1, 2. (a) Wai na Hana i bel hevi taim em i redim ol samting bilong dispela raun? (b) Yumi inap kisim wanem skul long stori bilong Hana?

 HANA i bisi long redim ol samting bilong mekim raun bilong ol, na em i no laik tingim hevi bilong em. Em wanpela taim bilong amamas; long olgeta yia, man bilong em, Elkana, i save kisim famili olgeta i go bilong mekim lotu long haus lotu sel long Silo. Jehova i laik bai ol dispela bung i stap olsem taim bilong amamas. (Ritim Lo 16:15.) Na yumi ken ting olsem kirap long taim Hana i liklik yet, em i save amamas long ol dispela bung bilong lotu. Tasol inap sampela yia nau i gat ol senis long i stap bilong em.

² Em i gat gutpela man bilong em husat i laikim em. Tasol Elkana i gat narapela meri tu. Nem bilong em Penina, na i luk olsem em i laik tru long mekim Hana i bel hevi. Na long taim bilong ol dispela bung tu Penina i save painim rot bilong givim bikpela bel hevi long Hana. Em i mekim olsem wanem? Na bikpela samting moa, olsem wanem bilip bilong Hana long Jehova i helpim em long karim dispela bikpela hevi? Sapos sampela hevi i wok long daunim yu, na yu no stap amamas, ating bai yu pilim tru stori bilong Hana.

3, 4. Hana i gat wanem 2-pela bikpela hevi? Bilong wanem wan wan hevi i gat hatwok bilong en?

³ Baibel i stori long 2-pela bikpela hevi bilong Hana. Em inap mekim sampela samting long namba 1 hevi, tasol em i no inap mekim wanpela samting long namba 2 hevi. Namba 1, man bilong em i gat tupela meri, na seken meri i heitim em. Namba 2 hevi, em i no inap karim pikinini. Dispela em wanpela samting i givim hevi long olgeta maritmeri i laik karim pikinini; tasol long taim bilong Hana na long kalsa bilong em, dispela i save kamapim bikpela bel hevi tru. Olgeta wan wan famili i tingim olsem ol i mas kamapim pikinini na bai nem bilong famili i no ken lus. Taim meri i no inap karim pikinini, dispela i save givim bikpela bel hevi na sem long em.

⁴ Ating Hana inap strongim bel na karim dispela hevi sapos Penina i no stap. Taim man i gat planti meri, hevi i save kamap long sindaun bilong ol. Pasin bilong resis, birua, na kros pait i save kamap. Pasin bilong maritim planti meri, dispela i no stret wantaim lo God i bin putim long gaden Iden, olsem man i mas maritim wanpela meri tasol.  (Stt. 2:24) Olsem na Baibel i kamapim klia olsem pasin bilong maritim planti meri i save kamapim hevi, na hevi long famili bilong Elkana i stap olsem eksampel bilong dispela.

5. Bilong wanem Penina i laik bai Hana i bel hevi? Em i mekim wanem bilong bagarapim bel bilong Hana?

⁵ Elkana i laikim tru Hana. Stori bilong ol Juda bilong bipo i tok Elkana i bin maritim Hana pastaim, na sampela yia bihain em i maritim Penina. Maski stori bilong ol i tru o nogat, Penina i jeles tru long Hana, na em i painim planti rot bilong bagarapim bel bilong Hana. Penina inap karim pikinini, olsem na em i ting em i winim Hana. Olgeta taim Penina i karim wanpela nupela pikinini, em i pilim olsem em i win moa yet. Em i no sori long Hana na mekim isi bel bilong em taim Hana i bel hevi olsem em i no inap karim pikinini, nogat, Penina i yusim dispela long bagarapim bel bilong em. Baibel i tok, Penina “i save tok bilas long em bilong mekim em i bel hevi.” (1 Sml. 1:6) Penina i min long mekim dispela pasin. Em i laik bagarapim bel bilong Hana, na em i mekim olsem.

6, 7. (a) Maski Elkana i traim long mekim isi bel bilong Hana, wai na em i no tokim Elkana long olgeta samting? (b) Hana i no inap karim pikinini, yu ting dispela i makim olsem Jehova i no amamas long em? Stori long dispela. (Lukim futnot.)

⁶ I luk olsem, gutpela taim tru bilong Penina long mekim dispela pasin, em long taim ol i go long Silo long olgeta yia. Elkana i save givim wanpela hap bilong abus ol i ofaim long Jehova long olgeta wan wan pikinini bilong Penina—“ol pikinini man na ol pikinini meri bilong em.” Tasol Hana, meri em i laikim tru, i save kisim spesel hap bilong abus. Em nau, jeles meri Penina i tok bilas moa yet long Hana long em i no inap karim pikinini, olsem na tarangumeri Hana i krai nogut tru na em i no laik long kaikai. Elkana i lukim olsem bel bilong Hana i bagarap stret na em i no kaikai, olsem na em i laik mekim isi bel bilong em. Em i askim Hana: “Hana, wai na yu krai? Wai na yu no laik kaikai? Yu no ken bel hevi. Maski sapos yu gat 10-pela pikinini man o nogat, yu save olsem mi laikim yu.”​—1 Sml. 1:4-8.

⁷ Elkana i pilim tru hevi bilong Hana long em i no inap karim pikinini. Na Hana i pilim tru gutpela pasin bilong Elkana long soim olsem em i laikim em tru. a Tasol Elkana i no toktok long pasin birua bilong Penina; na Baibel i no tok Hana i bin  kamapim dispela samting long em. Ating Hana i pilim olsem, sapos em i tokaut long pasin bilong Penina, em yet bai kisim bikpela hevi moa. Yu ting Elkana inap senisim tru ol samting? Yu ting pasin birua bilong Penina long Hana bai go nogut moa yet, na ol pikinini na wokmeri bilong em bai bihainim pasin bilong em? Dispela inap mekim na Hana bai pilim olsem famili bilong em i no laikim em moa.

8. Taim yu bungim hevi long man i mekim nogut o i no mekim stretpela pasin long yu, wai na yu kisim bel isi taim yu tingim olsem Jehova em God bilong stretpela pasin?

⁸ Maski Elkana i save long olgeta pasin nogut bilong Penina o nogat, Jehova God i lukim olgeta samting. Baibel i kamapim long ples klia olsem God i lukim olgeta samting, na dispela i olsem wanpela tok lukaut long ol manmeri husat i save jeles liklik na mekim pasin birua. Tasol ol manmeri i no gat asua na ol i stap wanbel wantaim ol narapela, olsem Hana, ol i ken stap bel isi na save olsem God bilong mekim stretpela pasin bai stretim olgeta samting long taim na rot em yet i makim. (Ritim Lo 32:4.) Ating Hana i save long dispela samting, long wanem, em i go long Jehova bilong kisim helpim.

9. Yumi kisim wanem skul long pasin bilong Hana long redi long go long Silo maski em i save long samting birua meri bilong em bai mekim?

⁹ Long bikmoning yet, famili i bisi long redim ol samting. Olgeta i wok long redi long dispela raun bilong ol, na ol pikinini tu i mekim olsem. Bilong go long Silo, dispela bikpela famili i mas wokabaut inap 32 kilomita long ol ples maunten bilong Efraim. b Ol bai wokabaut long lek inap wanpela o tupela de. Hana i save long pasin meri birua bilong em bai mekim. Tasol Hana i no stap bek long haus. Olsem na i kam inap long nau, em i stap gutpela eksampel tru bilong ol manmeri i lotuim God. Em i no savetingting long larim pasin kranki bilong ol narapela i pasim yumi long lotuim God. Sapos yumi mekim olsem, bai yumi lus long kisim ol blesing we inap strongim yumi long karim hevi na sanap strong.

10, 11. (a) Bilong wanem Hana i go hariap long haus lotu sel? (b) Long beten, olsem wanem Hana i kamapim bel bilong em long Papa bilong em long heven?

¹⁰ Bihain long dispela bikpela famili i wokabaut long de olgeta long ol rot maunten i baut baut, na nau ol i kamap klostu long Silo. Silo i stap antap long wanpela liklik maunten na i gat ol maunten i antap moa i raunim. Taim ol i wok long kam klostu, ating Hana i tingim tingim ol tok em bai mekim taim em i beten long Jehova. Taim ol i kamap, famili i kaikai wantaim. Bihain Hana i lusim ol hariap na em i go long haus lotu sel bilong Jehova. Hetpris Eli i stap long hap, em i  sindaun klostu long pos bilong dua bilong haus lotu sel. Tasol tingting bilong Hana i stap long God bilong em. Long haus lotu sel, em i bilip olsem Jehova bai harim beten bilong em. Maski i no gat narapela inap pilim tru hevi bilong em, Papa bilong em long heven inap. Bel bilong em i bagarap stret, na em i kirap long krai.

¹¹ Hana i krai nogut tru na bodi bilong em i seksek, na long bel em i beten long Jehova. Maus bilong em i guria taim em i mekim tok long tingting bilong kamapim bel hevi bilong em. Em i beten longpela taim, na kamapim bel bilong em long Papa bilong em. Em i askim God long helpim em long inapim strongpela laik bilong em long karim pikinini, na tu, em i mekim sampela samting moa. Hana i no tingting tasol long kisim ol blesing i kam long God, nogat, em i laik givim tu ol samting em inap givim long God. So em i mekim wanpela promis olsem, sapos em i karim pikinini man, em bai givim dispela pikinini long mekim wok bilong Jehova long laip olgeta bilong em.​—1 Sml. 1:9-11.

12. Eksampel bilong Hana i soim olsem yumi mas tingim wanem samting taim yumi beten?

¹² Hana i stap gutpela eksampel long olgeta wokman bilong God long pasin bilong beten. Long gutpela pasin Jehova i singautim lain bilong em long autim olgeta tingting bilong ol long em na ol i no ken pret, ol i mas kamapim olgeta wari bilong ol long em olsem pikinini i save mekim long papa i gat pasin laikim. (Ritim Buk Song 62:8; 1 Tesalonaika 5:17.) Holi spirit i kirapim aposel Pita long raitim dispela gutpela tok long pasin bilong beten long Jehova, em i tok: “God i save wari long yupela, olsem na yupela i mas putim olgeta hevi bilong yupela long han bilong em.”​—1 Pita 5:7.

13, 14. (a) Wai na Eli i kisim tingting kranki long Hana? (b) Olsem wanem tok Hana i mekim long Eli i olsem gutpela eksampel long pasin bilong bilip?

¹³ Tasol ol man bilong graun i no inap kliagut na pilim hevi bilong narapela olsem Jehova i save mekim. Taim Hana i krai na beten i stap, em i kirap nogut long harim wanpela nek. Em Hetpris Eli, em i wok long lukluk long Hana. Em i tok: “Wai na yu spak? Yu mas lusim pasin bilong dring wain.” Eli i bin lukim maus bilong Hana i guria, em i krai nogut tru, na bel bilong em i no stap isi. Tasol em i no askim Hana long hevi bilong em, nogat; em i ting Hana i spak.​—1 Sml. 1:12-14.

¹⁴ Long dispela taim we Hana i bel hevi i stap, em i harim wanpela i sutim tok giaman long em na em i bel hevi moa yet—dispela tok i kam long wanpela man i holim bikpela namba! Tasol long dispela taim tu, Hana i stap gutpela eksampel long pasin bilong bilip. Em i no larim popaia bilong wanpela man i pasim em long lotuim Jehova. Long pasin rispek, em i eksplenim hevi bilong em long Eli. Ating Eli i toktok isi na tok: “Yu ken go wantaim bel isi na God bilong Israel i ken givim yu samting em yu bin askim em long en.”​—1 Sml. 1:15-17.

15, 16. (a) Hana i kamapim bel bilong em long Jehova na lotuim em long haus lotu sel, na dispela i mekim wanem long em? (b) Hau bai yumi inap bihainim eksampel bilong Hana taim yumi karim hevi long narapela i gat tingting kranki long yumi?

 ¹⁵ Taim Hana i kamapim bel bilong em long Jehova na lotuim em long dispela haus lotu sel, dispela i mekim wanem long Hana? Baibel i tok: “Em i lusim [Eli] na i go na em i kaikai na em i no bel hevi moa.” (1 Sml. 1:18) Nau bel bilong Hana i stap isi. I olsem em i kisim hevipela samting em i karim na em i putim long solda bilong wanpela i gat bikpela strong moa winim em yet, em Papa bilong em long heven. (Ritim Buk Song 55:22.) Yu ting i gat wanpela hevi i bikpela tumas long God? Nogat tru—long bipo, long nau, na long bihain tu, nogat!

¹⁶ Taim yumi pilim olsem ol hevi i daunim yumi, o bel bilong yumi i bagarap, i gutpela yumi bihainim pasin bilong Hana na autim hevi bilong yumi long dispela Man em Baibel i kolim em olsem “Man Bilong Harim ol prea.” (Sng. 65:2) Sapos yumi bilip na mekim olsem, ating bel hevi bilong yumi bai pinis na yumi kisim “dispela bel isi bilong God i winim tru tingting bilong man.”​—Fili. 4:6, 7.

17, 18. (a) Olsem wanem Elkana i soim olsem em i sapotim tok promis bilong Hana? (b) Penina i no inap mekim wanem samting moa long Hana?

¹⁷ Long neks moning, Hana i go bek long haus lotu sel wantaim Elkana. Ating em i tokim Elkana long samting em i bin askim God long en na tok promis em i bin mekim, long wanem, Lo Bilong Moses i tok man marit i gat rait long pinisim tok promis bilong meri sapos meri i no bin kisim tok orait long man bilong em pastaim. (Nam. 30:10-15) Tasol dispela bilipman i no mekim olsem. Em na Hana i lotu long Jehova long haus lotu sel, na bihain ol i go bek long haus.

¹⁸ Wanem taim Penina i luksave olsem em i no inap moa long bagarapim bel bilong Hana? Baibel i no tok, tasol dispela hap tok “em i no bel hevi moa” i makim olsem kirap long dispela taim Hana i amamas na i no tingim moa dispela hevi. Nau Penina i lukim olsem ol samting em i mekim bilong nogutim Hana i lus nating. Baibel i no kamapim moa nem bilong Penina.

19. Hana i kisim wanem blesing? Olsem wanem em i kamapim olsem em i amamas long Man i givim dispela blesing?

¹⁹ Ol mun i kam i go pinis na Hana i stap bel isi na em i kisim bikpela amamas tru. Em i gat bel nau! Em i amamas tru, tasol i no gat wanpela taim em i lusim tingting long Man i givim dispela blesing. Taim bebi i bon, em i givim nem Samuel long em, mining bilong en “Nem Bilong God,” na yumi ken ting dispela i makim pasin bilong singaut long nem bilong God, olsem Hana i bin mekim. Long dispela yia, Hana i no go wantaim Elkana na famili long Silo. Em i stap long haus wantaim pikinini inap 3-pela yia, i go inap long taim pikinini i lusim  susu. Orait nau em i strongim bel na redi long de pikinini man em i laikim tru bai lusim em.

20. Olsem wanem Hana na Elkana i truim tok promis ol i bin mekim long Jehova?

²⁰ Hana bai bel hevi tru taim em i go lusim pikinini man bilong em. Tru, Hana i save, ol meri i wok long haus lotu sel long Silo bai lukautim gut Samuel. Em i liklik boi yet, na ol mama i laik tru long stap wantaim pikinini bilong ol. Tasol Hana na Elkana i bringim liklik boi i go, ol i amamas long mekim, na ol i no bel hevi. Tupela i ofaim ol sakrifais long haus bilong God, na ol i givim Samuel long Eli, na tokim em gen long dispela tok promis Hana i bin mekim 3-pela yia i go pinis.

21. Olsem wanem beten bilong Hana long Jehova i soim strongpela bilip bilong em? (Lukim blok “ Tupela Beten i Narapela Kain Tru.”)

²¹ Hana i mekim wanpela beten we God i tingim olsem i gutpela beten na em i putim long Baibel. Taim yu ritim tok bilong Hana long 1 Samuel 2:1-10, bai yu pilim tru strongpela bilip bilong em i kamap klia long olgeta wan wan ves. Hana i preisim Jehova long ol gutpela wok em i mekim long strong bilong em—bikpela strong bilong em long daunim ol man i gat pasin antap, blesim ol man ol narapela i daunim ol, na pinisim laip bilong man o kisim bek ol man long indai. Em i preisim Papa bilong em long pasin holi bilong em, stretpela pasin, na pasin bilong em long truim ol tok bilong em. I gat gutpela risen na Hana inap tok: “I no gat wanpela ston i strong olsem God bilong mipela.” Yumi inap tru long bilip na wet long Jehova, em i no save senis, em i olsem ples hait bilong ol man i stap tarangu na ol narapela i daunim ol na ol i askim em long helpim ol.

22, 23. (a) Hau na yumi save olsem taim Samuel i go bikpela em i save olsem papamama bilong em i laikim em? (b) Jehova i givim wanem blesing moa long Hana?

²² Liklik Samuel i amamas tru olsem em i gat mama husat i bilip strong tru long Jehova. Tru, taim em i wok long i go bikpela, ating em i misim tru mama, tasol em i no pilim  olsem mama i lusim tingting long em. Long olgeta yia, Hana i save go long Silo, em i bringim wanpela liklik longpela siot i no gat han, bilong Samuel long mekim wok long haus lotu sel. Em yet i samapim dispela siot, dispela i kamapim olsem em i tingim na laikim tumas pikinini bilong em. (Ritim 1 Samuel 2:19.) Yumi inap piksaim long tingting Hana i putim nupela longpela siot long pikinini, stretim gut, lukluk long em na givim gutpela tok bilong strongim bel bilong em. Samuel i amamas long em i gat gutpela mama olsem, na taim em i go bikpela em yet i stap olsem gutpela blesing bilong papamama na lain Israel.

²³ Tasol God i no lusim tingting long Hana. Jehova i blesim em na em i karim 5-pela pikinini moa bilong Elkana. (1 Sml. 2:21) Tasol gutpela blesing tru bilong Hana, em i pas gut wantaim Papa bilong em, Jehova, na dispela pasin i wok long kamap strong moa. Wankain samting i ken kamap long yu tu, taim yu bihainim bilip bilong Hana.