God i oganaisim ol tumbuna pikinini bilong Abraham i kamap wanpela lain na i givim ol lo long ol. Em i kolim dispela lain olsem “Israel,” na i givim wok long ol long lukautim lotu i tru na tok bilong Em. (Song 147:19, 20) Olsem na olgeta manmeri inap kisim blesing long rot bilong lain Israel.​—Ritim Stat 22:18.

God i makim lain Israel long kamap ol witnes bilong em. Ol samting i bin painim ol long bipo, i kamapim klia olsem pasin bilong bihainim ol lo bilong God i save helpim ol man. (Lo 4:6) Olsem na long rot bilong lain Israel, ol narapela inap kisim save long God tru.​—Ritim Aisaia 43:10, 12.

Bihain, God i no orait moa long lain Israel, na Jehova i makim kongrigesen Kristen olsem senis bilong en. (Matyu 21:43; 23:37, 38) Olsem na ol Kristen tru i stap olsem ol witnes bilong Jehova, na lain Israel nogat.​—Ritim Aposel 15:14, 17.

Jisas i oganaisim ol disaipel bilong em long autim tok na kamapim ol disaipel long olgeta lain man. (Matyu 10:7, 11; 24:14; 28:19, 20) Dispela wok i go bikpela tru long nau long pinis bilong taim bilong las de. Em i namba 1 taim long Jehova i bungim planti milion manmeri bilong olgeta kantri i kam long lotu i tru. (Revelesen 7:9, 10) God i oganaisim tu ol Kristen tru bambai ol i ken strongim na helpim narapela narapela. Long olgeta hap bilong graun, ol i save kisim wankain skul long Baibel long ol miting bilong ol.​—Ritim Hibru 10:24, 25.

Long 1870 samting, wanpela liklik lain Baibel sumatin i kirap long kisim gen stretpela save long ol tok i tru bilong Baibel. Ol i save olsem Jisas i bin oganaisim kongrigesen Kristen bilong autim tok, olsem na ol i kirapim wok bilong autim tok bilong Kingdom long olgeta hap. Long 1931, ol i kisim nem olsem ol Witnes Bilong Jehova.​—Ritim Aposel 1:8; 2:1, 4; 5:42.

Long taim bilong ol aposel, ol kongrigesen Kristen long planti hap i kisim helpim long wanpela lain i bosim ol Kristen, em ol i daun long Jisas olsem Het bilong kongrigesen. (Aposel 16:4, 5) Long nau tu, ol Witnes Bilong Jehova i kisim helpim long wanpela lain elda, em Gavening Bodi. Dispela lain i bosim ol brens ofis bilong ol Witnes Bilong Jehova we ol i save tanim tok, prinim ol buk na nius, na tilim ol buk na nius bilong Baibel long winim 600 tokples. Long dispela rot, Gavening Bodi i givim ol tok bilong Baibel bilong strongim na stiaim winim 100,000 kongrigesen long olgeta hap. Long olgeta kongrigesen, i gat ol man i winim mak bilong mekim wok elda, olsem wok wasman. Ol dispela man i lukautim gut ol sipsip bilong God.​—Ritim 1 Pita 5:2, 3.

Ol Witnes Bilong Jehova i oganaisim gut wok bilong autim gutnius na kamapim ol disaipel. Olsem ol aposel i bin mekim, mipela i save autim tok long ol haus. (Aposel 20:20) Na tu, mipela i amamas long mekim Baibel stadi wantaim ol man i laikim tok i tru. Tasol ol Witnes Bilong Jehova i no wanpela oganaisesen tasol, nogat. Mipela i wanpela famili i gat gutpela Papa. Mipela i stap olsem ol brata na sista husat i save tingim tru narapela narapela. (2 Tesalonaika 1:3) Lain bilong Jehova i mekim wok bilong amamasim God na helpim ol narapela, olsem na ol i wanpela famili i stap amamas tru, winim ol narapela famili.​—Ritim Song 33:12; Aposel 20:35.