Nokuba kuti mulimo ngomucita ngwakubeleka bukkede naa mulimo uuminya naa milimo imwi iikozyenye ayeeyi, tweelede kuyeeya kuti “mulimo uuli woonse uubelekwa canguzu ujanya mpindu.” (Tusimpi 14:23) Ino nimpindu nzi eeyo? Masimpe ngakuti, kubeleka canguzu kulatugwasya kujana ziyandika. Inzya, Leza usyomezya kubapa nzyobayandika aabo bamukomba cakusyomeka. (Matayo 6:31, 32) Pele alimwi ulangila kuti andiswe tucite lubazu lwesu kwiinda mukubeleka cakusyomeka mumulimo ngotucita kutegwa tujane nzyotuyandika mubuumi.—2 Batesalonika 3:10.

Aboobo, mulimo ngotubeleka ninzila iitugwasya kujana nzyotuyandika mubuumi. Mulimo ninzila iyandika iitugwasya kuzuzikizya mikuli yesu. Ba Joshua ibajisi myaka yakuzyalwa iili 25 bakaamba kuti: “Kulijanina ziyandika mubuumi kulagwasya kapati. Ikuti kocikonzya kuula ziyandika, nkokuti mulimo ooyo uzuzikizya ziyandika mubuumi.”

Kuyungizya waawo, kubeleka mulimo muyumu kutupa kulimvwa kukkomana. Nokuba boobo, mulimo muyumu tauli muuba-uba pe, ulaminya. Pele kuti twazumanana kuubeleka—nokuba kuti muyumu naa tautukkomanisyi—tulakonzya kukkutila nkaambo tulizyi kuti twacita ceeco ncakkomanina Leza. Twacita boobo, nkokuti twacizunda cilengwa cakuzelauka kubeleka milimo miyumu. (Tusimpi 26:14) Munzila eeyo, mulimo utupa kulimvwa kukkutila kapati. Ba Aaron ibaambwa mucibalo cainda bakaamba kuti: “Inga ndilimvwa kukkomana ndamana kubeleka buzuba boonse, nokuba kuti inga ndilikatede alimwi akuti bamwi tabaubikkili maano mulimo ngondacita, pele ndilizyi kuti ndacita cintu ceelede.”

Bbaibbele lilamulumbaizya mwaalumi “uucibwene kubeleka mulimo wakwe” alimwi amukaintu ‘uukkomana kubeleka amaanza aakwe.’ (Tusimpi 22:29; 31:13) Kuba muntu uucibwene kubeleka mulimo umwi takulibooleli buyo pe. Mbasyoonto bakkomana kubeleka mulimo ngobatazyi kabotu. Ambweni aaka nkakaambo bantu banji ncobataukkomanini mulimo wabo; aboobo bayandika buyo kubeleka canguzu kutegwa kabaucita bweelede.

Bwini mbwakuti, muntu ulakonzya kwiiya kuukkomanina mulimo uuli woonse ikuti kaubona munzila yeelede—nkokuti, ikubikkila kapati maano kwiiya mbwakonzya kuubeleka kabotu. Ba William ibajisi myaka iili 24 baamba kuti, “Kuti mulimo mwaubeleka camoyo woonse akubona bubotu bwanguwo, mulakkomana kapati. Tamukonzyi kuukkomanina ikuti mwaubeleka amyoyo yobilo naa cakwiinzya buyo mulawo.”

Amucitantamuke cilengwa cakuyeeya buyo mali ngomukonzya kujana. Muciindi caboobo, amulibuzye kuti: ‘Ino nkaambo nzi mulimo ooyu ncouyandika? Ncinzi cikonzya kucitika ikuti tiiwabelekwa—naa kutacitwa bweelede? Ino mulimo wangu ubagwasya buti bamwi?’

Mubuzyo wamamanino ooyu ulayandika kuyeeyesya kapati, nkaambo mulimo ulakatalusya kapati ciindi notubona mboubagwasya bamwi. Jesu wakaamba kuti: “Kupa kulakkomanisya kapati kwiinda kupegwa.” (Milimo 20:35) Aabo bagwasyigwa cacigaminina amilimo njotucita babikkilizya basikutunjizya mulimo alimwi abasikuula. Kunze lyabaaba kuli abamwi bagwasyigwa, nkokuti banamukwasyi alimwi abaabo bayandika lugwasyo.

Banamukwasyi. Ciindi silutwe wamukwasyi nabeleka canguzu kujana ziyandika zyamukwasyi wakwe, ulabagwasya mumbazu zyobilo. Cakusaanguna, ulabikkila maano kubona kuti bajana ziyandika mbuli zyakulya, zyakusama, alimwi aakoona. Kuti naa wacita oobo, uzuzikizya mukuli wakwe ngwaakapegwa a Leza, nkokuti mukuli ‘wakubamba kabotu bamukwasyi wakwe.’ (1 Timoteyo 5:8) Cabili, sikulanganya mukwasyi muyumu, ulapa cikozyanyo cibotu kutondezya bubotu buliko bwakubeleka canguzu. Ba Shane ibaambwa mucibalo cainda bakaamba kuti: “Bataata ncikozyanyo cibotu camuntu uubeleka cabusungu. Balasyomeka alimwi bali kubeleka canguzu mubuumi bwabo boonse, kabafwala mapulanga. Akaambo kacikozyanyo cabo, ndaiya mbociyandika kubeleka canguzu, kucita zintu zikonzya kugwasya bamwi.”

Aabo babulide. Mwaapostolo Paulo wakakulwaizya Banakristo kuti ‘babeleke mulimo canguzu, . . . kutegwa [babe] acintu cakupa yooyo uubulide.’ (Baefeso 4:28) Inzya, ikuti twabeleka canguzu kujana nzyotuyandika alimwi azyamukwasyi wesu, tulakonzya kubagwasya abaabo bayandika lugwasyo. (Tusimpi 3:27) Aboobo, kubeleka canguzu kulakonzya kutugwasya kuba alukkomano luboola kwiinda mukupa.

Mumulumbe wakwe Waacilundu uuzyibidwe kapati, Jesu wakaamba kuti: “Kuti muntu uuli mubweendelezi wakusinikizya kweenda anguwe kkilomita lyomwe, weende anguwe makkilomita obilo.” (Matayo 5:41) Ino inga mwaibelesya buti njiisyo iili mulugwalo oolu mumulimo wanu? Muciindi cakwiile kubeleka mulimo uubikkidwe, amujane nzila zyakubeleka kwiinda waawo mpomweelede kusika. Amulibikkile mbaakani; amuubeleke kabotu mulimo ngomwapegwa naa kufwambaana kuumanizya. Amuubeleke kabotu mulimo wanu akuzibikkila maano zibeela zyoonse zyamulimo noziba zyeezyo ziboneka kuba zisyoonto.

Ikuti naa mwabeleka kwiinda waawo mpomweelede kusika, mulalangilwa kuukkomanina kapati mulimo wanu. Nkaambo nzi? Nkaambo kakuti mwaliyandila buya kucita boobo, ikutali kuti umwi wamusungilizya buya. (Filimoni 14) Kujatikizya kaambo aaka, tulakonzya kuyeeya njiisyo iilembedwe ku Tusimpi 12:24 iyaamba kuti: “Ijanza lyabankutwe liyakweendelezya, pele maanza aabatolo ayoobelesyegwa cibbalo.” Bwini mbwakuti, tatuli toonse notukonzya kubelesyegwa cibbalo pe. Nokuba boobo, muntu uubeleka cakwiinzya buyo mulawo ulakonzya kulimvwa kuti muzike kubantu bamwi. Pele muntu uulyaabide kubeleka kwiinda waawo mpayelede kusika, ulacita oobo akaambo kakulisalila kucita boobo. Aboobo ulijisi nguzu zyakweendelezya nzyacita mubuumi.

Kubeleka canguzu kulalombozyeka, nokuba boobo tweelede kuyeeya kuti kuli cintu ciyandika kapati kwiinda mulimo. Masimpe, Bbaibbele litukulwaizya kuba basungu. (Tusimpi 13:4) Pele talikulwaizyi kuba bazike buya kumulimo pe. Lugwalo lwa Mukambausi 4:6 lwaamba kuti: “Kulyookezya kusyoonto nkubotu kwiinda kulijaya kubeleka mulimo muyumu akutandaanya muwo.” Ncinzi caambwa aawa? Muntu uuba muzike kumulimo wakwe takonzyi kukkomana amicelo yamaanza aakwe ikuti mulimo wakwe kaumumanina ciindi cakwe coonse alimwi anguzu. Mukuya kwaciindi, mulimo ooyo uba cintuuntu buyo, mbuli “kutandaanya muwo.”

Ibbaibbele lilakonzya kutugwasya kuulanga munzila yeelede mulimo. Nokuba kuti litwaambila kuti tweelede kubikkila maano kumulimo wesu, lilatukulwaizya ‘kusinizya zintu ziyandika kapati.’ (Bafilipi 1:10) Ino nzintu nzi ziyandika kapati? Eeci cibikkilizya kujana ciindi cakuba amukwasyi alimwi abalongwe. Pele ciyandika kwiinda zyeezyi, milimo ya Bunakristo mbuli kubala Jwi lya Leza akuzinzibala kuyeeya ncolyaamba.

Aabo ibabikkila maano kuzintu ziyandika kapati balalangilwa kuukkomanina kapati mulimo wabo. Ba William ibaambwa kale musyule baamba kuti: “Muntu umwi ngondakali kubelekela ncikozyanyo cibotu camuntu uubeleka cabusungu. Ulabeleka canguzu alimwi bantu mbacita limwi makwebo balamulumbaizya kapati nkaambo mulimo wakwe ulaucita kabotu. Pele kuti naa wakotoka, ulausiya mulimo wakwe akubikkila maano kumukwasyi wakwe alimwi abukombi bwakwe. Alimwi cikkomanisya ncakuti, ngumwi wabantu bakkomene kapati mbondizyi!”