Tukkiti twaaŋanda tuzyibidwe kuti ntupaale. Ciindi notulanga, tukkiti tubelesya 24 pesenti yaciindi eeci kulibamba kabotu kutegwa katuli tupaale. Lino icipa tukkiti kulibamba kabotu milaka yantuto iipangidwe munzila iigambya.

Amulange-lange: Mulaka wakakkiti ujisi tuntu tutegwa papillae ituli 290 twalo tuboneka mbuli kuti tulibosyedwe kumbele, ituyumu mbuli mala. Tuntu ootu tupangidwe munzila yakuti katucikonzya kuteekezya mate ciindi mulaka nouli mukanwa. Mpoonya kakkiti nokamyaankuta boya bwankako, tuntu ootu tulanjila muboya akupiila mate alukanda lwakakkiti.

Mulaka wakakkiti ulakonzya kupiila mate aasika ku 48 milliliters kuboya alimwi akulukanda lwankako abuzuba. Mate aaya apangidwe munzila yakuti kaacikonzya kugusya dooti. Kuyungizya waawo, ciindi mate nayaabuyuma cipa kakkiti kwiindwa muwo, eeci cilagwasya nkaambo tukkiti tatujisi tupulo tunji mwakuzwida nkasaalo.

Ikuti ka papilla kooba muboya bupombene, inga kalanjila muboya calo cipa kuti kabe anguzu zyakuzambununa boya ibupombene. Akaambo kambokapangidwe kumbele, ka papilla kalakonzya kulusinsimuna lukanda lwakakkiti ciindi nokalisalazya. Basikuvwuntauzya bakaiya mboupangidwe mulaka wakakkiti ciindi nobakapanga cibbulasyo camasusu. Cibbulasyo eeci cilaakamuna masusu kakunyina kubelesya nguzu kapati alimwi tacikatazyi kusalazya kumane cilakonzya kwaazambununa masusu aapombene. Basikuvwuntauzya baamba kuti balakonzya kuba anzila zibotu zyakubamba zintu ziboneka mbuli masusu aapombene kwiinda mukwiiya mboupangidwe mulaka wakakkiti. Alimwi cilakonzya kubagwasya kuyungizya luzyibo lwabo mumakani aakunanika mafwuta naa musamu kulukanda luvwumbidwe mumasusu.

Ino Muyeeya Buti? Sena mulaka wakakkiti wakabako kwiinda mukusanduka naa wakalengwa buya?