TAIM balus i flai dispela i mekim na win arere long ol wing bilong en i save tanim tanim, olsem na balus i ron isi isi na fiul i pinis hariap. Na tu, dispela i mekim na ol arapela balus i flai klostu long en inap guria o seksek. Olsem na bilong abrusim eksiden, ol balus i no ken ron klostu long narapela narapela long taim ol i laik flai.

Tasol ol ensinia bilong balus i painim wanpela rot bilong abrusim dispela hevi. Ol i skelim disain bilong wing bilong ol pisin olsem ol tarangau na ol stok, na ol i luksave olsem ol inap bihainim wankain pasin long wokim ol balus.

Tingim: Taim ol dispela pisin i flai, arere bilong ol wing bilong ol i go antap, na dispela i helpim pisin long flai i go antap tru na em i no paitim tumas wing bilong en. Ol ensinia i bihainim wankain disain taim ol i wokim ol wing bilong balus. Ol i testim wing bilong ol balus insait long wanpela haus we ol i kamapim win. Na ol i painimaut olsem sapos ol i wokim arere bilong wing bilong balus i go antap, dispela bai helpim ol balus. Olsem na long nau ol i bihainim dispela kain disain long wokim planti balus. Buk Encyclopedia of Flight i tok: “Dispela disain bilong ol wing i mekim na maski balus i hevi em inap long ron spit.”

Disain bilong ol wing bilong balus i helpim ol long karim planti kago, flai i go long ol longwe ples na long wankain taim seivim fiul. Na tu, ol inap pak klostu long narapela narapela long ples balus, long wanem, wing bilong ol i no longpela tumas. Olsem, long 2010, wanpela nius ripot bilong NASA i tok ol kampani bilong ol balus long graun olgeta i “seivim 7,600 milion lita bilong fiul bilong ol balus.” Dispela i daunim ol win nogut em ol balus i save kamapim.

Yu ting wanem? Wing bilong ol pisin i kamap long rot bilong evolusen? O wanpela i bin wokim?