Ino ba Nefilimu Bakali Bani?
Bwiinguzi bwamu Bbaibbele
Ba Nefilimu bakali babbabbani, bantu basilunya ibakazyalwa kubangelo babyaabi ibakakwata bamakaintu mumazuba aa Nowa. a
Bbaibbele lyaamba kuti “bana ba Leza mwini-mwini bakatalika kubona bana basimbi babantu aaba kuti bakali babotu.” (Matalikilo 6:2) ‘Bana ba Leza’ aabo mubwini bakali zilenge zyamuuya izyakamuzangila Leza ciindi ‘nobakasiya busena bwabo bwakukkala bubeelede’ kujulu, bakasama mibili yanyama ‘akutalika kulibwezela basimbi akukwata kufwumbwa aumwi ngwaakayanda.’—Juda 6; Matalikilo 6:2.
Bana ibakazyalwa munzila eeyi iiteelede bakaliindene abana bamwi. (Matalikilo 6:4) Ba Nefilimu bakali babbabbani basinguzu, basilunya ibakazuzya bubi munyika. (Matalikilo 6:13) Bbaibbele libapandulula kuti “bakali basinguzu aciindi eciya alimwi bakali baalumi balaampuwo.” (Matalikilo 6:4) Nobakafwa ba Nefilimu, bubi alimwi akuyoowa zyakazumanana.—Matalikilo 6:5; Myeelwe 13:33. b
Makani aakubeja kujatikizya ba Nefilimu
Makani aakubeja: Ba Nefilimu bacipona anyika mazuba aano.
Makani aamasimpe: Jehova wakaleta zambangulwe lyanyika yoonse kutegwa anyonyoone bantu bakali kucita bubi kuciindi eciya. Ba Nefilimu bakanyonyoonwa antoomwe abantu boonse babyaabi. Mukwiimpana, Nowa amukwasyi wakwe bakakkomanisya Jehova alimwi balikke mbebakafwutulwa kuciindi eciya.—Matalikilo 6:9; 7:12, 13, 23; 2 Petro 2:5.
Makani aakubeja: Bamausyi baba Nefilimu bakali bantu.
Makani aamasimpe: Bamausyi baitwa kuti “bana ba Leza mwini-mwini.” (Matalikilo 6:2) Bbaibbele libelesya mabala ngomunya aaya kupandulula bangelo. (Jobu 1:6; 2:1; 38:7) Bangelo bakalijisi nguzu zyakusanduka akuba bantu. (Matalikilo 19:1-5; Joshua 5:13-15) Mwaapostolo Petro wakaamba kujatikizya “myuuya muntolongo, eeyo yatakali kuswiilila ciindi Leza naakali kulindila cakukkazika moyo kumazuba aa Nowa.” (1 Petro 3:19, 20) Kaamba kujatikizya bukkale mbubwenya oobu, mulembi wa Bbaibbele Juda wakapandulula kuti bangelo bamwi ‘ibatakazumanana mubusena bwabo bwakusaanguna bakasiya busena bwabo bwakukkala bubeelede.’—Juda 6.
Makani aakubeja: Ba Nefilimu bakali bangelo ibakatandwa kujulu.
Makani aamasimpe: Makani aali ku Matalikilo 6:4 atondezya kuti ba Nefilimu tiibakali bangelo, pele bakali bana basinguzu ibakazyalwa kubangelo ibakasandula mibili yabo akoonana abamakaintu anyika. Bangelo ‘nobakatalika kulibwezela basimbi akukwata kufwumbwa aumwi ngwaakayanda,’ Jehova wakaamba kuti mumyaka iili 120 wakali kuyoobweza ntaamu yakunyonyoona bantu ibakali kusampaula Leza kuciindi eeco. (Matalikilo 6:1-3) Cibalo ciyungizya kuti “mumazuba aayo,” bangelo ibakalisandula “bakazumanana kuswaangana abana basimbi babantu” mpoonya bakabazyalila bana “basinguzu aciindi eciya,” ba Nefilimu.—Matalikilo 6:4.
a Ibbala lya Chihebrayo ilyakalembwa kuti “Nefilimu” ambweni lyaamba kuti “Bantu Bausya.” Bbuku litegwa Wilson’s Old Testament Word Studies lyaamba kuti ibbala eelyo lyaamba “bantu ibausya bantunyina kwiinda mukubalwana akubanyanga zintu.”
b Cakutadooneka, basikutwela bana Israyeli ibaambidwe ku Myeelwe 13:33 bakabona babbabbani calo icakabayeezya zibalo izyaamba ba Nefilimu, ibakafwide kale myaanda yamyaka musyule.—Matalikilo 7:21-23.
Andiza Inga Mwaakkomanina Ayaaya
MIBUZYO YAMU BBAIBBELE YAINGULWA
Sena Madaimona Nkwaali Ncobeni?
Ino madaimona ninzi? Ino azwa kuli?
NGAZI YAMULINDIZI
‘Wakali Kweenda a Leza Wakasimpe’
KUJATIKIZYA NDISWE
Amulombe Kuswaigwa
Amubandike mubuzyo wamu Bbaibbele, naa amwiiye zinji kujatikizya Bakamboni ba Jehova.