Buk Song 97:1-12
97 Jehova i kamap King pinis!+
Graun, yu mas amamas.+
Na ol ailan, yupela i mas belgut.+
2 Ol klaut na bikpela tudak i raunim em;+Na stretpela pasin na pasin i fea i stap olsem as bilong sia king bilong em.+
3 Paia i save go paslain long em+Na i kukim ol birua bilong em i stap long olgeta hap.+
4 Laitning bilong em i sut i go na lait bilong em i kamap long graun;Graun i lukim na i save guria.+
5 Ol maunten i melt long ai bilong Jehova olsem gris bilong kandel i melt,+Long ai bilong Bikpela bilong graun olgeta, ol maunten i melt.
6 Heven i tokaut long stretpela pasin bilong em,Na olgeta lain manmeri i lukim glori bilong em.+
7 Ol man i litimapim nem bilong ol god giaman bilong ol,+Na ol man i lotu long ol imis em ol i bin wokim, ol i mas kisim sem.+
Yupela olgeta god i mas brukim skru* long em.+
8 Saion i harim na i amamas;+Na ol taun bilong Juda i belgutLong wanem, ol i amamas long kot bilong yu, O Jehova.+
9 O Jehova, yu God Antap Tru, na yu stap antap tru long graun;Ol i litimapim yu winim olgeta arapela god.+
10 Yupela ol manmeri i save laikim Jehova, yupela i mas heitim tru pasin nogut.+
Em i save lukautim ol man i save stap gut long em;+Em i save kisim bek ol long han* bilong ol man nogut.+
11 Lait i kamap long ol stretpela manmeri+Na ol man i gat gutpela bel, ol i ken amamas.
12 Yupela ol stretpela manmeri, yupela i ken amamas long Jehova,Na tok tenkyu long nem holi bilong em.
