ATING sampela bai makim “ol samting i painim yu,” na ol bai tok, “Mi bai amamas  . . .

• “sapos mi gat planti mani”

• “sapos marit bilong mi i gutpela”

• “sapos mi gat gutpela helt”

Bilong i stap amamas, pasin bilong yu i bikpela samting moa winim ol samting i painim yu na pasin yu kisim long papamama. Bilong wanem yumi tok olsem? Long wanem, yumi inap kontrolim pasin bilong yumi, tasol yumi no inap kontrolim ol samting i painim yumi na pasin yumi bin kisim long papamama.

Wanpela savetok bilong Baibel i tok: “Pasin bilong belgut i olsem marasin bilong mekim man i stap gut. Tasol sapos tingting bilong man i bagarap, dispela i olsem sik nogut i wok long bagarapim ol bun bilong en.” (Sindaun 17:22) Dispela i makim olsem pasin bilong yu i bikpela samting! Pasin bilong yu inap helpim yu long winim ol mak yu putim o mekim na yu givap. Na tu, sapos hevi i kamap yu inap karim o nogat.

Sampela i ting, olsem wanem pasin bilong ol inap helpim ol long i stap amamas. Ating ol bai tok:

• ‘Wai na mi mas haitim ol hevi bilong mi na ting ol gutpela samting bai kamap long mi?’

• ‘Maski mi holim stretpela tingting dispela i no inap long senisim ol samting i painim mi.’

• ‘Mi tingim ol samting i kamap long nau, na mi no laik driman nating.’

Planti man i holim kain tingting olsem. Tasol gutpela samting inap kamap sapos yu holim stretpela tingting. Bilong kliagut long dispela, skelim ol samting i save kamap.

Long ples wok, Alex na Brian i givim bel tru long wok long ol narapela narapela projek. Bihain supavaisa i skelim wok bilong ol, na em i tokim ol long ol popaia bilong ol.

• Alex: “Mi lusim bikpela taim na strong long mekim wok, tasol mi popaia yet! Maski mi wok hat tru, mi no inap mekim gut dispela wok. Wai na mi wok hat yet?”

• Brian: “Supavaisa i amamas long sampela wok mi mekim, tasol mi mekim sampela bikpela popaia. Mi kisim gutpela skul na dispela bai helpim mi long mekim gut wok long bihain.”

 YU TING WANEM?

• Husat bai kamap gutpela wokman long 6-pela mun bihain, Alex o Brian?

• Sapos yu bos bilong wanpela kampani, bai yu kisim husat long wok long kampani bilong yu?

• Taim yu bel hevi, yu bihainim pasin bilong Alex o Brian?

Andrea na Brittney i save bungim hevi bilong i stap wanpis sampela taim. Tupela i save mekim narapela narapela samting long karim dispela hevi.

• Andrea i save tingim em yet. Em i amamas long helpim ol narapela sapos ol i bin helpim em. Em i tok, ‘Wai na bai mi westim taim bilong mi long helpim ol man i no save helpim mi?’

• Brittney i wok strong long mekim gutpela pasin long ol narapela na helpim ol maski ol i nogat pasin bilong tok tenkyu. Em i bihainim Gutpela Lo Tru na mekim gutpela pasin long ol narapela, em pasin em i laik bai ol narapela i mekim long en. (Luk 6:31) Brittney i save olsem gutpela samting inap kamap long pasin bilong mekim gut long narapela.

YU TING WANEM?

• Bai yu amamas long stap pren bilong husat?

• Husat bai amamas long ol samting em i mekim long helpim ol pren bilong em?

• Sapos sampela taim yu pilim olsem yu stap wanpis, yu save bihainim pasin bilong Andrea o Brittney?

Ating yu save long sampela man husat i gat wankain pasin olsem Brian na Brittney. O ating yu pilim olsem yu bihainim pasin bilong ol. Sapos olsem, bai yu luksave olsem pasin bilong yu inap stiaim ol samting i kamap long laip bilong yu. Tasol olsem wanem sapos yu gat wankain pasin olsem bilong Alex na Andrea? Yumi ken stori long 3-pela rot em Baibel inap helpim yu long holim stretpela tingting long ol hevi i painim yu.

BAIBEL I TOK: “Sapos taim nogut i painim yu na bun bilong yu i slek, orait yu no gat strong tru.”—Sindaun 24:10.

MAKIM WANEM SAMTING: Sapos yu ting ol gutpela samting i no inap kamap, dispela bai pinisim strong bilong yu na yu no inap mekim ol samting bilong karim hevi i painim yu.

Juliza i bin kisim save olsem Baibel i gat ol gutpela stiatok bilong helpim yumi. Ol tok bilong Baibel inap helpim yumi long karim ol hevi. Olsem, long Efesus 4:23, Baibel i tok: “Oltaim tingting bilong yupela i mas wok long kamap nupela.”

Dispela skripsa i kamapim olsem yumi inap senisim tingting yumi gat long ol samting i kamap. Tingting bilong yu inap long “kamap nupela.” Olsem na oltaim yumi mas wok strong long mekim olsem. Em risen na Baibel i tok, “oltaim tingting bilong yupela i mas wok long kamap nupela.”

BAIBEL I TOK: “Man i sot long ol samting, em i stap nogut na i gat bikpela hevi oltaim. Tasol sapos em i man bilong belgut na amamas, orait olgeta de i olsem de bilong pati.” —Sindaun 15:15.

MAKIM WANEM SAMTING: Sapos yu no holim stretpela tingting long ol samting i kamap, bai yu pilim olsem yu “stap nogut” na long olgeta de, i olsem yu gat “bikpela hevi.” Tasol yu bai “belgut na amamas” sapos yu tingim ol gutpela samting. Ol disisen bilong yu inap mekim yu stap amamas o bel hevi.

Wanpela samting i helpim Yanko em pasin bilong ritim Baibel. Em i tok: “Dispela i helpim mi long tingim ol gutpela samting. Long nau, mi putim ol liklik mak em mi laik winim, na bai mi inap winim ol bikpela mak long bihain. Taim mi bel hevi, mi save tingim ol gutpela samting i bin painim mi, na dispela i mekim mi amamas.”

Olsem Yanko, mobeta yu tingim ol gutpela samting bai kamap, na no ken tingim ol hevi we inap kamap. Olsem wanem sapos wanpela hevi i painim yu? Ating yu gat bikpela sik olsem Yanko, orait askim yu yet, ‘I gat gutpela samting bai kamap long mi o nogat? Mi inap long winim dispela hevi?’ Tingim ol gutpela samting bai kamap na no ken tingim ol hevi bilong yu.

BAIBEL I TOK: “Amamas bilong givim samting i winim amamas bilong kisim samting.” —Aposel 20:35.

MAKIM WANEM SAMTING: Man bilong givim samting long ol narapela i save amamas tru. Bilong wanem? Long wanem, God i wokim yumi long helpim ol narapela na yumi no tingim tasol ol samting yumi nidim. (Filipai 2:3, 4; 1 Jon 4:11) Amamas bilong givim samting long ol narapela inap helpim yumi long karim ol hevi i painim yumi.

Painim ol rot long daunim laik bilong yu na helpim ol narapela. Olsem wanem? Yu inap redim kaikai bilong wanpela neiba i sik? Yu save long sampela man i gat bikpela krismas na ol i nidim helpim long mekim ol wok bilong haus?

Wankain olsem yu save lukautim gaden, yu mas stretim stretim pasin bilong yu. Na olsem yu save kamautim ol gras nogut long gaden, yu mas rausim pasin bilong ting olsem ol gutpela samting i no inap kamap. Holim stretpela tingting na mekim ol gutpela wok na bai yu inap stap amamas. Taim yu mekim olsem, ol gutpela samting bai painim yu. Na dispela i kamapim klia olsem pasin bilong yu i bikpela samting!