AABO bakulwaizya kuvwelanya bukombi, makani aaya baabona munzila iindene. Ba Eboo Patel, ibakatalisya kabunga kabukombi buvwelene kategwa Interfaith Youth Core bakabuzya kuti: “Mbukombi nzi butabikkili maano kuba aalweetelelo . . . , kulanganya masena . . . , kusamausya beenzu?”

Ncobeni, ba Bbuda, ba Katolika, ba Protesitanti, ba Hindu, ba Mozilemu alimwi abamwi zimwi ziindi babelekela antoomwe mukulwana bucete, balakkampeena kujatikizya lwaanguluko lwabantu, balabeleka ikulesya kuteya tudandamiti naa ikwaamba makani aajatikizya kulanganya masena motukkede. Zikombelo ziindene-indene zilakkala ansi antoomwe kutegwa zibandike mbozikonzya kukulwaizyanya alimwi akumvwana. Balasekelela kujatikizya zikombelo zyabo ziindene-indene kwiinda mukuyasya nkendulu nobasekelela, kupobola, kulizya nyimbo, kupaila alimwi azimwi buyo.

Sena kuvwelana kwazikombelo munzila eeyi nenzila mbotu yakumana mazwanga akati kazikombelo? Sena kuvwelanya bukombi nenzila Leza njabelesya kutegwa zintu zibote anyika?

Mbunga yomwe akati kambunga zipati-pati zyabukombi buvwelene ilalisumpula ategwa ilijisi bantu muzikombelo ziindene-indene ziinda ku 200 alimwi akuti zilajanika muzisi zili 76. Makanze aambunga eeyi “ngakukulwaizya lukamantano lukkalilila mubukombi buvwelene.” Nokuba boobo, eeci ncuuba-uba buyo kucaamba pele kucicita cilakatazya. Mucikozyanyo, kweelana abasikweendelezya tubunga ootu, bbuku ilyaamba zintu nzyobasyoma lyakeelede kulembwa kabotu kutegwa batanyemyi basizikombelo zimwi alimwi abaabo bazulilwa muzisi zimbi. Ino nkaambo nzi? Bakali kukazyanya naa Leza wakeelede kulembwa mubbuku lyakabunga naa pe. Aboobo, bakakasya ikwaamba makani aajatikizya Leza.

Ikuti Leza katajatikizyidwe mumakani aabo, ino lusyomo lujisi mulimo nzi? Kuyungizya waawo, mbuti bukombi oobu buvwelene mbobwiindene atubunga tugwasilizya bantu? Kweelana azyaambwa kale kujatikizya kabunga kabukombi buvwelene, cilalimvwisya kwaamba kuti, kalipandulula kuti takali kabunga kabukombi pe, pele “nkabunga kakulwaizya kubelekelaamwi.”

Sikukulwaizya kuvwelanya bukombi uuzyibidwe kapati uutegwa Dalai Lama wakaamba kuti: “Njiisyo zipati-pati zyabukombi boonse zijisi mulumbe omwe: nkokuti luyando, lweetelelo alimwi akulekelelana.” Alimwi wakayungizya kuti: “Cintu ciyandika kapati nkuba abube oobu buzuba abuzuba.”

 Nokuba boobo, bube oobu, nkokuti luyando, lweetelelo alimwi akulekelelana bulayandika kapati. Mumulawo iwaambwa kuti Mulawo Wabukkale Bubotu, Jesu wakati: “Aboobo, zyintu zyoonse nzimuyanda kuti bantu bamucitile, anywebo nzimweelede kubacitila.” (Matayo 7:12) Pele sena kuba alusyomo lwini-lwini caamba buyo kukulwaizyanya kucita zintu zibotu?

Muciindi ncaakapona mwaapostolo Paulo, wakalemba boobu kujatikizya bantu banji ibakali kulyaamba kuti bakomba Leza: “Ndilazumina kuti mbasungu kubelekela Leza; pele ikutali kweelana aluzyibo lwini-lwini.” Ino kwakali penzi nzi? “Nkaambo mbwaanga tiibakabuzyi bululami bwa Leza,” Paulo wakati, “bakali kusoleka kulibikkila bululami bwabo beni.” (Baloma 10:2, 3) Kubula luzyibo lwini-lwini kujatikizya nzyaakali kuyanda Leza kuti kabacita, cakapa kuti busungu bwabo alimwi alusyomo lwabo zibe zyabuyo.—Matayo 7:21-23.

Jesu wakati: “Balikkomene aabo baleta luumuno.” (Matayo 5:9) Jesu wakali kuzicita eezyo nzyaakali kukambauka kwiinda mukusumpula luumuno alimwi akwaambila bantu babukombi bwiindene-indene mulumbe waluumuno. (Matayo 26:52) Aabo ibakatambula mulumbe bakaba alukamantano luyumu lwaluyando. (Bakolose 3:14) Pele sena makanze aa Jesu akali buyo aakuti bantu ibazwa mubukkale busiyene-siyene kabamvwana kutegwa babe aluumuno? Sena wakabasangana mubukombi bwabo?

Basololi bazikombelo batubunga tuzandukide twaba Farisi alimwi aba Saduki bakali kumukazya Jesu—akukanza kumujaya. Ino wakacita buti? Jesu wakalailila basikwiiya bakwe kuti: “Amubaleke buyo. Mbasololi boofwu.” (Matayo 15:14) Jesu tanaakakulwaizya kuvwelana mukukomba abantu bali boobu.

Nokwakainda ciindi, mbungano ya Bunakristo yakatalisyigwa mu Korinto, Greece—busena bwakazyibidwe kapati kuti bujisi tubunga tunji twabukombi bwiindene-indene. Ino Banakristo bakali mubusena oobu bakeelede kucita buti? Mwaapostolo Paulo wakabalembela kuti: “Mutanjili mujoko lyomwe abantu batasyomi.” Ino nkaambo nzi? Paulo wakabuzya kuti: “Ino nkweendelana kuli buti kuliko akati ka Kilisito a Beliyali? Naa, ino muntu uusyoma uswaangene buti amuntu uutasyomi?” Mpoonya wakabapa lulayo oolu: “Aboobo amuzwe akati kabo, akulyaandaanya”—2 Bakolinto 6:14, 15, 17.

Cakutainda mumbali, Bbaibbele talikulwazyi kuvwelanya bukombi pe. Pele mulakonzya kulibuzya kuti, ‘Mbuti mbolukonzya kujanwa lukamantano lwini-lwini?’

Makkampani aamayake alijisi babelesi banji. Pele sena inga bauzuzikizya mulimo wabo ikuti tiibazuminana kubelesya pulani yamayake yomwe?

Oobu mbozibede zintu kuli baabo bavwelana mubukombi mazuba aano. Nokuba kuti kubelekelaamwi alimwi akulemekana kulakulwaizyigwa, pele tabazuminani acintu comwe kujatikizya mbobakonzya kuba alusyomo. Akaambo kaceeci, makani aajatikizya kulilemeka alimwi anjiisyo azumanana kubaandaanya.

Bbaibbele lilijisi zyeelelo zya Leza zyalo zili mbuli pulani yamayake. Zintu nzyolyaamba Bbaibbele zilakonzya kutugwasya mubuumi. Aabo ibalitobela, bacikonzya kutasalululana akaambo kamubala naa bukombi alimwi baiya kubelekela antoomwe muluumuno alimwi amulukamantano. Kujatikizya makani aaya Leza wakaambila limwi kuti: “Njoosandula mwaambo wabantu akubapa mwaambo uusalala, kuti boonse bakwiilile izina lya-Jehova akumumanina milimo camoyo woonse.” Lukamantano lulaboola akaambo ‘kamwaambo uusalala’ nkokuti bukombi Leza mbwayanda.—Zefaniya 3:9; Isaya 2:2-4.

Bakamboni ba Jehova balamutamba kuti mukaunke ku Ŋanda ya Bwami iili afwaafwi ankomukkala kutegwa mukalibonene luumuno alukamantano luli akati kabo.—Intembauzyo 133:1.