1-3. Pita i bin lukim wanem samting i kamap long dispela de, na long nait em i mekim wanem?

 PITA i taitim bun tru long pul, em nait na em i lukluk i go. Em i lukim wanpela liklik lait i kamap longwe long hap is, ating em mak bilong tulait i laik bruk. Ol masol long baksait na solda bilong em i pen, long wanem, em i bin pul inap planti aua. Dispela win i paitim nabaut gras bilong Pita i kirapim Raunwara Galili na i raf. Ol weiv i wok long paitim strong poret bilong bot bilong kisim pis na i wasim Pita. Em i pul yet i go.

² Pita na ol poroman bilong em i bin lusim Jisas wanpela i stap long nambis. Long dispela de, ol i bin lukim Jisas i kisim sampela bret na pis na givim kaikai long planti tausen manmeri em ol i hangre. Dispela i mekim na ol manmeri i painim Jisas bilong mekim em i kamap king, tasol em i no laik insait long wok politik. Na tu, em i tingting strong long helpim ol disaipel bilong em long no ken kisim dispela kain tingting. Em i salim ol manmeri i go, na em i tokim ol disaipel long kalap long bot na go long hapsait bilong nambis taim em wanpela i go long maunten long beten.​—Mak 6:35-45; ritim Jon 6:14-17.

³ Em klostu ful mun, na mun i stap namel long skai taim ol disaipel i kalap long bot; nau em i wok long go daun isi isi long hap wes. Tasol ol i bin pul i go inap sampela kilomita. Ol i taitim bun long pul, na bikpela nois bilong win na ol weiv i mekim na i hatwok long toktok. So taim Pita i wok long pul, ating em i tingting long ol samting.

4. Pita i strong long daunim wanem ol pasin na em i stap gutpela eksampel long yumi bihainim?

⁴ I gat planti samting em i wok long tingting long en! Pita i bin bungim Jisas bilong Nasaret fes taim winim 2-pela yia i go pinis na  planti samting i bin kamap insait long ol dispela yia. Em i bin lainim planti samting, tasol i gat planti samting moa em i mas lainim. Em i redi long mekim olsem—long wok strong long daunim pasin bilong holim tupela tingting na pret—na em i stap gutpela eksampel long yumi bihainim. Orait yumi ken skelim dispela.

5, 6. Pita i gat wanem kain sindaun?

⁵ Pita i no inap lusim tingting long dispela de em i bin bungim Jisas. Taim Brata bilong em, Andru, i bin bringim dispela gutpela nius long em fes taim, em i tok: “Mipela i painim pinis Mesaia.” Laip bilong Pita i senis taim em i harim dispela tok. I stap bilong em bai i no wankain moa olsem bipo.​—Jon 1:41.

⁶ Pita i stap long Kaperneam, em wanpela taun long hap not long nambis bilong raunwara ol i kolim Raunwara Galili. Em na Andru i save wok wantaim Jems na Jon, tupela pikinini man bilong Sebedi, long wok bisnis bilong painim pis. Tambu mama bilong Pita, na brata bilong em, Andru, i stap wantaim em na meri bilong em. Bilong lukautim famili, em i mas wok strong na taitim bun long painim kain kain rot long kisim pis. Yumi ken piksaim long tingting planti nait ol man i wok hat tru—ol i save tromoi umben i go daun namel long tupela bot na pulim kain kain pis long raunwara i kam antap. Na tu, yumi ken tingim bikpela wok ol i mekim inap planti aua long de bilong skelim skelim ol pis na salim, stretim na klinim gen ol umben.

7. Pita i harim wanem nius bilong Jisas? Wai na dispela i gutpela nius?

⁷ Baibel i tok, Andru, em wanpela disaipel bilong Jon Bilong Baptais. Ating Pita i save amamas long harim stori em brata bilong em i mekim long tok Jon i save autim. Wanpela taim, Andru i poin long Jisas bilong Nasaret na tok: “Lukim, em Pikinini Sipsip Bilong God!” Kwiktaim Andru i kamap disaipel bilong Jisas na em i amamas long tokim Pita long dispela gutpela nius: Mesaia i kamap pinis! (Jon 1:35-40) Bihain long pasin bikhet i kamap long Iden, olsem 4,000 yia samting i go pinis, Jehova God i bin tok promis olsem wanpela man bai i kam na i helpim ol man long wetim gutpela samting bai kamap. (Stt. 3:15) Andru i bin bungim dispela Man Bilong Kisim Bek ol man, em Mesaia! Na Pita tu i hariap i go bilong bungim Jisas.

8. Wanem mining bilong nem em Jisas i givim long Pita? Bilong wanem sampela man i gat tok yet long dispela nem?

⁸ I kam inap long dispela de, nem bilong Pita em Saimon, o Simeon. Tasol Jisas i lukim em na i tok: “‘Yu Saimon, pikinini bilong Jon. Bai ol i kolim yu Sifas’ (long tok Grik em “Pita”).” (Jon 1:42) Dispela nem “Sifas” mining bilong en, em “ston.” Tok Jisas i mekim i wanpela tok profet. Em i save olsem bihain Pita bai stap strong olsem wanpela ston i no inap surik—em inap tru long stiaim ol disaipel bilong Krais. Olsem wanem? Pita i ting em yet i dispela kain man?  Ating nogat. Sampela man long nau i save ritim ol stori bilong Ol Gutnius, ol i ting Pita i no kain olsem wanpela ston i stap strong na i no surik, nogat. Sampela i tok stori em Baibel i kamapim long pasin bilong Pita i soim olsem, em i no save holim strong wanpela tingting tasol, na em i save senisim hariap tingting.

9. Jehova na Pikinini bilong em i save lukluk long wanem samting? Wai na yu ting yumi mas bilip long tingting bilong ol?

⁹ Tru, Pita i gat ol pasin kranki bilong em. Jisas i save long ol dispela pasin. Tasol olsem Papa bilong em, Jehova, Jisas i save lukluk long ol gutpela pasin bilong ol man. Jisas i save Pita i gat planti gutpela pasin, na em i laik helpim Pita long mekim ol dispela pasin i kamap strong moa. Jehova na Pikinini bilong em i save lukim ol gutpela pasin bilong yumi long nau tu. Ating bai yumi ting olsem yumi no gat ol gutpela pasin em tupela inap long lukim. Tasol yumi mas bilip long tingting bilong tupela na redi long larim ol i skulim na stretim yumi olsem Pita i bin mekim.​—Ritim 1 Jon 3:19, 20.

10. Ating Pita i bin harim na lukim wanem ol samting? Maski i olsem em i go bek long mekim wanem?

¹⁰ Ating Pita i bin go wantaim Jisas taim em i mekim raun bilong em long autim tok. Na ating em i bin lukim Jisas i wokim fes mirakel bilong em, taim em i tanim wara i kamap wain long wanpela marit kaikai long Kana. Bikpela samting moa, em i bin harim ol tok Jisas i autim long ol gutpela samting bai kamap long rot bilong Kingdom Bilong God. Maski em i harim na lukim ol dispela gutpela samting, em i lusim Jisas na i go bek long wok bisnis bilong painim pis. Sampela mun bihain, Pita i bungim gen Jisas—na long dispela taim Jisas i singautim Pita long bihainim em na lusim bikpela haptaim long autim tok wantaim em.

11, 12. (a) Long nait olgeta, Pita i wok strong long mekim wanem? (b) Taim Pita i putim yau long tok bilong Jisas, ating em i tingim wanem ol askim?

¹¹ Long nait olgeta Pita i wok strong long kisim pis, tasol em i no kisim. Planti taim ol man bilong kisim pis i tromoi ol umben, tasol ol i pulim ol umben nating i kam antap. Ating Pita i yusim olgeta save bilong em long kisim pis, na em i bin traim kain kain hap bilong raunwara we ol pis i save kam bilong kaikai. Olsem planti man bilong painim pis, ating em tu i tingting olsem, em bai gutpela sapos em inap lukluk i go insait long dispela wara i tudak na lukim planti pis i bung bung i stap, o sapos em inap stiaim ol i go insait long ol umben. Em tru, ol dispela kain tingting inap mekim em i bel hevi moa yet. Em i no mekim olsem bilong painim amamas; dispela wok i helpim ol wanhaus bilong em. Nau Pita i kam han nating long nambis. Tasol em i mas klinim ol umben. Em i bisi long dispela wok taim Jisas i kam bungim em.

¹² Bikpela lain manmeri i bung raunim Jisas, ol i laik tru long harim tok. Ol manmeri i paspas, olsem na Jisas i kalap long bot bilong  Pita na askim em long pul i go longwe liklik long nambis. Ol manmeri long nambis inap harim klia nek bilong Jisas taim em i skulim ol. Pita i putim gut yau na harim tok, wankain olsem ol manmeri long nambis. Em i no les long harim Jisas i stori long bikpela tok em i autim—em Kingdom Bilong God. Em wanpela gutpela samting tru long helpim Krais long autim dispela tok long olgeta hap long ol gutpela samting bai painim ol manmeri long bihain! Tasol em gutpela tingting long Pita i mekim olsem? Hau bai Pita i lukautim famili bilong em long kaikai samting? Ating Pita i tingim gen nait olgeta em i bin wok long painim pis, tasol em i no kisim wanpela pis.​—Luk 5:1-3.

13, 14. Jisas i mekim wanem mirakel bilong helpim Pita? Pita i mekim wanem?

¹³ Taim Jisas i toktok pinis, em i tokim Pita: “Go aut long hap we wara i dip na tromoi ol umben bilong yupela i go daun bilong kisim pis.” Pita i gat tupela tingting. Em i tok: “Tisa, long nait olgeta mipela i wok hat tru na mipela i no kisim wanpela pis. Tasol yu tokim mipela long mekim, olsem na mi bai tromoi ol umben i go daun.” Nau tasol Pita i wasim ol umben. Ating em i no laik tromoi gen umben i go daun—moa yet long nau bikos em no taim bilong ol pis long kaikai! Tasol em i bihainim tok, na ating em i tromoi han long ol wanwok bilong em long namba tu bot long bihainim ol.​—Luk 5:4, 5.

¹⁴ Pita i pilim olsem umben i hevi nogut tru taim em i stat long pulim ol umben i kam antap. Man! Em i no inap bilipim dispela samting, em i pulim strong umben, na i no longtaim, em i lukim planti pis tru i kalap kalap insait long umben! Em i tromoi han long ol man long namba tu bot long kam helpim em. Ol i mekim olsem, tasol ol i luksave olsem wanpela bot tasol i no inap karim olgeta pis. Ol i pulapim tupela bot wantaim, tasol planti pis i stap yet—hevi bilong pis i mekim na ol bot i stat long sink. Pita i kirap nogut long dispela samting. Em i bin lukim Krais i yusim strong bilong em long bipo, tasol nau em i yusim strong bilong em long helpim Pita na famili bilong em. Jisas i gat strong tu long stiaim ol pis long go insait long ol umben! Pita i stat long pret. Em i brukim skru i go daun na tok: “Bikpela, lusim mi na go. Mi wanpela sinman.” Olsem wanem em inap soim olsem em inap tru long poromanim dispela Man husat i gat namba long yusim strong bilong God long ol kain rot olsem?​—Ritim Luk 5:6-9.

15. Jisas i tok wanem bilong skulim Pita olsem i no gat as long holim tupela tingting na pret?

¹⁵ Long gutpela pasin, Jisas i tok: “No ken pret. Stat long nau na i go, yu bai i gat wok long kisim ol man.” (Luk 5:10, 11) Nau i no taim  bilong holim tupela tingting o pret. I no gat as long Pita i holim tupela tingting long ol samting olsem wok bilong painim pis; pret em i gat long ol pasin kranki na tingting bilong em olsem em i no inap mekim wok autim tok, dispela tu i no gat as bilong en. Jisas i gat bikpela wok long mekim, em wanpela wok we bai senisim sindaun bilong olgeta man long bihain. Em i mekim wok bilong dispela God husat “bai fogivim  . . olgeta” man. (Ais. 55:7) Jehova bai lukautim Pita long ol samting em i nidim, ol samting bilong skin na bilip.​—Mat. 6:33.

16. Pita, Jems, na Jon i mekim wanem taim Jisas i singautim ol? Wai na dispela em nambawan gutpela disisen ol i bin mekim?

¹⁶ Wantu Pita i kirap long bihainim Jisas, na tu, Jems na Jon. “Ol i kisim ol bot i kam bek long nambis, na ol i lusim olgeta samting na bihainim em.” (Luk 5:11) Pita i bilip long Jisas na long Man husat i salim Jisas i kam. Em nambawan gutpela disisen em inap mekim. Long nau, ol Kristen i daunim pasin bilong holim tupela tingting na pret  bambai ol inap mekim wok bilong God, ol tu i soim olsem ol i gat bilip. Kain pasin bilong trastim Jehova i no save lus nating.​—Sng. 22:4, 5.

17. Pita i tingim wanem ol samting long dispela tupela yia kirap long taim em i bungim Jisas?

¹⁷ Klostu tupela yia bihain long Pita i bungim Jisas, em i pul long nait taim i gat strongpela win long Raunwara Galili, olsem yumi stori long kirap bilong dispela sapta. Tru, yumi no save em i wok long tingim wanem ol samting. I gat planti samting em inap tingting long en! Jisas i bin oraitim tambu mama bilong Pita. Jisas i bin mekim Bikpela Tok Long Maunten. Planti taim, long rot bilong ol mirakel na ol samting em i skulim ol man long en, em i kamapim klia olsem em i Man Jehova i Makim, dispela Mesaia. Sampela mun i lus, na Pita inap daunim ol pasin kranki bilong em, olsem pasin bilong pret na tupela tingting. Jisas i makim Pita long stap olsem wanpela bilong ol 12-pela aposel! Tasol Pita i no daunim olgeta pasin bilong pret na tupela tingting, em samting klostu nau em bai luksave long en.

18, 19. (a) Stori long samting Pita i lukim long Raunwara Galili. (b) Jisas i mekim wanem bilong bekim askim bilong Pita?

¹⁸ Long namba 4 hap bilong nait, o namel long 3 klok long moning na taim san i laik kam antap, wantu Pita i stop long pul na em i sindaun stret. Long hap—namel long ol weiv—wanpela samting i wok long muv! Ating em lait bilong mun i kisim weiv i bruk i go i kam? Nogat, dispela samting i sanap stret. Em wanpela man! Yes, wanpela man, na em i wokabaut antap long solwara! Taim em i wok long kam klostu, i luk olsem em i laik abrusim ol na i go. Ol disaipel i pret, ol i ting em wanpela spirit. Dispela man i tok: “Yupela strongim bel! Em mi tasol, no ken pret.”​—Mat. 14:25-28.

¹⁹ Pita i bekim tok: “Bikpela, sapos em yu tasol, orait tokim mi long wokabaut antap long wara na kam long yu.” Pastaim em i gat strongpela bel. Pita i amamas tru long lukim dispela narakain mirakel, na em i laik bai bilip bilong em i ken strong moa. Em yet i laik traim dispela samting. Long gutpela pasin, Jisas i tokim Pita long kam long em. Pita i kalap i go daun long sait bilong bot na sanap antap long wara i stap isi. Tingim samting Pita i pilim taim em i putim lek antap long wanpela samting i strong na bihain em i sanap antap long wara. Ating em i tingting planti stret taim em i wokabaut i go long Jisas. Tasol, bihain em i kisim narapela tingting.​—Ritim Matyu 14:29.

20. (a) Olsem wanem Pita i larim narapela samting i pulim tingting bilong em? Wanem samting i kamap? (b) Jisas i skulim Pita long tingim wanem samting?

²⁰ Pita i mas putim tingting olgeta i go long Jisas. Jisas i yusim strong bilong Jehova long mekim Pita i sanap antap long ol weiv i bruk i go i kam. Na Jisas i mekim olsem long wanem Pita i bilip long  em. Tasol Pita i larim narapela samting i pulim tingting bilong em. Baibel i tok: “Traipela win i mekim na em i pret.” Pita i lukim weiv i wok long paitim bot, na wara i go i kam nabaut, na em i pret. Ating em i piksaim olsem em i sink long dispela raunwara. Taim em i kirap long pret, bilip bilong em i no strong moa. Dispela man husat i kisim nem olsem Ston bikos long pasin bilong em long sanap strong, nau em i stat long sink olsem wanpela ston bikos bilip bilong em i no strong moa. Pita em hapman bilong swim, tasol em i no ting dispela bai helpim em. Em i singaut: “Bikpela, seivim mi!” Jisas i putim han i go na holim han bilong em na pulim em i kam antap. Taim ol i sanap yet antap long wara, Jisas i skulim Pita long tingim wanpela bikpela samting: “Bilip bilong yu i liklik, bilong wanem yu gat tupela tingting?”​—Mat. 14:30, 31.

21. Wai na pasin bilong holim tupela tingting inap bagarapim man? Hau bai yumi daunim dispela pasin?

²¹ “Tupela tingting”—dispela tok i stret tru! Pasin bilong holim tupela tingting i gat bikpela strong long bagarapim man. Sapos yumi larim dispela pasin i daunim yumi, isi isi em inap daunim na bagarapim bilip bilong yumi. Yumi mas wok strong long daunim dispela pasin! Hau bai yumi mekim olsem? Long rot bilong putim tingting olgeta long ol samting i stret. Sapos yumi tingting oltaim long ol samting i save pretim yumi, ol samting i save mekim yumi bel hevi, ol samting i save pulim nabaut tingting bilong yumi na yumi no tingim Jehova na Pikinini bilong em, orait pasin bilong holim tupela tingting bai i kamap strong long yumi. Sapos yumi putim tingting olgeta long Jehova na Pikinini bilong em, long ol samting ol i bin mekim, ol samting ol i wok long mekim, na ol samting ol bai mekim long ol man husat i laikim ol, orait yumi inap daunim pasin bilong holim tupela tingting we inap bagarapim yumi.

22. Wai na i gutpela long bihainim bilip bilong Pita?

²² Taim Pita i bihainim Jisas i go antap long bot, em i lukim strongpela win na biksi i dai. Raunwara Galili i slip isi stret. Pita wantaim ol arapela disaipel i tok: “Tru tumas, yu Pikinini Bilong God.” (Mat. 14:33) Taim tulait i bruk antap long raunwara, Pita i pilim tru dispela samting. Em i lain olsem em i mas sakim pasin bilong holim tupela tingting na pret. Tru tumas, em i mas mekim planti senis bambai em i ken kamap Kristen i stap strong olsem wanpela ston em Jisas i bin tok profet long en. Em i tingting strong long wok yet long kamap strong. Yu gat wankain tingting olsem Pita? I gutpela yumi bihainim bilip bilong Pita.