Mulakonzya kuba mulongwe wa Leza kwiinda mukwiiya kujatikizya nguwe alimwi akubweza ntaamu ziyandika kutegwa mumukkomanisye. Eelyo “awalo ulaswena kulindinywe.” (Jakobo 4:8) Bbaibbele lyaamba kuti “tali kulamfwu kuli umwi aumwi wesu.”—Milimo 17:27.

•  Ncotweelede kucita kutegwa tumuzyibe Leza

•  Makani aataluzi aajatikizya kuzyiba Leza

 Kubala Bbaibbele

•  Ncolyaamba Bbaibbele: “Magwalo oonse akasololelwa a Leza.”—2 Timoteyo 3:16.

•  Bupanduluzi: Leza ngo Sikwaanza Bbaibbele. Wakabikka mizeezo yakwe muli basikulemba Bbaibbele. Kwiinda mubbuku lyakwe lilibedelede, Leza wakuyubununa kuyanda kwakwe kulindiswe. Alimwi wabuyubununa bube bwakwe, kubikkilizya aluyando, bululami alimwi aluse.—Kulonga 34:6; Deuteronomo 32:4.

•  Ncomukonzya kucita: Amulibale Bbaibbele abuzuba. (Joshua 1:8) Amuzinzibale kuyeeya kujatikizya nzyomubala, akulibuzya kuti: ‘Ino eeci cindiyiisya nzi kujatikizya Leza kumugama?’—Intembauzyo 77:12.

   Mucikozyanyo, amubale Jeremiya 29:11, mpoonya mulibuzye kuti: ‘Ino ncinzi Leza ncayanda kujatikizya ndime—luumuno naa mapenzi? Sena ngu Leza uupilusizya cibi, naa uyanda kuti ndikabe abuumi bubotu kumbele?’

 Amulangisisye zilenge

•  Ncolyaamba Bbaibbele: Bube bwa [Leza] butalibonyi bulalibonya caantangalala kuzwa ciindi naakalenga nyika kuyakumbele, nkaambo bulabonwa muzintu nzyalengede.”—Baroma 1:20.

•  Bupanduluzi: Zilenge zya Leza ziyubununa zibeela zyabube bwakwe, mbubonya zintu zizekawudwe mboziyubununa zinji kujatikizya sikuzekaula naa muncini mbouyubununa zinji kujatikizya sikuupanga. Mucikozyanyo, bumpiyo-mpiyo bwabongo bwamuntu alimwi anzyobukonzya kucita citondezya busongo bwa Leza, mpoonya kweendelezyeka kwanguzu zili muzuba alimwi anyenyeezi kutondezya nguzu zyakwe.—Intembauzyo 104:24; Isaya 40:26.

•  Ncomukonzya kucita: Amujane cindi cakweebelela alimwi akwiiya kujatikizya zilenge. Ciindi nomucita oobo, amulibuzye kuti, ‘Ino mbozipangidwe zilenge ziyubununa nzi kujatikizya Leza?’ a Masimpe kuti, kuli zintu bubumbo nzyobutakonzyi kutwaambila kujatikizya Mulengi wesu. Nkakaambo kaako wakatupa Bbaibbele.

 Amubelesye zina lya Leza

•  Ncolyaamba Bbaibbele: “Ndiyoomukwabilila akaambo kakuti ulilizyi zina lyangu. Walo uyoondiita, eelyo ndiyoomuvwiila.”—Intembauzyo 91:14, 15.

•  Bupanduluzi: Leza ooyo uujisi zina lyakuti Jehova, ulababikkila maano kapati aabo balizyi zina lyakwe alimwi akulibelesya munzila yabulemu. b (Intembauzyo 83:18; Malaki 3:16) Leza walizyibya kulindiswe kwiinda mukutwaambila zina lyakwe limugeme. Waamba kuti, “Ndime Jehova. Eeli ndezina lyangu”.—Isaya 42:8.

•  Ncomukonzya kucita: Amubelesye zina lya Jehova ciindi nomwaamba kujatikizya nguwe.

 Amubandike a Jehova mumupailo

•  Ncolyaamba Bbaibbele: “Jehova ulaafwaafwi abaabo boonse bamwiita.”—Intembauzyo 145:18.

•  Bupanduluzi: Jehova ulaswena afwaafwi kuli baabo bapaila kulinguwe kabajisi lusyomo. Mupailo ncibeela cabukombi citondezya bulemu mbotujisi kuli Leza.

•  Ncomukonzya kucita: Lyoonse amupaile kuli Leza . (1 Batesalonika 5:17) Amumwaambile zimulibilisya alimwi ambomulimvwa.—Intembauzyo 62:8. c

 Amuyumye lusyomo muli Leza

•  Ncolyaamba Bbaibbele: “Ikuti kakunyina lusyomo tacikonzyeki pe kumukkomanisya Leza.”—Bahebrayo 11:6.

•  Bupanduluzi: Kutegwa tube balongwe ba Leza, tweelede kuba alusyomo mulinguwe. Mu Bbaibbele, kuba alusyomo cibikkilizya zinji kutali buyo kusyoma kuti Leza nkwali. Cibikkilizya kumusyoma cakumaninina, kusyoma kuti zisyomezyo zyakwe ziyoozuzikizyigwa alimwi akuti zyeelelo zyakwe nzyabusongo. Kutegwa mube acilongwe cibotu amuntu umwi mweelede kumusyoma.

•  Ncomukonzya kucita: Lusyomo lwini-lwini luyeeme aluzyibo. (Baroma 10:17) Aboobo amwiiye Bbaibbele akusinizya nobeni kuti mulakonzya kumusyoma Leza alimwi alulayo lwakwe. Bakamboni ba Jehova bayookkomana kwiiya Bbaibbele andinywe. d

 Amucite zintu zimukkomanisya Leza

•  Ncolyaamba Bbaibbele: “Kuyanda Leza caamba kuti katubamba milawo yakwe.”—1 Johane 5:3.

•  Bupanduluzi: Jehova ulaafwaafwi abaabo batondezya luyando kulinguwe kwiinda mukusolekesya kutobela milawo yakwe.

•  Ncomukonzya kucita: Ciindi nomwiiya Bbaibbele, amubone zintu Leza nzyayanda anzyatayandi. Amulibuzye kuti, ‘Ino mumbazu nzi mondeelede kubambulula kutegwa ndikkomanisye Mulengi wangu?’—1 Batesalonika 4:1.

 Amulubelesye lulayo lwa Leza kutegwa mulumvwe luyando lwakwe

•  Ncolyaamba Bbaibbele: “Amulabile mubone kuti Jehova mubotu.”—Intembauzyo 34:8.

•  Bupanduluzi: Leza ulamutamba kuti mulibonene nobeni mbwali mubotu. Ciindi nomulibonena luyando lwakwe alugwasyo, muyooyanda kuba acilongwe anguwe.

•  Ncomukonzya kucita: Ciindi nomubala Bbaibbele, amulubelesye lulayo lwa Leza kutegwa mubone bubotu mbomuyoojana akaambo kakucita oobo. (Isaya 48:17, 18) Alimwi amulangilile zikozyanyo zyabamwi, balo ibakazunda buyumuyumu, ibakacinca buumi bwabo abwa mikwasyi yabo alimwi ibakajana lukkomano lwini-lwini kwiinda mukugwasyigwa a Leza. e

 Makani aataluzi: Tatukonzyi kumuzyiba Leza nkaambo walo maseseke.

 Makani aamasimpe: Makani amwi aajatikizya Leza alakatazya kwaamvwisya, mbuli aakuti Muuya uutalibonyi. Nokuba boobo, tulakonzya kumuzyiba Leza. Mubwini, Bbaibbele lyaamba kuti tweelede kumuzyiba kutegwa tukabe abuumi butamani. (Johane 17:3) Bbaibbele lilatwaambila kujatikizya Mulengi wesu, lilayubununa bube bwakwe, makanze aakwe kujatikizya nyika abantu, alimwi azyeelelo zyakwe, munzila njotukonzya kumvwisya. (Isaya 45:18, 19; 1 Timoteyo 2:4) Alimwi kweelana ambokwaambwa kale, Bbaibbele lilaliyubununa azina lya Leza. (Intembauzyo 83:18) Aboobo kunze lyakumuzyiba buyo, tulakonzya akuswena kulinguwe.—Jakobo 4:8.