Kujatikizya buumi bwa Jesu, mwaapostolo Johane wakalemba boobu: “Ooyo iwakalibonena zyintu eezyi wapa bumboni, kumane bumboni bwakwe mbwamasimpe alimwi muntu ooyo ulizyi kuti waamba zyintu zyamasimpe, ikutegwa anywebo musyome.”—Johane 19:35.

 Kaambo kamwi ncotweelede kusyoma Makani Mabotu aakalembwa a Matayo, Maako, Luka, a Johane nkakuti ibakalibonena zyintu eezyo kazicitika bakacili kupona. Kweelana ankwaakazwa makani aamwi, Makani Mabotu aa Matayo akalembwa mumwaka walusele kuzwa ciindi Kristo naakafwa, nkokuti mu 41 C.E. Basikwiiya Bbaibbele banji bazumina mwaka umwi wamyaka yakatobela, pele kuli kuzumizyanya kwakuti mabbuku woonse aa Banakristo aa Chigiliki akalembwa mumwaanda wamyaka wakusaanguna C.E.

 Bantu bakamubona Jesu ciindi naakacili kupona anyika, bakalibonena lufwu lwakwe, alimwi akubona kubusyigwa kwakwe bakali kukonzya kusinizya zibalo zya Makani Mabotu. Alimwi bakali kukonzya kuyubununa twaambo twatakaluzi kuti nitwakaliko. Basyaazibwene ba F. Bruce bakaamba kuti: “Akati katwaambo tukulwaizya twakali kucitika ciindi baapostolo bakusaanguna nobakali kukambauka ntwakuti bakali kwaamba cakusinizya twaambo twakali kweendelana azyintu nzyobakazyi baswiilizi babo; tiibakali kwaamba buyo kuti, ‘tuli bakamboni bazyintu eezyi’ pele bakali kwaamba kuti, ‘mbubonya mbomuzyi nywebo nobeni’ (Milimo 2:22).”