I gat gutpela nius i kam long Jehova, em God bilong amamas, na em i laik bai ol famili i stap amamas. (1 Timoti 1:11) Em i as bilong marit. Bilong famili i ken stap amamas, em i bikpela samting long man na meri i mas marit stret, long wanem, dispela i mekim na ol papamama na ol pikinini bai i stap gut na ol i save olsem narapela i laikim narapela. Ol Kristen i mas rispektim lo bilong kantri long sait bilong marit.​—Ritim Luk 2:1, 4, 5.

God i gat wanem tingting long marit? Em i laik bai marit i mas stap strong oltaim. Jehova i laik bai maritman na maritmeri i mas stap gut long poroman marit bilong em. (Hibru 13:4) Em i heitim pasin bilong divos. (Malakai 2:16) Tasol Jehova i orait long ol Kristen i ken divos na marit gen, sapos poroman marit i mekim pasin adaltri.​—Ritim Matyu 19:3-6, 9.

Jehova i bin wokim man na meri bilong tupela i ken poroman wantaim long inapim ol wok insait long marit. (Stat 2:18) Maritman em i het bilong famili, olsem na em i gat wok long go i pas long lukautim famili long ol samting bilong skin na long skulim ol long God. Maritman i mas daunim laik bilong em yet na laikim tru meri bilong em. Maritman na maritmeri i mas laikim tru na rispektim narapela narapela. Olgeta man na meri i gat sin, olsem na pasin bilong fogivim narapela em i bikpela samting bilong helpim marit long i stap amamas.​—Ritim Efesus 4:31, 32; 5:22-25, 33; 1 Pita 3:7.

Sapos hevi i kamap insait long marit, orait yu na poroman marit bilong yu i mas wok strong long mekim pasin laikim long narapela narapela. (1 Korin 13:4, 5) Baibel i no orait long ol marit i seperet bilong stretim ol hevi i save kamap insait long marit.​—Ritim 1 Korin 7:10-13.

Jehova i laik bai yu stap amamas. Em i givim yu ol gutpela tok long olsem wanem yu ken i stap amamas taim yu yangpela. Em i laik bai yu kisim helpim long ol gutpela tok bilong papamama bilong yu, na kisim skul long ol samting i bin painim ol. (Kolosi 3:20) Na tu, Jehova i laik bai yu kisim amamas em man i save kisim, taim em i mekim ol wok bilong Krieta na Pikinini bilong em.​—Ritim Saveman 11:9–12:1; Matyu 19:13-15; 21:15, 16.

Yupela i mas wok strong long lukautim ol pikinini bilong yupela long kaikai, haus, na klos samting. (1 Timoti 5:8) Tasol bilong ol pikinini bilong yupela i ken stap amamas, yupela i mas lainim ol tu long laikim God na kisim skul long em. (Efesus 6:4) Pasin bilong yupela long laikim tru God inap stiaim tru bel bilong pikinini bilong yupela. Taim yupela i yusim Tok Bilong God long skulim ol pikinini, dispela bai stiaim gut tingting bilong ol.​—Ritim Lo 6:4-7; Sindaun 22:6.

Taim yupela i mekim gutpela tok bilong strongim ol pikinini na tok amamas long ol samting ol i mekim, dispela i save helpim ol tru. Na tu, ol i mas kisim ol tok bilong stretim ol. Kain skul olsem i banisim ol long ol pasin we inap mekim na ol i no stap amamas. (Sindaun 22:15) Tasol taim yupela i stretim ol, no ken mekim long hatpela pasin o singaut bikmaus.​—Ritim Kolosi 3:21.

Ol Witnes Bilong Jehova i wokim sampela buk we i stret bilong helpim ol papamama na ol pikinini. Tok bilong ol dispela buk i kam long Baibel.​—Ritim Song 19:7, 11.