•  Nkaambo nzi bazyali ncobanjilila makani aabana?

•  Ncomukonzya kucita

•  Nzyobaamba beenzinyoko

 Bazyali banu baamba kuti nkaambo kakuti balamuyanda. Pele nywebo muyeeya mbuli kuti nkumunyonganya. Mucikozyanyo:

•   Mukubusi wazina lya Erin wakaamba kuti: “Bataata baalakubweza fooni yangu, kundisungilizya kuti ndibape pasiwedi, mpoonya akulanga mameseji oonse. Ndakaka buyo asyoonto, inga bayeeya kuti kuli ncondisisa.”

•   Denise, lino ulaamyaka yakuma 20, ulayeeya banyina kabalanga-langa fooni. “Bakali kulanga namba imwi aimwi akundibuzya kuti njabani ancondakabandika amuntu ooyo.”

•   Mukubusi wazina lya Kayla wakaamba kuti banyina bakamubalila bbuku lyakwe lyaamba maseseke ngajisi. “Lyakajisi makani manji aamba mbondilimvwa, azintu zijatikizya mboonya bamaama! Ndakacileka kulemba mubbuku kuzwa leelyo.”

 Kaambo ikayandika: Bazyali banu bajisi mukuli wakumulanganya, aboobo tamujisi nguzu zyakubaambila mpobeelede kugolela. Sena zimwi ziindi ciyakulibonya kuti baciindizya? Andiza. Pele makani mabotu ngakuti kuli zintu nzyomukonzya kucita kutegwa kamutalimvwi boobo.

 Amwaanguluke. Bbaibbele litukulwaizya kuti “katusyomeka muzintu zyoonse.” (Bahebrayo 13:18) Amusolekesye kusyomeka kuli bazyali banu. Ikuti kamusyomeka akwaanguluka kulimbabo, bayoomupa bulemu mbomuyanda.

 Ncomweelede kuyeeya: Ino mujisi mpuwo iili buti caboola kumakani aakusyomeka? Sena mulamuka kusika aŋanda? mulasisa bantu mbomumvwana limwi? Micito yanu ipa bantu kuti kabamudooneka?

“Ndilazitobela nzyobayanda bazyali bangu. Ndilabaambila zyoonse zicitika mubuumi bwangu. Ndilabaambila zyoonse nzyobayanda kuzyiba, akaambo kakucita boobu, balandisyoma akundipa bulemu.”​—Delia.

 Amukkazike moyo. Bbaibbele lyaamba kuti: “Amuzumanane kulilingula kutegwa mubone bwini mbomubede.” (2 Bakorinto 13:5) Cilatola ciindi kuba ampuwo yakuti ulasyomeka, pesi cilagwasya kapati.

 Ncomweelede kuyeeya: Aciindi cimwi bazyali banu bakali bakubusi abalo. Mbwaanga bakali bakubusi abalo, ino eeci cibajatikizya buti caboola kukulanganya ndinywe?

 “Ndiyeeya kuti bazyali bayeeya zintu nzyobakalubizya aboobo tabayandi kuti bana babo abalo zibacitikile.”​—Daniel.

 Amubeetelele. Amusole kubona zintu mbuli mbobazibona bazyali banu. Bbaibbele lyaamba kuti mukaintu uulomene “ulalangilila kubona mbozyeenda zintu muŋanda yakwe” akuti muzyali mubotu ‘ulabalela mululayo abusolozi bwa Jehova’ bana bakwe. (Tusimpi 31:27; Baefeso 6:4, bupanduluzi buyungizyidwe) Kutegwa bacikonzye kucita boobo, tamweelede kudabula, nkaambo bazyali bantu balijatikizyidwe mubuumi bwanu.

 Ncomweelede kuyeeya: Ikuti nimwali muzyali, uuzyi mbobabede bakubusi, sena inga mwamulekela mwanaanu kulicitila zintu zyoonse, kakunyina kumubuzya mibuzyo?

“Ikuti koli mukubusi, cilibonya mbuli kuti bazyali bako balanjilila mumakani aako. Lino mbwaanga ndakomena, ndilizyi bazyali ncobeelede kucita oobo. Citondezya luyando ndobajisi.”​—James.