1. Wanem samting i pasim famili bilong Adam na Iv long go insait long gaden Iden? Abel i gat bikpela laik tru long wanem samting?

 ABEL i lukluk long lain sipsip bilong em i kaikai i stap long sait bilong maunten. Na ating, em i lukluk i go longwe abrusim hap ol sipsip bilong em i stap na em inap lukim wanpela lait. Em i save dispela lait em wanpela bainat i gat paia, i tanim tanim long olgeta taim, na i pasim ol man long i go insait long gaden Iden. Bipo papamama bilong em i bin stap long dispela hap, tasol nau papamama na ol pikinini bilong ol i no inap i go insait long en. Piksaim long tingting olsem win bilong apinun i bloim gras bilong Abel taim em i lukluk i go antap na tingim Man Bilong Wokim em. Olsem wanem? Ol man inap kamap wanbel gen wantaim God? Abel i gat bikpela laik tru long dispela samting i mas kamap.

2-4. Olsem wanem Abel i autim tok long yumi long nau?

² Long nau Abel i toktok long yu. Yu inap harim em? Ating yu bai tok dispela samting i no inap kamap. Dispela namba 2 pikinini man bilong Adam i dai longtaim pinis. Klostu 6,000 yia i go pinis na ol bun bilong em i kamap graun pinis. Baibel i stori long ol daiman olsem: “Ol i no save long wanpela samting.” (Ekl. 9:5, 10) Na tu, Abel i no kamapim wanpela tok i stap long Baibel. So olsem wanem em inap autim tok long yumi?

³ Holi spirit i kirapim aposel Pol long stori long Abel olsem: “Abel i dai pinis, tasol long rot bilong bilip bilong em, i olsem em i autim tok yet long yumi.” (Ritim Hibru 11:4.) Abel i autim tok long wanem rot? Long rot bilong bilip bilong em. Abel em i fes man husat i bin kisim dispela gutpela pasin bilong bilip. Em i kamapim klia bilip bilong em, olsem na em i stap gutpela piksa tru long yumi ken bihainim long nau. Sapos yumi kisim skul long bilip bilong em na wok strong long bihainim, orait i olsem Abel i autim tok long yumi.

⁴ Baibel i no stori tumas long Abel, tasol yumi inap kisim wanem skul long pasin na bilip bilong em? Orait yumi ken skelim.

5. Taim Jisas i stori long Abel na “ol manmeri i bon long graun,” wanem mining bilong tok bilong em? (Lukim tu futnot.)

⁵ Abel i bon bihain long God i bin wokim namba 1 man na meri. Jisas i stori long Abel olsem em i bin stap long taim “ol manmeri i bon long graun.” (Ritim Luk 11:50, 51.) Tok bilong Jisas i kamapim olsem em i toktok long ol manmeri em God bai kisim bek ol long sin. Abel em namba 4 man i bin kamap long graun, na i luk olsem em i fes man God i kisim bek em long sin. a I klia tru olsem Abel i kamap bikpela namel long ol man i no stap olsem gutpela piksa.

6. Abel i gat wanem kain papamama?

⁶ Maski ol i stap sotpela taim tasol, ol i no stap amamas tumas. Papamama bilong Abel, em Adam na Iv, tupela i gat naispela na strongpela skin. Tasol ol i bin mekim bikpela rong tru, na ol i save long dispela. Bipo ol i gutpela olgeta, na ol inap i stap laip oltaim oltaim. Tasol ol i bikhet long Jehova God na em i rausim ol long Paradais long gaden Iden. Ol i putim laik bilong ol i go pas long olgeta narapela samting—na tu, ol samting ol pikinini bilong ol i nidim—ol i lusim laip i gutpela olgeta na laip oltaim oltaim.​—Stt. 2:15–3:24.

7, 8. Iv i tok wanem taim Kein i bon? Ating em i gat wanem tingting?

⁷ Adam tupela Iv i stap ausait long gaden Iden, na laip i hatwok tru. Tasol taim fes pikinini bilong ol, Kein, i bon, Iv i tok: “Jehova i bin helpim mi na mi karim wanpela pikinini man.” Tok bilong Iv i soim olsem ating em i tingim tok promis Jehova i bin mekim long gaden Iden, olsem wanpela meri bai kamapim “pikinini” husat bai  bagarapim dispela man nogut i bin paulim Adam tupela Iv. (Stt. 3:15; 4:1) Yu ting Iv i tingim olsem em yet i dispela meri long tok profet na Kein i dispela “pikinini”?

⁸ Sapos em i ting olsem, sori tru em i popaia. Na tu, sapos Adam na Iv i bin tokim Kein olsem em i dispela pikinini, dispela inap mekim na pasin antap bilong em i go bikpela. Bihain, Iv i karim namba 2 pikinini man, tasol em i no mekim wankain tok long dispela pikinini olsem em i mekim long Kein. Ol i givim nem Abel long em, ating mining bilong en i olsem “Winim Win Long Maus,” o “Samting Nating.” (Stt. 4:2) Olsem wanem? Dispela nem tupela i givim i soim olsem ol i ting gutpela samting inap kamap long Kein, tasol Abel nogat? Yumi no save long dispela.

9. Ol papamama long nau inap kisim wanem skul long tupela fes papamama?

⁹ Ol papamama long nau inap lainim planti samting long dispela tupela fes papamama. Olsem wanem? Long tok na pasin yupela i mekim, yupela bai strongim pasin bilong ol pikinini bilong yupela long hambak, tingim ol yet, na strong long kisim namba? O bai yupela i lainim ol long laikim tru Jehova God na kamap pren bilong em? Sori tru, tupela fes papamama i no mekim gut wok bilong ol. Tasol gutpela samting inap painim ol pikinini bilong ol.

10, 11. Kein na Abel i mekim wanem kain ol wok? Abel i kisim wanem gutpela pasin?

¹⁰ Taim tupela mangi i kamap bikpela, ating Adam i bin skulim ol long mekim ol wok bilong lukautim famili long kaikai samting. Kein i kamap fama; Abel i kamap wasman bilong sipsip.

¹¹ Tasol Abel i mekim samting i bikpela moa. Insait long ol dispela yia, em i kisim pasin bilong bilip—em dispela gutpela pasin bihain Pol i stori long en. Tingim dispela! I no gat wanpela man i stap olsem gutpela eksampel em Abel i ken bihainim. So olsem wanem em i kisim pasin bilong bilip long Jehova God? Skelim 3-pela samting i as na em i kisim strongpela bilip.

12, 13. Olsem wanem pasin bilong lukim ol samting Jehova i wokim i helpim Abel long kamap strong long bilip?

¹² Ol samting Jehova i wokim. Tru, Jehova i mekim tok bilong bagarapim graun, na graun i kamapim ol rop i gat nil na ol gras nogut na i hatwok long kamapim kaikai long gaden. Tasol graun i kamapim kaikai inap long lukautim famili bilong Abel. Na God i no mekim tok bilong bagarapim ol animal, ol pis na pisin; ol maunten, ol raunwara, ol wara, na solwara; na skai, ol klaut, san, mun, na ol sta. Long olgeta hap Abel i lukluk, em i lukim ol samting i kamapim klia pasin laikim, savetingting, na gutpela pasin bilong Jehova God, em dispela Man i bin wokim olgeta samting. (Ritim Rom 1:20.) Tru  tumas, pasin bilong tingim tingim long bel ol dispela samting i strongim bilip bilong Abel.

¹³ Abel i lusim haptaim bilong tingim tingim God. Piksaim long tingting Abel i was long ol sipsip bilong em. Wasman bilong sipsip i mas wokabaut planti. Em i kisim ol sipsip i go long ol maunten na brukim ol veli na wara—oltaim em i painim gutpela gras na wara, na ol gutpela ples we ol sipsip i ken malolo long en. Long olgeta animal God i bin wokim, i luk olsem ol sipsip i no gat strong bilong lukautim ol yet, i olsem God i bin wokim ol bilong ol man i ken stiaim na protektim ol. Yu ting Abel i luksave olsem em tu i nidim Man i gat bikpela savetingting na strong i winim olgeta narapela, long stiaim, protektim, na lukautim em? Yumi save em i bin kamapim ol kain tok long ol beten bilong em, dispela i mekim na bilip bilong em i wok long kamap strong.

14, 15. Ol tok promis bilong Jehova i kirapim Abel long tingim tingim long bel wanem samting?

¹⁴ Ol tok promis bilong Jehova. Ating Adam na Iv i stori long ol pikinini man bilong ol long ol samting i bin kamap long gaden Iden we i mekim na God i rausim ol. Olsem na i gat planti samting Abel i ken tingim tingim long bel.

¹⁵ Jehova i mekim tok olsem graun bai bagarap. Abel inap lukim ol rop i gat nil na ol gras nogut i kamap na i truim dispela tok. Jehova i bin tok tu olsem Iv bai pilim pen taim em i laik karim pikinini. Taim ol brata na susa bilong Abel i bon, em i lukim olsem dispela tok tu i kamap tru. Jehova i tok profet olsem Iv bai i gat bikpela laik long man bilong em i mas laikim na tingim em, na Adam bai bosim em. Abel i lukim dispela pasin namel long papamama bilong em. Long olgeta samting, Abel i lukim olsem ol tok bilong Jehova i save kamap tru. So i gat as tru na Abel inap bilip long tok promis bilong God, olsem wanpela “pikinini” bai kamap na stretim olgeta hevi i bin kamap long Iden.​—Stt. 3:15-19.

16, 17. Abel i kisim wanem skul long pasin bilong ol serap?

¹⁶ Ol wokman bilong Jehova. Abel i no lukim wanpela man olsem gutpela eksampel long bihainim, tasol i gat ol ensel long graun long dispela taim we Abel inap lukim na bihainim bilip bilong ol.  Taim Jehova i rausim Adam na Iv long gaden, em i putim ol serap—ol ensel i gat bikpela namba—wantaim bainat i gat paia i lait long en na i tanim tanim oltaim na ol i sanap long rot i go insait long dispela gaden. Jehova i mekim olsem na bai tupela na ol pikinini bilong ol i no inap i go insait long dispela Paradais long graun.​—Ritim Stat 3:24.

¹⁷ Piksaim long tingting filings bilong Abel taim em i liklik mangi yet na em i lukim ol dispela serap. Ol i kisim bodi bilong man, na Abel inap lukim olsem ol i gat bikpela strong tru. Na em i kirap nogut tu long “bainat” i gat paia na i tanim tanim oltaim. Taim Abel i kamap bikpela, yu ting em i lukim olsem ol dispela serap i les na lusim wok bilong ol? Nogat. Long san na long nait, insait long planti planti yia, ol dispela strongpela ensel i gat gutpela tingting, ol i sanap long dispela hap. Olsem na Abel i kisim save olsem Jehova God i gat ol stretpela wokman, ol i stap gut long wok bilong ol. Abel i lukim ol dispela serap i stap gut long Jehova na bihainim tok bilong em, em ol pasin em i no lukim insait long famili bilong em. Tru tumas, gutpela eksampel bilong ol dispela ensel i strongim bilip bilong em.

18. Wanem sampela risen na yumi inap strongim bilip long nau?

¹⁸ Jehova i kamapim klia em yet long rot bilong ol samting em i wokim, ol tok promis bilong em, na gutpela eksampel bilong ol ensel bilong Em, so taim Abel i tingim tingim long bel ol dispela samting, dispela i strongim tru bilip bilong em. Yumi inap kisim gutpela skul long pasin bilong em, a? Na moa yet ol yangpela inap save tru olsem ol i ken kisim pasin bilong bilip strong long Jehova God, maski ol narapela long famili bilong ol i no mekim olsem. Yumi  inap lukim planti gutpela samting God i wokim, yumi gat Baibel olgeta, na i gat planti manmeri i stap olsem gutpela piksa long pasin bilong bilip, olsem na i gat planti risen na yumi inap strongim bilip long nau.

19. Bihain Abel i kliagut long wanem bikpela samting?

¹⁹ Taim bilip bilong Abel long Jehova i kamap strong moa, em i laik painim rot bilong kamapim klia bilip bilong em. Tasol man nating inap givim wanem samting long Krieta bilong yunives? God i no nidim wanpela presen o helpim bilong ol man, nogat. Bihain Abel i kliagut long wanpela bikpela samting: Sapos bel i kirapim em long givim nambawan gutpela samting em i gat long Jehova, gutpela Papa bilong em long heven bai amamas.

20, 21. Kein na Abel i givim wanem ol ofa long Jehova, na em i mekim wanem?

²⁰ Abel i redi long givim sampela sipsip bilong em olsem ofa. Em i kisim ol gutpela sipsip tru, ol namba 1 sipsip mama i bin karim, na em i ofaim tu ol nambawan gutpela hap bilong ol dispela sipsip. Kein tu i laik God i amamas long em na blesim em, olsem na em i kisim sampela gaden kaikai bilong em na redim bilong mekim ofa. Tasol tingting bilong em i no wankain olsem bilong Abel. Dispela samting i kamap ples klia taim 2-pela brata i givim ofa bilong ol.

²¹ Ating Kein na Abel i yusim ol alta na paia bilong givim ofa bilong ol, na ating ol i mekim ofa long hap we ol serap inap lukim, em ol mausman bilong Jehova long graun long dispela taim bipo. Jehova i mekim wanem? Baibel i tok: “Jehova i amamas long Abel na ofa bilong em.” (Stt. 4:4) Baibel i no stori long olsem wanem God i kamapim klia dispela.

22, 23. Wai na Jehova i amamas long ofa bilong Abel?

²² Wai na God i amamas long Abel? Yu ting em dispela ofa yet? Abel i givim samting i gat laip, em i kapsaitim blut we i makim laip. Yu ting Abel i save olsem dispela kain sakrifais i bikpela samting? Planti handret yia bihain long taim bilong Abel, God i tok long yusim pikinini sipsip i no gat bagarap long skin long mekim ofa bilong makim ofa bilong Pikinini man bilong em i gutpela olgeta, em “Pikinini Sipsip Bilong God,” we ol man bai kapsaitim blut bilong em i no gat asua long en. (Jon 1:29; Kis. 12:5-7) Ating Abel i no save o kliagut long olsem wanem Jehova bai yusim ol ofa long bihain.

²³ Tasol yumi save olsem: Abel i ofaim nambawan gutpela samting em i gat. Jehova i amamas long dispela ofa, na tu, em i amamas long Abel. Pasin bilong Abel long laikim Jehova na bilip long Em i kirapim em long ofaim sakrifais.

24. (a) Wai na yumi tok ofa bilong Kein i no gat rong long en? (b) Olsem wanem pasin bilong Kein i wankain long planti man long nau?

 ²⁴ Tasol Kein i gat narapela pasin. Jehova “i no amamas long Kein na ofa bilong em.” (Stt. 4:5) I no gat rong long ofa bilong Kein; bihain Lo Bilong God i tok man i ken givim gaden kaikai olsem ofa. (Wkp. 6:14, 15) Tasol Baibel i tok long Kein olsem “ol samting em i kamapim i nogut.” (Ritim 1 Jon 3:12.) Olsem planti man long nau, Kein i ting pasin bilong giaman tasol long givim bel long God, dispela em inap. Em i no gat strongpela bilip na em i no laikim Jehova, na dispela i kamap ples klia long pasin em i mekim.

25, 26. Jehova i givim wanem tok lukaut long Kein, tasol Kein i mekim wanem?

²⁵ Taim Kein i lukim olsem Jehova i no amamas long em, yu ting em i laik kisim skul long pasin bilong Abel? Nogat. Em i heitim tru brata bilong em. Jehova i lukim tingting i stap long bel bilong Kein na long pasin isi em toktok gut wantaim Kein. Em i givim tok lukaut long Kein olsem tingting bilong em inap kirapim em long mekim bikpela rong, na God i tok sapos Kein i senisim pasin bilong em, Em bai “givim biknem” long Kein.​—Stt. 4:6, 7.

²⁶ Kein i sakim tok lukaut bilong God. Em i singautim brata bilong em long go wokabaut wantaim em long bus. Long dispela hap Kein i paitim Abel na kilim em i dai. (Stt. 4:8) So Abel i kamap fes man long i dai long bilip bilong em. Em i dai pinis, tasol stori bilong em i stap yet long nau.

27. (a) Wai na yumi bilip olsem Abel em wanpela bilong ol lain bai kirap bek? (b) Hau na yumi save tru olsem wanpela taim bai yumi bungim Abel?

²⁷ I olsem blut bilong Abel i krai long Jehova God i mas bekim rong. Na God i givim panismen long man nogut Kein long pasin nogut em i bin mekim. (Stt. 4:9-12) Tasol bikpela samting moa, stori bilong bilip bilong Abel i autim tok long yumi long nau. Ating Abel i bin stap laip sotpela taim tasol—ating 100 yia samting—em sotpela haptaim long ol man bilong dispela taim bipo, tasol Abel i yusim gut laip bilong em. Taim em i dai, em i save Papa bilong em long heven, Jehova, i amamas long em. (Hib. 11:4) Yumi ken bilip tru olsem, Abel i stap long tingting bilong Jehova, em i wetim taim we God bai kirapim em bek long wanpela paradais long graun. (Jon 5:28, 29) Bai yu bungim em long Paradais? Yu inap, sapos yu tingting strong long putim gut yau long tok Abel i autim na bihainim strongpela bilip bilong em.