“Man husat i wok long lukluk long wanpela meri na aigris long em, long bel em i mekim pinis pasin adaltri.”—Matyu 5:28.

AS NA EM I BIKPELA SAMTING

Long nau, planti man moa i save lukim ponografi na i gat planti rot moa bilong mekim olsem, winim bilong bipo. Sapos yu laik mekim ol samting em God i amamas long en na yu laik stap amamas, orait yu mas save long tingting bilong God long ponografi.

TOK BAIBEL I MEKIM

Baibel i no kolim stret dispela tok ponografi. Tasol pasin bilong lukim ponografi i brukim planti stiatok bilong Baibel.

Olsem, Baibel i tok stret olsem taim man i “wok long lukluk long wanpela meri” husat em i no marit long en, na i gat laik long slip wantaim dispela meri, dispela inap kirapim em long mekim pasin adaltri. Dispela stiatok bilong Baibel i stret long olgeta man na meri, maski ol i marit o singel em ol i “wok long lukluk” long ponografi na i gat laik long mekim pasin pamuk. Dispela kain pasin i nogut tru long ai bilong God.

“Yupela i mas kilim i dai ol laik i stap long ol hap bilong bodi bilong yupela, olsem pasin pamuk, pasin i no klin, bel i kirap, ol laik nogut, na pasin gridi.”—Kolosi 3:5.

 TOK OL MAN I MEKIM

Sampela saveman i tok pasin bilong lukim ponografi i no save kirapim tumas ol man na meri long mekim pasin pamuk. Tasol olsem wanem? Pasin bilong lukim ponografi em samting nogut?

TOK BAIBEL I MEKIM

Baibel i tok olsem “tok pilai nogut” em pasin nogut tru. (Efesus 5:3, 4) Olsem na ponografi tu i no stret liklik. Long nau, planti taim ponografi em ol vidio we man na meri i mekim tru tru pasin adaltri, tupela man i slip wantaim, o mekim ol narapela pasin doti. Pasin bilong lukim piksa bilong ol kain pasin doti olsem i nogut moa long ai bilong God, winim tok pilai nogut.

Ol saveman i wok yet long tok pait olsem ol man husat i lukim ponografi, dispela i no save kirapim ol long mekim tru tru dispela pasin. Tasol Baibel i strongim dispela tok olsem pasin bilong lukim ponografi i bagarapim pasin bilong man long pas gut wantaim God na i doti tru long ai bilong em. Baibel i tok: “Yupela i mas kilim i dai ol laik i stap long ol hap bilong bodi bilong yupela, olsem pasin pamuk, [na] bel i kirap.” (Kolosi 3:5) Ol man na meri husat i lukim ponografi, ol i no kilim i dai ol laik nogut bilong ol, nogat, ol i save strongim ol dispela laik.

“Yupela i mas bihainim gutpela pasin, na yupela i no ken bihainim pasin nogut. . . . Lusim pasin nogut, na bihainim gutpela pasin tasol.”—Amos 5:14, 15.

TOK BAIBEL I MEKIM

Baibel i tok ol man i bin mekim pasin pamuk, dring spak, na ol stilman, ol i bin lusim ol dispela pasin nogut. (1 Korin 6:9-11) Hau ol i lusim? Ol i bihainim savetingting i stap long Tok Bilong God na ol i lain long heitim pasin nogut.

Man inap lain long heitim ponografi sapos em i tingim ol samting nogut dispela pasin nogut i save kamapim. Wok painimaut em Utah State University i mekim i kamapim olsem sampela man husat i save lukim ponografi, ol i “bel hevi, ol i laik stap wanpis, na ol i no inap pas gut wantaim ol pren na famili,” na i kamapim ol narapela hevi tu. Olsem yumi tok pinis, pasin bilong lukim ponografi i nogut tru long ai bilong God na i kamapim wanpela hevi i bikpela moa. Em i mekim na ol man i stap longwe long Man Bilong Wokim ol.

Baibel inap helpim yumi long lain long laikim gutpela pasin. Taim yumi ritim Baibel planti taim, pasin bilong yumi long laikim ol lo bilong en long stretpela pasin bai go bikpela. Dispela pasin laikim bai helpim yumi long sanap strong na sakim ponografi na kisim wankain tingting olsem man bilong raitim song, em i tok: “Mi no ken [“lukluk,” NW] long pasin nogut. Nogat tru.”—Song 101:3.