“No ken tingting planti long ol samting bilong de antap, long wanem, de antap bai i gat ol wari bilong en.”—MATYU 6:34.

Makim: Wari bilong wan wan de em samting i save painim yumi. Tasol no ken mekim wari bilong dispela de i go bikpela long rot bilong tingim tu ol wari bilong tumora. Traim long tingim hevi bilong wanpela de tasol.

• Presa inap kamapim wari na tingting planti. So traim dispela: Pastaim, luksave olsem sampela hevi yu no inap abrusim. Pasin bilong tingting planti long ol samting yu no inap pasim dispela i save putim moa presa. Namba 2, yu mas tingim olsem planti taim ol samting yu bin pret olsem bai kamap i no save kamap.

“Tasol savetingting i kam long heven i mekim . . . [man] i redi long bihainim tingting bilong narapela.”—JEMS 3:17.

Makim: No ken stap olsem stretpela man olgeta. No ken putim ol mak i antap tumas long yu yet o ol narapela.

• Long pasin daun, putim mak long ol samting em yu inap long mekim, na yu mas save olsem i gat sampela samting yu yet na ol narapela i no inap long mekim. Taim yu mekim olsem, yu bai daunim presa bilong yupela olgeta na wok bilong yupela bai kamap gutpela. Na tu, holimpas pasin bilong fani na lap. Taim yu lap—maski sampela samting i rong—yu daunim presa na yu amamas.

“Man i gat pasin bilong skelim gut ol samting, em bai stap isi tasol.”—PROVEP 17:27.

Makim: Bel hevi inap mekim na yu no tingting gut, olsem na traim long stap isi.

• Luksave long samting i putim presa long yu, na luksave long samting yu mekim. Olsem, taim yu pilim presa, luksave long tingting, filings, na pasin bilong yu, na ating raitim long pepa. Taim yu wok long luksave long samting yu mekim taim yu pilim presa, ating dispela inap helpim yu long daunim presa. Na tu, tingim ol rot bilong rausim ol samting long laip bilong yu we i putim presa long yu. Sapos yu no inap mekim, orait painim rot bilong daunim ol hevi dispela i kamapim, ating long rot bilong stretim gut ol wok o yusim gut taim bilong yu.

• Traim long senisim tingting bilong yu long ol samting. Samting i putim presa long yu ating dispela i no putim presa long narapela. Em bikos yumi gat narapela narapela tingting long ol samting. Tingim dispela tripela samting:

  1. No ken hariap long ting man i gat tingting kranki. Ating wanpela man i katim i go long fran bilong yu na sanap long lain. Sapos yu ting olsem em i mekim pasin nogut, ating bai yu bel hevi. So i gutpela moa long ting olsem em i no gat tingting nogut. Ating tingting bilong yu i stret!

  2. Traim long lukim gutpela sait bilong samting i kamap. Sapos yu wet longpela taim long ofis bilong dokta o long ples balus, yu no inap pilim presa sapos yu yusim taim bilong yu long ritim buk o mekim sampela wok o ritim email.

  3. Skelim olgeta samting. Askim yu yet, ‘Dispela hevi bai go bikpela long tumora o long neks wik?’ Skelim wanem ol hevi i liklik o bilong sotpela taim na wanem ol hevi i bikpela tru.

“Olgeta samting yupela i mekim, ol i mas wok stret na i ron gut.”—1 KORIN 14:40.

Makim: Traim long stretim gut ol samting long laip bilong yu.

• Yumi laik bai ol samting long laip bilong yumi i ken wok stret. Wanpela samting i mekim na ol samting i paul nabaut—na putim presa—em yumi save larim ol samting i stap inap las minit, na ating dispela i mekim na i gat planti wok em yumi no save pinisim. Yu laik traim dispela tupela poin?

  1. Mekim gutpela sediul, na bihainim long olgeta taim.

  2. Luksave na stretim ol pasin we i mekim na yu save mekim ol samting long las minit.

“I gutpela moa long kisim liklik malolo winim pasin bilong wok hat tumas na ron i go bilong holimpasim win.”—EKLISIASTIS 4:6.

Makim: Man bilong wok tumas i pasim em yet long kisim ol gutpela samting i kamap long “pasin bilong wok hat tumas.” Ating em i no gat taim o strong i stap yet bilong enjoim samting em i wok hat long kamapim.

• Holim stretpela tingting long wok na mani. Planti mani i no makim olsem man bai stap amamas moa na em i no gat presa, nogat. Tok i tru em olsem. Eklisiastis 5:12 i tok: “Planti samting bilong maniman i save pasim em long slip.” So traim long baim ol samting inap long mani bilong yu.

• Makim taim bilong malolo. Yu daunim presa taim yu mekim samting yu save enjoim. Tasol ol kain amamas, olsem lukim TV, ating dispela i no inap helpim yu.

• Yusim fon samting long taim stret bilong en. Abrusim pasin bilong oltaim sekim email, ol teks mesis, o sosel netwok. Sapos em i no bikpela samting, orait no ken sekim ol email bilong wok bihain long taim wok i pinis.

“Pasin bilong kisim trening long bodi inap helpim yu.”—1 TIMOTI 4:8.

Makim: Taim yu eksasais long olgeta de helt bilong yu bai kamap gutpela moa.

• Kisim pasin bilong lukautim gut helt. Taim yu mekim wok dispela inap amamasim yu na bodi bai lain long daunim presa. Kisim gutpela kaikai, na no ken abrusim taim bilong kaikai. Yu mas malolo gut.

• Abrusim ol rot nogut bilong daunim presa, olsem smok o drak na dring planti na spak. Sapos yu mekim inap longpela taim, dispela inap mekim presa i go bikpela, nogutim helt bilong yu na pinisim mani bilong yu.

• Lukim dokta bilong yu sapos presa i go bikpela tumas. No ken sem long go lukim dokta long kisim helpim.

“Skelim gut wanem ol samting i bikpela samting moa.”—FILIPAI 1:10.

Makim: Skelim gut wanem ol samting i bikpela samting long yu.

• Long lista bilong yu, raitim ol wok i bikpela samting i stap fes. Dispela bai helpim yu long putim tingting olgeta i go long ol wok i bikpela moa, na yu bai save wanem wok yu ken mekim bihain, givim long narapela, o rausim.

• Insait long wanpela wik, raitim gut hau yu yusim taim bilong yu. Na painim ol rot bilong yusim gut taim bilong yu. Taim yu bosim gut taim bilong yu, yu no inap pilim tumas presa.

• Makim taim bilong malolo. Maski sotpela malolo tasol inap givim nupela strong long yu na daunim presa.

“Wari i stap long bel bilong man i save daunim bel bilong em, tasol gutpela tok i save amamasim bel bilong em.”—PROVEP 12:25.

Makim: Pasin helpim, gutpela tok ol narapela i mekim inap mekim yu bel gut.

• Toktok wantaim wanpela husat inap kliagut long yu. Man yu toktok long em inap helpim yu long luksave long sampela samting o luksave long wanpela rot bilong stretim hevi em yu no bin lukim. Na taim yu mekim olsem dispela bai helpim yu long stap amamas.

• Askim narapela long helpim yu. Yu inap serim wok long ol narapela?

• Sapos wanwok i putim presa long yu, painim rot bilong stretim dispela hevi. Olsem, long gutpela pasin, ating yu ken tokim man o meri long samting pasin bilong em i mekim long yu. (Provep 17:27) Sapos dispela i no wok, no ken pas tumas wantaim em.

“Ol man i hangre long kisim save long God, ol i ken amamas.”—MATYU 5:3.

Makim: Yumi ol man i no nidim tasol kaikai, klos, na haus. Nogat. Yumi nidim ol tok bilong God. Bilong stap amamas, olgeta taim yumi mas tingim dispela na wok long kisim save.

• Beten inap helpim tru yu. God i tokim yu long ‘putim olgeta hevi bilong yu long han bilong em,’ bikos ‘em i save wari long yu.’ (1 Pita 5:7) Beten na pasin bilong tingim tingim long bel ol tok yu ritim inap givim bel isi tru long yu.—Filipai 4:6, 7.

• Ritim ol samting we inap helpim yu long pas gut wantaim God. Ol stiatok dispela nius i kamapim i kam long Baibel, em ol i raitim bilong strongim yumi long kisim save long ol tok bilong God. Ol dispela tok i givim yumi “savetingting na pasin bilong wokim gut tingting.” (Provep 3:21) Yu ting yu inap putim mak long ritim Baibel? Buk Provep em gutpela buk long stat long en.