BIKPELA SIK O BAGARAP LONG BODI INAP SENISIM LAIP BILONG MAN. Pastaim Ulf i gat gutpela helt, tasol bihain em i paralais, na em i tok: “Mi save wari na tingting planti. Olgeta strong bilong mi i pinis . . . Mi pilim olsem mi ‘bagarap olgeta.’”

Ekspiriens bilong Ulf i helpim yumi long tingim olsem yumi no inap kontrolim olgeta samting i kamap long helt bilong yumi. Tasol yumi inap mekim ol samting bilong lukautim helt bilong yumi. Olsem wanem sapos sik i go bikpela? Yu ting dispela bai mekim na yumi no stap amamas moa? Nogat tru. Bai yumi stori moa long dispela. Pastaim, yumi ken skelim sampela stiatok we inap lukautim helt bilong yumi.

“MEKIM OL SAMTING INAP LONG SKEL.” (1 Timoti 3:2, 11) Pasin bilong kaikai na dring planti inap bagarapim helt na pinisim mani bilong yumi! Baibel i tok: “Yu no ken poroman wantaim ol man i save dring planti wain na kaikai planti. Ol spakman na ol man bilong kaikai planti, ol bai i kamap rabisman tru.”—Sindaun 23:20, 21.

NO KEN MEKIM BODI I KAMAP DOTI. “Yumi mas rausim olgeta pasin doti bilong skin na bilong tingting.” (2 Korin 7:1) Ol man i mekim bodi i kamap doti long rot bilong kaikai na smok tabak, dring planti alkohol, na kisim drak. Wanpela skul, U.S. Centers for Disease Control and Prevention long Amerika i stori olsem smok “i save mekim man i sik na kamapim bagarap long klostu olgeta hap bilong bodi.”

TINGIM BODI NA LAIP OLSEM GUTPELA PRESEN. “Long rot bilong [God] yumi gat laip na yumi inap wokabaut na stap.” (Aposel 17:28) Dispela i kirapim yumi long abrusim ol samting inap kamapim bagarap taim yumi stap long ples wok, draivim kar, o makim ol amamas. Amamas bilong sotpela taim tasol inap kamapim bagarap long bodi!

DAUNIM PASIN BILONG TINGTING KRANKI. Tingting na bodi i save wok gut wantaim. Olsem na yumi mas abrusim pasin bilong tingting planti, belhat nating, bel nogut, na ol narapela tingting kranki. Song 37:8 i tok: “Yu no ken kros, na yu mas lusim pasin bilong belhat.” Baibel i tok tu olsem: “No ken tingting planti long ol  samting bilong de antap, long wanem, de antap bai i gat ol wari bilong en.”—Matyu 6:34.

TINGIM TINGIM OL GUTPELA SAMTING. Sindaun 14:30 i tok: “Sapos man i stap bel isi, orait bodi bilong en bai i stap gut.” Baibel i tok tu olsem: “Pasin bilong belgut i olsem marasin bilong mekim man i stap gut.” (Sindaun 17:22) Dispela em wanpela gutpela tok. Wanpela dokta long Skotlan i tok: “Sapos yu man bilong amamas, bihain bai yu no sik tumas. Tasol ol man i no save amamas, ol bai sik planti.”

KISIM PASIN BILONG STRONGIM BEL. Olsem Ulf, yumi no inap abrusim ol hevi i kamap, tasol yumi mas sanap strong yet na painim rot bilong karim ol dispela hevi. Sampela man i larim bel hevi i daunim ol, na dispela i givim bikpela hevi moa long ol. Sindaun 24:10 i tok: “Sapos taim nogut i painim yu na bun bilong yu i slek, orait yu no gat strong tru.”

Sampela man i save bel hevi tasol bihain ol i no bel hevi moa. Ol i mekim senis na painim rot bilong karim ol dispela hevi. Ulf i tok, em i bin beten planti na tingim tingim ol gutpela tok bilong Baibel, na em “i luksave long samting em i mas mekim, na em i no tingting tumas long dispela hevi.” Wankain olsem planti husat i bin karim ol bikpela hevi, pasin sori na pasin bilong pilim tru hevi bilong ol narapela i kirapim Ulf long autim tok bilong Baibel long ol.

Steve em narapela man husat i karim bikpela hevi. Taim em i gat 15 krismas, em i pundaun long diwai na em i paralais kirap long nek na i go daun long ol narapela hap bilong bodi. Long taim em i gat 18 krismas, em inap mekim gen wok long ol han bilong em. Bihain em i go long wanpela yunivesiti, na kwiktaim em i kisim drak, dring alkohol, na mekim pasin pamuk. Em i ting gutpela samting i no inap kamap, tasol taim em i kirap stadi long Baibel, em i luksave olsem laip i gat as tru na em i wok strong long senisim pasin bilong em. Steve i tok: “Mi no holim tingting moa olsem laip i no gat as bilong en. Nau mi stap bel isi, na amamas long ol samting mi gat.”

Tok bilong Steve na Ulf i helpim yumi long tingim tok bilong Song 19:7, 8: “Lo bilong Bikpela em i stret olgeta, na i save givim nupela laip long yumi. . . . Bikpela i save skulim yumi long gutpela tok tumas. Dispela tok i save mekim bel bilong yumi i amamas. Lo bilong God i nambawan tru, na i givim gutpela save long yumi.”