuti nobakamvwida malailile aa Leza, nobakatola lubazu mukuzuzikizya makanze aa Leza aakuba bazyali bakusaanguna babantu bakkede muluumuno, bajisi buumi bulondokede anyika akupona kukabe kutamani.

Pele, cilenge camuuya, naa mungelo umwi, wakajana coolwe cakubelesya bantu mukuzuzikizya makanze aakwe mabi. Aboobo, wakazooba Saatani, zyina lyaamba kuti “Sikukazya.” Kaambaula kwiinda munzoka, Saatani wakamweena Eva, akumwaambila kuti inga wakkala kabotu kakunyina busolozi bwa Leza. Ba Adamu a Eva bakamumvwida Saatani, aboobo bakamana cilongwe ncobakajisi a Mulengi wabo. Akaambo kakutasala kabotu, bazyali besu bakusaanguna bakalibuzya coolwe cakuba abuumi butamani alimwi bakatuyambukizya cibi, kutalondoka, alimwi alufwu ndotutakonzyi kukaka.

Mpoonya-mpoonya, Leza wakaamba makanze aakwe aakululamika bukkale oobu alimwi akwaambila balunyungu lwa Adamu nzila yakujana buumi butamani. Leza wakasinsima kuti “lunyungu,” nkokuti muntu uulibedelede, uyoonyonyoona Saatani akugwisya mapenzi oonse aakaletwa a Saatani, Adamu, alimwi a Eva. (Matalikilo 3:15) Ino nguni wakali kuyooba “lunyungu” oolu? Wakali kuyoozyibwa mukuya kwaciindi.

Kwacecino ciindi, Saatani wazumanana kusola kunyonganya makanze mabotu aa Leza. Bantu babyaabi bakazumanana kuvwula. Leza wakakanza kubanyonyoona bantu babyaabi muzambangulwe. Wakalailila Nowa mululami kuti ayake bwato bupati kutegwa alifwutule walo alimwi amukwasyi wakwe, antoomwe abanyama mbaakalaililwa kuti anjizye mubwato.

Nokwakainda mwaka omwe Zambangulwe kalitalikide kale, Nowa amukwasyi wakwe nobakazwa mubwato bakajana kuti nyika yakalisalazyidwe. Pele “lunyungu” tiilwakaningalibonya.

—Cibalo eeci ciyeeme amagwalo aaya: Matalikilo caandaano 1-11; Juda 6, 14, 15; Ciyubunuzyo 12:9.

[Cifwanikiso icili apeeji 4]