Ibbala lyakuti “soul” mu Bbaibbele lyakasandululwa kuzwa kubbala lya Chihebrayo lyakuti neʹphesh alimwi alyamu Chigiliki lyakuti psy·khe. Ibbala eeli lyamu Chihebrayo lyaamba “cilenge ciyoya” mpoonya lyamu Chigiliki lyaamba “cintu cipona.” a Aboobo, bbala lyakuti soul lyaamba cilenge coonse mbocibede, kutali cintu cimwi cili mukati cizumanana kupona cilenge nocafwa. Amulange-lange Bbaibbele mbolitondezya kuti bbala lyakuti soul kwaamba muntu, lyaamba muntu woonse kumugama:

•   Ciindi Jehova Leza naakalenga muntu wakusaanguna, Adamu, Bbaibbele lyaamba kuti “muntu wakaba muumi.” (Matalikilo 2:7) Adamu tanaakapegwa soul pe​—pele wakaba muumi, naa muntu.

•   Bbaibbele lyaamba kuti soul naa muntu ulakonzya kubeleka, kuyanda zyakulya, kulya, kutobela milawo alimwi akujata mutunta. (Levitiko 5:2; 7:​20; 23:30; Deuteronomo 12:20; Baloma 13:1) Milimo eeyi ijatikizya muntu woonse kumugama.

Sena soul ilafwa?

 Inzya, Soul ilafwa. Tupango tunji twamu Bbaibbele tutondezya kuti soul ilafwa. Nzyeezi zikozyanyo:

•   “Muntu uubisya, ngonguwe uuyoofwa.”​—Ezekiele 18:​4, 20.

•   Mu Israyeli yansiku muntu wacita cibi cipati wakeelede “kutandwa.” (Kulonga 12:15, 19; Levitiko 7:​20, 21, 27; 19:8) Muntu ooyo wakeelede “kufwa.”​—Kulonga 31:14.

•   Muntu naafwa, majwi aakuti “soul iifwide” alabelesyegwa kwaamba mutunta mutupango tumwi twamu Bbaibbele. Nokuba kuti ma Bbaibbele manji abelesya mabala aakuti “mubili uufwide” naa “muntu uufwide,” mutupango ooto, pele mu Chihebrayo kubelesyedwe bbala lyakuti neʹphesh, naa “soul.”

“Soul” ilakonzya kwaamba “buumi”

 Bbaibbele alimwi lilabelesya bbala lyakuti “soul” kwaamba “buumi.” Mucikozyanyo, lugwalo lwa Jobu 33:22 bbala lya Chihebrayo lyakuti “soul” (neʹphesh) lyaamba “buumi.” Mbubwenya buyo, Bbaibbele litondezya kuti buumi bwamuntu, bulakonzya kuba muntenda naa kufwa.​—Kulonga 4:​19; Babetesi 9:​ 17; Bafilipi 2:30.

 Mbolibelesyegwa bbala eeli ilyaamba kuti “soul” citugwasya kumvwisya tupango mwalo soul moyaambwa kuti “kumusiya.” (Matalikilo 35:18) Maambilambali aaya atondezya kuti buumi bwamuntu bulaafwi kumana. Busanduluzi bumwi bwaamba majwi aali mulugwalo lwa Matalikilo 35:18 kuti “lino kacipefula.”​—BT.

Nkoyakazwa njiisyo yakuti soul taifwi

 Zikombelo zya Bunakristo izisyoma kuti soul taifwi, njiisyo eeyi tiizyakaijana mu Bbaibbele pe, pele mubusongo bwaba Giliki bansiku. Bbuku litegwa Encyclopædia Britannica lyaamba kuti: “Bbala lyakuti soul mu Bbaibbele lipa muzeezo wakuyoya alimwi talitondezyi kuti kuli kwiindana akati ka soul, nkokuti cintu citalibonyi (ethereal soul) alimwi amubili (corporeal body).

 Njiisyo zya Bunakristo zyakuti kuli soul naa mubili uutalibonyi alimwi a soul iilibonya zyakazwa kuba Giliki bansiku.”

 Leza tazumizyi kuvwelanya njiisyo zyakwe anjiisyo zyabusongo bwabantu, mbuli njiisyo yakuti soul taifwi. Muciindi caboobo, Bbaibbele litucenjezya kuti: “Amucenjele kutegwa kutabi muntu uumoongelezya kuti mucegwe kwiinda mubusongo bwabantu alweeno, kweelana atunsiyansiya twabantu.”​—Bakolose 2:8.