Mumazuba aaya aamamanino, tulangila kumvwa malipooti aajatikizya “nkondo.” (Matayo 24:6) Nokuba boobo, ciindi bakwesu nobali mumapenzi akaambo kankondo, balatambula lugwasyo ndobayandika. Mu Lipooti ya Kabunga Keendelezya #3 2022, twakamvwa twaambo tukkazika moyo kujatikizya lugwasyo luli mukupegwa ku Eastern Europe kuli baabo bajatikizyidwe ankondo iili ku Ukraine. Pele, mbuti bakwesu mbobagwasyanya nokuba kuti bamwi balalwana? Mbuti mulimo wakugwasyilizya nokwacitika ntenda mbowabajatikizya bakwesu ku Ukraine?

 Mu February 24, 2022 buzuba nkondo noyakatalika ku Ukraine, Kkomiti Yabeendelezi yakazumizya kuti kupangwe bbajeti yakugwasya bakwesu. Mpoonya-mpoonya bakwesu bakumutabi waku Ukraine bakatalika kuula zintu momunya mucisi kumane akuzyaabila bakwesu kwiinda mukubelesya ma Disaster Relief Committee aali 27 aakapangwa.

 Kuyungizya alugwasyo ndobakapa bakumutabi waku Ukraine, bakwesu baku Maofesi Mapati aa Bakamboni ba Jehova abalo mpoonya-mpoonya bakatalika kuyeeya mbobakonzya kugwasyilizya. Aboobo, ba Kkomiti Yabeendelezi antoomwe aba Kkomiti Iilanganya Zimwaigwa ya Kabunga Keendelezya, bakalomba ba Global Purchasing Department kubeleka abaiminizi bakumutabi wa Ukraine awa Poland, kutegwa balanganye makani aaya. Bakwesu bamu dipatimenti ya Purchasing, Shipping, alimwi a Legal kumutabi umwi aumwi, mukwesu umwi wamu Kkomiti Yamutabi waku Ukraine, alimwi abakwesu bamu Global Purchasing Department bakali kuswaangana abuzuba kubandika zyamulimo ooyu.

 Ba Jay Swinney bamu Global Purchasing Department bakaamba kuti: “Kusaanguna twakeelede kuzyiba zyakali kuyandika. Twakali kuyanda kubapa zyakulya azintu zyakubelesya nzyobazibide. Nokuba boobo, kwakali buyumuyumu bunji kunze buyo lyakuzyiba zintu zyakali kuyandika. Twakeelede kuzyiba mbotwakeelede kuzinjizya mu Ukraine cakufwambaana alimwi kakunyina kunjila muntenda.”

 Kuzoosika mu March 9, 2022, zintu izyakali kuyandika zyakazyibwa. Zyakulya zyamutugabba mbuli nyama, nswi, maila, mupunga alimwi anyabo, zyakali kuyoopegwa antoomwe azintu zyakubelesya mbuli nsipa alimwi atisyu. Aciindi eeci, kwakali kuyeeyelwa kuti munsondo buyo zyone muntu omwe wakali kukonzya kubelesya mali aasika ku $65 (U.S.). Akaambo kakuti bakwesu banji bakali kuyandika zintu eezyi, Kkomiti Yabeendelezi yakazumizya kuti kubelesyegwe mali manji kapati kugwasya bakwesu aaba. Pele mbuti bakwesu mbobakali kuyootola zintu kubakwesu kakunyina kunjila muntenda?

 Mu March 13, bakwesu bobilo baku Poland bakatola zintu zisyoonto buyo kuzwa kuofesi yamutabi waku Poland kubusena nkobayobweda zintu afwaafwi adolopo lya Lviv, Ukraine. Kakusyeede mazuba masyoonto kuti baunke, bakumutabi waku Poland alimwi awaku Ukraine bakagwasya basikulisungula aaba kulibambila lweendo lwabo. Bakumutabi bakabamba mapepa aamulawo aazumizya kunjila mucisi cimbi kutegwa mupe lugwasyo, bakabona masimpe kuti myoota yabakwesu yakalijisi zitondezyo zilibonya zyakuti bakanyamwide zintu zyakupa lugwasyo, alimwi bakabelekela antoomwe abakwesu bamu Ukraine kujana nzila iikosola kusika nkobakali kuunka. Akaambo kakulibambila kabotu ooku alimwi akugwasyigwa a Jehova, bakwesu bakazisisya zintu ku Lviv kwalo ba Disaster Relief Committee nkobakazitambula mumawoola aali buyo 24, mpoonya bakapiluka ku Poland kakunyina ntenda yakabacitikila.

 Nokuba kuti lweendo lwakusaanguna lwakazwidilila, bakwesu bakatola buyo zintu zitasiki ku 1000 kg. Kulangilwa kuti kuciyooyandika ma kg aali 200,000! Mbuti mweelwe mupati boobu wazintu eezyi mbowakali kuyootolwa alimwi akwaabilwa cakufwambaana?

 Nobakabala malipooti aali a jw.org aabakwesu mbobakajatikizyigwa acicitika ku Ukraine, bantu nyika yoonse bakali kuyanda kugwasya. Ibanji bakkala kulamfwu bakasanga mali kumulimo wanyika yoonse wa Bakamboni ba Jehova, kabazyi kuti mali aaya akali kuyoobelesyegwa munzila iili kabotu. Bamwi ibakkala muzisi zili munsi-munsi bakacikonzya kwaaba ciindi cabo, nguzu, alimwi azintu kutegwa bagwasye. Amubone zikozyanyo zisyoonto buyo.

 Ku Poland, basikulisungula bakaleta mabbokesi manji aazintu zyakubelesya, kumane bana bakapanga makkaadi. Ba Bartosz Kościelniak, babelekela ku Purchasing Department yakumutabi waku Poland bakaamba kuti: “Ziindi zinji ndakali kubala lugwalo lwa Intembauzyo 110:3, lwalo ilwaamba kuti bantu ba Jehova ‘bayoolyaaba cakuliyandila.’ Ndakali kwaabala buyo majwi aaya, pele lino ndasyoma kuti ngamasimpe nkaambo ndalibonena mbobalibambilide kugwasya bakwesu, alimwi babelekela antoomwe kucita oobo.”

 Mukwesu umwi uujisi kkampani yamatilakki aanyamuna zintu iwakasanga matilakki aakwe amungwimba kuti zibelesyegwe wakaamba kuti: “Kulindime, eeci ncoolwe cakutondezya luyando kubakwesu akuli Jehova. Ndilikkomene kapati kuti ndakagwasya.” Kuyeeyelwa kuti kwakasangwa malita aayinda ku 7,700 aamungwimba, alimwi bakwesu bakabelesya ciindi alimwi anguzu kweenzya matilakki kwamakkilomita aatandila ku 48,000 kutola zintu!

 Akaambo kakulisungula alimwi amilimo yaluyando yabakwesu abacizyi, kuzoosika mu March 28 nkokuti, kakwiindide mazuba ali 15 kuzwa nibakatola zyakusaanguna, kwakatolwa zyakulya, zintu zyakubelesya, alimwi amisamu izilema ma kg aali 100,000 ku Ukraine! Kunze lyaboobo, akaambo kakusanga cabwaabi nkobakacita bakwesu abacizyi abasikusambala, mali aakeelede kubelesyegwa kugwasyilizya bakwesu akacesyegwa kapati. Kusikila sunu, Bakamboni ba Jehova batuma zintu ziinda ku 190,000 kg kugwasilizya bakwesu ku Ukraine. Ino zyakusanga eezyi zyakabagwasya buti bakwesu?

 Zintu eezyi zyasika ku Lviv, ba Disaster Relief Committee bamucisi coonse ca Ukraine bakali kubapa aabo bayandika lugwasyo. Zyakali kuunka kumadolopo aindene-indene, mane buya akumadolopo aakali makkilomita aainda ku 1,300 kuzwa ku Lviv. Nokuba kuti mulimo ooyu wakabelekwa cabunkutwe, wakali kutola ciindi. a

 Mukwesu Markus Reinhardt, umwi wamu Kkomiti ya Mutabi waku Ukraine, wakaamba kuti: “Muciindi eeci cikatazya, bunji bwabakwesu balibonena luyando lwa Jehova, abubotu buboola akaambo kakutobela busolozi buzwa kumbunga yakwe, nociba ciindi nokutanacitika ntenda. Mucikozyanyo, boonse bakali kukulwaizyigwa kuyobola meenda azyakulya zikonzya kukkala kwansondo zili mbozibede. Kujatikizya busolozi oobu, mwaalu wazina lya Anton uubelekela ku Kyiv wakaamba kuti: ‘Mbunga ya Jehova yatugwasya kulibambila bukkale bukatazya, alimwi tulalumba kapati akaambo kaceeci. Kuba azyakulya, meenda alimwi awailesi zyatugwasya kapati.’ Tulalumba kapati kuti bakwesu bakabutobela busolozi oobu, nkaambo cakabagwasya aciindi bakuofesi yamutabi nobakacili kubamba zintu.”

 Ino bakwesu bakalimvwa buti ciindi zintu eezyi nozyakasika? Ba Mykola alimwi aba Zinaida, bakkala ku Kharkiv, bakaamba boobu kujatikizya mbobakalimvwa: “Twakalumba kapati kuzyakulya alimwi amisamu. Eelo kaka mwakatubikkila maano! Cakutadooneka, Jehova nguwakapa kuti eeci cicitike.” Ba Valentyna ibakkala mubusena mbubonya oobu, bakaamba kuti: “Kuzwa ciindi nkondo noyakatalika, twakali kwiimikila kwaciindi cilamfwu kutegwa tuule zintu. Talili lyoonse nocakali kukonzyeka kuula zintu nzyotwakali kuyandika. Pele Jehova wakalizyi alimwi wakaliibwene penzi eeli. Aboobo wakasala bakwesu kutuletela zintu kumaanda eesu, alimwi bakatuletela zintu nzyomunya nzyotwakali kuyandika! Muziindi zikatazya, muntu nabula bulangizi, nceciindi nakonzya kubona lugwasyo lwa Jehova alimwi alwa mbunga yakwe munzila yaalubazu. . . . Eelo kaka cilakkomanisya kubona lugwasyo ndwapa aciindi ceelede.”

 Ba Yevhen abakaintu babo Iryna, alimwi a Mykyta, ibakazwa ku Mariupol, bakaamba kuti: “Twakalumba kapati akaambo kalugwasyo ndomwakapa mukwasyi wesu. Masimpe, lwakasika aciindi ceelede. Kumatalikilo, twakali kuyeeya kuti mumabbokesi aaya muli buyo zintu, pele ciindi notwakaajula, twakajana kuti kwakali aluyando lwanu!”

 Cakutadooneka mulakonzya kubona kuti Jehova wakabelesya muuya wakwe kupa busolozi bantu bakwe kutola zintu eezyi mubusena muli “nkondo.” Zyakusanga zyanu kumulimo wanyika yoonse, zyalo zyakacitwa kwiinda mukubelesya donate.pr2711.com, zyakagwasya kapati. Tulamulumba kapati akaambo kazyakusanga zyanu!

Kupa Lugwasyo Cakufwambaana Alimwi Kakunyina Kunjila Muntenda

1. February 24, 2022: Kkomiti Yabeendelezi yakazumizya kuti kupangwe bbajeti ku Ukraine, yalo yakapa kuti mutabi utalike mulimo wakugwasya

2. February 24–March 8, 2022: Mutabi waku Ukraine wakatalika kuula zintu zimwi mumonya mucisi mpoonya akutalika kwaabila bantu kwiinda mukubelesya ba Disaster Relief Committee. Kuyungizya waawo, ofesi yamutabi yakalibambila kutambula akwaabila zintu izyakali kuzwa ku Poland

3. March 9, 2022: Kkomiti Yabeendelezi yakazumizya kubatolela zintu bakwesu ku Ukraine

4. March 10–12, 2022: Kwakapangwa bubambe bwakutola zyakulya alimwi azintu zimwi kuzwa ku Poland kuya ku Lviv, Ukraine

5. March 13, 2022: Zyakulya alimwi azintu zimwi zyakusaanguna zyakatolwa ku Lviv, Ukraine kuzwa ku Poland

6. March 14–16, 2022: Ku Assembly Hall munsi-munsi a Poznan, ku Poland, basikulisungula ba Local Design/Construction bakaswaangana kupakiŋa zyakulya alimwi azintu zyakubelesya

7. March 17, 2022: Nokwakainda mazuba one, bakwesu bakatalika kunyamuna zintu zilema ma kg aali 13,000, kutola kubboda ya Ukraine

8. March 21–27, 2022: Bakwesu baluujisi kupakiŋa zintu izyakasyaala ku Poland akuzituma ku Ukraine kumane akuzyaabila kumasena aabulide mumawoola aali buyo 24

9. March 28, 2022: Mumazuba aali buyo 20 kuzwa nobakazumizya, zyakulya, zintu, alimwi amisamu zilema ma kg aali 100,000 zyakatolwa ku Ukraine

 Kusikila sunu, Bakamboni ba Jehova bakatola zintu ziinda kuma kg aali 190,000 kugwasyilizya ku Ukraine.