“Bai i gat kirap bek bilong ol man i dai pinis.”—Aposel 24:15, Nupela Taim Baibel.

Mekim gut bel bilong yu taim wanpela yu laikim tumas i dai.—2 Korin 1:3, 4.

Pasin bilong pret long dai i no kalabusim yu.—Hibru 2:15.

I gat as tru bilong bilip na wet long bungim gen ol lain yu laikim tumas em ol i dai pinis.—Jon 5:28, 29.

Yes, i gat tripela as na yumi inap bilip olsem:

• God em Man Bilong Wokim olgeta samting. Baibel i tok God Jehova i “as tru bilong laip bilong olgeta samting.” (Song 36:9; Aposel 17:24, 25) Man bilong givim laip long olgeta samting em inap tru long givim laip gen long ol man i dai pinis.

• Long bipo God i kirapim bek ol man i bin dai pinis. Baibel i stori long 8-pela narapela narapela man na meri—ol yangpela na lapun—em God i bin kirapim bek ol na ol i stap long graun. Sampela i bin i dai insait long liklik hap taim tasol, na wanpela i bin slip long matmat inap 4-pela de!—Jon 11:39-44.

• God i laik tru long mekim gen dispela samting. Jehova i heitim tru dai; em i tingim dai olsem wanpela birua. (1 Korin 15:26) Em i “laikim tumas” long daunim dispela birua, na long rot bilong kirapim bek ol man i dai pinis em bai pinisim tru dai. Em i laik tru long givim bek laip long ol man i dai pinis em ol i stap long tingting bilong em na long lukim ol i stap laip gen long graun.—Jop 14:14, 15.