Ba Alona bakaamba kuti, “Ciindi nondimvwa kasayilini kakalila, moyo wangu ulatalika kuduntaana, mpoonya inga nditijila kubusena bwakuyubila ntenda. Noliba leelyo nondili kubusena oobu, inga ndililibilikide. Pesi inga ndilaindila kulibilika ikuti kandili anze. Buzuba bumwi nondakali kweenda munzila ndakatalika kulila alimwi ndakalifwundilide kapati. Cakanditolela mawoola manji kuti ndikkalikane. Mpoonya kasayilini kakalila alimwi.”

Nkondo ili akati kazintu zinji zileta ntenda. Mucikozyanyo, ikuzyiba kuti nywebo naa muyandwa wanu umwi ujisi bulwazi bujaya, kulakonzya kumupa kunyongana kapati. Kuyoowa ziboola kumbele kulakonzya kupa bantu bamwi kulibilika. Balalibilika kuti, ‘Sena bana besu, naa bazyukulu besu bayoopona ciindi nokunooli nkondo, bugwebenga, kusofwaazyigwa kwanyika, kucinca mboyuunga myuwo, alimwi amalwazi aayambukila?’ Ino inga twakuzunda buti kulibilika kuli boobu?

Akaambo kakuzyiba kuti zintu zibi zilacitika, “muntu uucenjede abona mapenzi ulayuba.” (Tusimpi 27:12) Mbubwenya mbotusola kulikwabilila kumubili, tulakonzya kubweza ntaamu zyakukwabilila mizeezo yesu. Zintu zyakulikondelezya izitondezya nkondo alimwi amalipooti aajisi zifwanikiso ziyoosya zitupa kuti twiindile kulibilika antoomwe abana besu. Kutantamuka zintu zili boobu zibyaabi tacaambi kuti  tatukonzyi kuzibona. Leza tanaakatulengela kuti katuyeeya zintu zibi. Muciindi caboobo, tweelede kuyeeya “zintu zyamasimpe, . . . ziluleme, . . . zisalala, . . . ziyandwa.” Ikuti twacita oobo, “Leza waluumuno” uyootupa luumuno lwamumizeezo.—Bafilipi 4:8, 9.

Lusyomo lwini-lwini lulatugwasya kulwana penzi lyakulibilika. Ibbaibbele litukulwaizya “kupakamana kujatikizya mipailo.” (1 Petro 4:7) Tulakonzya kumulomba Leza kuti atupe busongo alimwi abusicamba kutegwa butugwasye mubukkale motubede, katusyomede kuti “ulatumvwa kujatikizya cintu cili coonse ncotulomba.”—1 Johane 5:15.

Bbaibbele lyaamba kuti Saatani ‘ngomweendelezi wanyika eeyi’ kutali Leza pe alimwi akuti “nyika yoonse ili mumaanza aamubi.” (Johane 12:31; 1 Johane 5:19) Aboobo, Jesu tanaakali kwaamba mumaambilambali ciindi naakatuyiisya kupaila kuti: “Utuvwune kumubi.” (Matayo 6:13) Ba Alona bakaamba kuti, “Kufwumbwa kalila kasayilini, ndilapalila kutegwa Jehova andigwasye kubatama. Alimwi abalo balumi bangu balandiita kutegwa tupaile antoomwe. Kupaila kulagwasya kapati.” Eeci cileendelana ancolyaamba Bbaibbele noliti: “Jehova ulaafwaafwi abaabo boonse bamwiita, aabo boonse bamwiita mukasimpe.”—Intembauzyo 145:18, bupanduluzi buyungizyidwe.

Mu Mulumbe Waacilundu, Jesu wakayiisya basikumutobela kupaila kuti: “Abuboole Bwami bwako.” (Matayo 6:10) Bwami bwa Leza buyookugwisya kulibilika kuli koonse kukabe kutamani. Kwiinda muli Jesu “Mwami Waluumuno,” Leza ‘uyoomanizya nkondo munyika yoonse mboizulwa.’ (Isaya 9:6; Intembauzyo 46:9) “[Leza] uyookosola makani akati kabantu banji . . . Cisi tacikanyamuni panga kulwana cisinyina, alimwi tabakaiyi limbi nkondo pe. . . . Takukabi muntu naba omwe uuyoobayoosya.” (Mika 4:3, 4) Bantu bakkomene mumikwasyi “bayooyaka maanda akukkala mulingawo, bayoosyanga myuunda yamisaansa akulya micelo yanjiyo.” (Isaya 65:21) “Alimwi taakwe muntu naba omwe uukkala munyika uuyakwaamba kuti: ‘Ndaciswa’”—Isaya 33:24.

Nokuba kuti lyoonse tulacenjezyegwa, talili lyoonse notukonzya kutantamuka “zintu zitalangilwi” naa kweeleba kuba mubusena buteelede aciindi citeelede. (Mukambausi 9:11) Mbubwenya mbocakabede kuzwa kaindi, nkondo, bugwebenga, alimwi amalwazi zyazumanana kujaya bantu bali kabotu. Ino mbulangizi nzi mbobajisi bantu aabo batakwe mulandu?

Mamiliyoni aabantu bayoopona alimwi, pele Leza alikke nguuzyi mweelwe wabo. Kwacecino ciindi, baloona, alimwi Leza ulibayeeyede kusikila ‘ciindi eelyo aabo boonse ibali muzyuumbwe . . . nobayoozwa mulinzizyo.’ (Johane 5:28, 29) Nolyaamba makani aabubuke, Bbaibbele litukulwaizya kuti: “Oobu bulangizi tulibujisi mbuli ngobyo yiimika bwato yabuumi bwesu, ibusinizyide alimwi ibuyumu nta.” (Bahebrayo 6:19) Kuyungizya waawo, Leza “wapa cisinizyo kubantu boonse kwiinda mukumubusya [Jesu] kubafwu.”—Milimo 17:31.

Aciindi eecino, nobaba baabo ibasoleka kukkomanisya Leza banoojana zintu zipa kulibilika. Kwiinda mukubweza ntaamu zigwasya, nkokuti kuswena kuli Leza kwiinda mumupailo, alimwi akuba alusyomo mubulangizi bwakumbele mbotujana mu Bbaibbele, ba Paul, ba Janet, alimwi aba Alona bacikonzya kulwana penzi lyakulibilika. Mbubwenya Leza mbwaabagwasya bantu aaba, “Leza uupa bulangizi amuzuzye kukondwa koonse alimwi aluumuno eelyo nomumusyoma.”—Baroma 15:13.