‘Mekim Olsem Yet Bilong Tingim Mi’
“Taim em i tok tenkyu pinis long God, em i brukim bret na tok: ‘Dispela i makim bodi bilong mi, em bilong helpim yupela. Yupela i mas mekim ol sem yet bilong tingim mi.’”—1 KOR. 11:24.
1, 2. Paslain long Jisas i mekim laspela raun bilong em i go long Jerusalem, ating sampela aposel i bin kisim wanem kain tingting?
‘SKAI i klia stret, na yumi inap lukim gut mun. Asde nait, ating ol wasman long Jerusalem i bin lukim tu dispela samting. Taim ol memba bilong Sanhedrin i kisim save long dispela samting, ol i tokaut olsem nupela mun, em mun Nisan, i kirap pinis. Bihain, ol i yusim paia na ol mausman long bringim toksave i go kwik long olgeta hap. Ol manmeri long hia tu i harim pinis dispela toksave. Ating Jisas bai tingting long i go long Jerusalem bambai em i ken stap paslain long bung bilong Pasova.’
2 Ating sampela aposel bilong Jisas i bin kisim kain tingting olsem taim ol i stap wantaim Jisas paslain long em i mekim laspela raun bilong em i go long Jerusalem. Long dispela taim, ol i bin stap long Perea, long narapela sait bilong wara Jordan. (Mat. 19:1; 20:17, 29; Mak 10:1, 32, 46) Taim ol Juda i save long wanem taim Nisan 1 bai kirap, orait ol i save wet inap 13 de moa na ol i save mekim bung bilong Pasova bihain long san i go daun long Nisan 14.
3. Bilong wanem ol Kristen i amamas long tingim det bilong Pasova?
3 Det em Kaikai Bilong Bikpela bai kamap long en i wankain long taim bilong Pasova, na dispela bai kamap bihain long san i go daun long Epril 14, 2014. Dispela em wanpela spesel de bilong ol Kristen na ol man husat i amamas long harim tok. Bilong wanem? Long wanem, 1 Korin 11:23-25 i tok: “Long nait ol man i laik putim Bikpela Jisas long han bilong ol birua, em i kisim wanpela bret na taim em i tok tenkyu pinis long God, em i brukim bret na tok: ‘Dispela i makim bodi bilong mi, em bilong helpim yupela. Yupela i mas mekim olsem yet bilong tingim mi.’ Em i kisim kap na mekim wankain samting.”
4. (a) Yu ken givim wanem ol askim long yu yet long Memorial? (b) Olsem wanem yumi save long det em Memorial bai kamap long en long olgeta wan wan yia? (Lukim tu blok “Memorial 2014.”)
4 Memorial em wanpela bung tasol we Jisas i tokim ol disaipel bilong em long mekim long olgeta yia, na yu tu bai laik tru long stap long dispela bung. Tasol pastaim, yu ken askim yu yet olsem: ‘Mi ken mekim wanem bilong redi long Memorial? Ol i save yusim wanem ol samting long mekim Memorial? Olsem wanem ol bai mekim dispela bung? Bilong wanem em i bikpela samting long mi mas tingim Memorial na ol samting ol i yusim?’
OL SAMTING OL I YUSIM LONG MEMORIAL
5. Jisas i tokim ol aposel long redim wanem ol samting na bai ol i ken mekim bung bilong Pasova?
5 Taim Jisas i tokim ol disaipel long redim wanpela rum bilong mekim kaikai bilong Pasova, em i no tokim ol long putim planti bilas long rum, nogat. Ating em i tokim ol long painim wanpela gutpela rum we i klin na i gat spes inap long em wantaim ol aposel i ken sindaun long en. (Ritim Mak 14:12-16.) Ol aposel i redim olgeta samting bilong mekim dispela bung, na ol i kisim tu bret i no gat yis na retpela wain. Bihain long kaikai bilong Pasova, Jisas i stori long bret na wain. Dispela em 2-pela samting we ol bai yusim long mekim Memorial.
6. (a) Bihain long kaikai bilong Pasova, Jisas i stori olsem wanem long bret? (b) Yumi save yusim wanem kain bret long mekim Memorial?
6 Aposel Matyu i bin stap long dispela taim, na em i stori olsem: “Jisas i kisim wanpela bret, na em i beten na brukim bret na givim long ol disaipel na i tok: ‘Yupela kisim na kaikai.’” (Mat. 26:26) Ol i kisim “bret” i no gat yis long en, na dispela i wankain long bret ol i yusim long Pasova. (Kis. 12:8; Lo 16:3) Ol i wokim dispela bret long wit plaua na wara. Ol i no putim yis long bret, olsem na bret i no solap. Na tu, ol i no miksim ol narapela samting long en, kain olsem sol. Em i drai kain olsem bisket, na isi long brukim i go liklik liklik. Long nau, paslain long de bilong Memorial, ol elda long kongrigesen inap askim wanpela long wokim dispela kain bret. Ol i mas miksim wit plaua wantaim wara na putim liklik oil long praipan na kukim bret antap long en. Long ol ples we i hatwok long painim wit plaua, ol i ken yusim plaua ol i wokim long rais, bali, kon, o ol narapela wit.
7. Wanem samting i stap insait long kap em Jisas i bin yusim long Kaikai Bilong Bikpela? Yumi inap yusim wanem kain wain long Memorial?
7 Matyu i stori tu olsem bihain Jisas i “kisim wanpela kap na em i tenkyu long God na givim long ol. Em i tok: ‘Yupela olgeta dring long dispela kap.’” (Mat. 26:27, 28) Retpela wain i stap insait long kap em Jisas i yusim. Olsem wanem yumi save olsem jius bilong greip i no stap insait long dispela kap? Long wanem, longpela haptaim i lus pinis bihain long ol i bungim ol greip i mau. Ol i no bin yusim wain long namba 1 kaikai bilong Pasova long Isip. Tasol Jisas i no tok i gat rong long dring wain long taim bilong Pasova. Jisas i yusim wain long taim bilong Kaikai Bilong Bikpela. Olsem na ol Kristen long nau tu i yusim wain long Memorial. Ol Kristen i mas yusim wanem kain wain? Wain ol i yusim long Memorial i no ken miks wantaim ol narapela samting, olsem ol kain strongpela dring olsem brandy, na ol spais samting. I no gat wok long wanpela samting i miks wantaim blut bilong Jisas, long wanem, blut bilong em i dia tumas. Olsem na ol Kristen i yusim retpela wain we ol i no miksim wantaim ol narapela samting. Yumi inap wokim wain long haus, o yumi inap baim ol dispela wain olsem Beaujolais, Burgundy, o Chianti long stua.
MINING BILONG BRET NA WAIN
8. Bilong wanem ol Kristen i laik save long bret na wain i makim wanem samting?
8 Tok bilong aposel Pol i soim olsem ol Kristen tu i mas mekim Kaikai Bilong Bikpela. Pol i raitim pas long ol brata long Korin na em i tok olsem: “Tok mi bin givim long yupela, em tok mi bin kisim long Bikpela. . . . [Jisas] i kisim wanpela bret na taim em i tok tenkyu pinis long God, em i brukim bret na tok: ‘Dispela i makim bodi bilong mi, em bilong helpim yupela. Yupela i mas mekim olsem yet bilong tingim mi.’” (1 Kor. 11:23, 24) Ol Kristen long nau i mas mekim Memorial 1-pela taim long olgeta yia, olsem na ol i gat bikpela laik long save long bret na wain i makim wanem samting.
9. Sampela i gat wanem bilip kranki long bret em Jisas i bin yusim?
9 Sampela man bilong lotu i ting olsem Jisas i tok: ‘Dispela em bodi bilong mi.’ Olsem na ol i bilip olsem wanpela mirakel i bin kamap na bret i tanim kamap bodi bilong Jisas. Tasol dispela samting i no bin kamap. a Ol gutpela aposel i bin stap wantaim Jisas na ol i lukim em long ai bilong ol na ol i lukim tu bret i no gat yis. Olsem na Jisas i tok bret i makim bodi bilong em. Taim Jisas i skulim ol man, planti taim em i save stori long wanpela samting bilong makim narapela samting.—Jon 2:19-21; 4:13, 14; 10:7; 15:1.
10. Bret yumi yusim long Memorial i makim wanem samting?
10 Bret em ol aposel i lukim na klostu nau ol bai kaikai i makim bodi bilong Jisas. Wanpela taim long bipo, ol Kristen i bin ting olsem bret i makim kongrigesen bilong ol Kristen God i bin makim, em Baibel i kolim olsem “bodi bilong Krais.” Ol i ting olsem, long wanem, Jisas i brukim bret i go inap planti hap, tasol ol bun bilong em i no bin bruk. (Efe. 4:12; Rom 12:4, 5; 1 Kor. 10:16, 17; 12:27) Tasol bihain long ol i mekim planti wok painimaut, ol i luksave olsem bret i makim bodi bilong Jisas olsem man bilong graun. Planti taim Baibel i stori long olsem wanem Jisas i bin “karim pen long bodi” na i dai long diwai pos. Olsem na bret long Memorial i makim bodi em Jisas i bin sakrifaisim bilong baim bek yumi long ol sin bilong yumi.—1 Pita 2:21-24; 4:1; Jon 19:33-36; Hib. 10:5-7.
11, 12. (a) Jisas i tok wanem long wain? (b) Wain long Memorial i makim wanem samting?
11 Taim yumi save long bret i makim wanem samting, dispela i helpim yumi long kliagut long wain em Jisas i toktok long en i makim wanem samting. Baibel i tok: “Em i kisim kap na mekim wankain samting, (em bihain long kaikai bilong Pasova) na em i tok: ‘Dispela kap i makim nupela kontrak mi mekim long rot bilong blut bilong mi.’” (1 Kor. 11:25) Planti Baibel i kolim wankain tok olsem i stap long Buk Baibel, em i tok: “Dispela kap wain em i nupela kontrak mi mekim long blut bilong mi yet.” Olsem wanem? Dispela kap em Jisas i holim em i dispela nupela kontrak? Nogat. Jisas i toktok long wain i stap insait long kap. Orait, Jisas i tok wain i makim wanem samting? Wain i makim blut we em bai kapsaitim olsem sakrifais.
12 Long Gutnius Bilong Mak, yumi ritim tok bilong Jisas olsem: “Dispela i makim ‘blut bilong mi bilong kontrak,’ dispela blut bai kapsait bilong helpim planti manmeri.” (Mak 14:24) Na long Gutnius Bilong Matyu, yumi ritim olsem blut bilong Jisas “bai kapsait bilong lusim sin bilong planti manmeri.” (Mat. 26:28) Olsem na retpela wain i makim blut bilong Jisas. Blut bilong Jisas i stap olsem pe bilong baim bek yumi na bai God i ken fogivim ol sin bilong yumi.—Ritim Efesus 1:7.
Ol aposel i dringim wain we i makim blut bilong Jisas bilong mekim kontrak (Lukim paragraf 11, 12)
MEMORIAL BILONG TINGIM DAI BILONG KRAIS
13. Wanem ol samting i save kamap long Memorial bilong tingim dai bilong Krais long olgeta wan wan yia?
13 Sapos em festaim bilong yu long go wantaim ol Witnes Bilong Jehova long Memorial, orait yu bai lukim wanem ol samting? Memorial bai kamap long wanpela hap we i klin, na i gat spes bilong olgeta i ken sindaun gut na amamas long dispela bung. Ating yu bai lukim sampela plaua ol i bin putim bilong bilasim ples, tasol yu no inap lukim planti bilas tumas, na dispela bung bai i no wankain olsem wanpela pati. Long pasin rispek, wanpela elda bai mekim tok we i klia, na em bai stori gut long ol tok em Baibel i mekim long Kaikai Bilong Bikpela. Em bai kamapim klia olsem Krais i dai na i givim laip bilong em olsem pe bilong baim bek yumi na bai yumi inap kisim laip. (Ritim Rom 5:8-10.) Brata i mekim tok bai stori tu long 2-pela samting em Baibel i tok ol Kristen i bilip na wet long en.
14. Long taim bilong Memorial, brata bai stori long wanem 2-pela samting em ol Kristen i bilip na wet long en?
14 Wanpela gutpela samting Baibel i stori long en em long mekim wok king wantaim Krais long heven. I gat liklik lain Kristen tasol, olsem ol gutpela aposel, ol i bilip na wetim dispela gutpela samting. (Luk 12:32; 22:19, 20; Rev. 14:1) I gat narapela gutpela samting em planti Kristen husat i stap gut long God i bilip na wetim. Ol i bilip na wet long kisim laip oltaim long Paradais long graun. Graun bai senis na kamap gutpela olsem God i laikim, em dispela samting oltaim ol Kristen i save beten long en. (Mat. 6:10) Baibel i stori long gutpela laip em ol Kristen bai kisim na amamas long en inap oltaim oltaim.—Ais. 11:6-9; 35:5, 6; 65:21-23.
15, 16. Long taim bilong Memorial, ol bai mekim wanem long bret i no gat yis?
15 Bihain long brata i stori long dispela 2-pela samting, em bai tok olsem taim i kamap nau long mekim wankain samting olsem Jisas i bin mekim long Kaikai Bilong Bikpela. Wanpela tebol bai stap klostu long brata na antap long tebol bai i gat ol bret i no gat yis na retpela wain. Brata bai ritim wanpela stori bilong Baibel we i kamapim klia samting em Jisas i bin mekim long bret. Ating em bai ritim stori i stap long Gutnius Bilong Matyu, olsem: “Jisas i kisim wanpela bret, na em i beten na brukim bret na givim long ol disaipel na i tok: ‘Yupela kisim na kaikai. Dispela i makim bodi bilong mi.’” (Mat. 26:26) Jisas i brukim bret i go liklik liklik na bai em i ken tilim long ol aposel. Long taim bilong Memorial long Epril 14, bai yu lukim bret i no gat yis i stap long ol plet.
16 Wanpela brata bai mekim sotpela beten paslain long ol i salim raun ol bret long ol manmeri. Bai i gat planti plet, olsem na ol inap salim bret i go long olgeta manmeri insait long sotpela haptaim. Taim ol i salim bret i go long ol manmeri i stap long dispela bung, ol i no bihainim wanpela kain kastam o bilas pasin, nogat, ol i salim bret i go long ol manmeri long wanem wanem hap ol i sindaun long en. Ating sampela man tasol o i no gat man bai kaikai bret, wankain olsem i bin kamap long planti kongrigesen long taim bilong Memorial long 2013.
17. Long bung bilong Memorial, olsem wanem ol brata i bihainim tok em Jisas i mekim long wain?
17 Bihain, brata bai ritim stori bilong Baibel long samting Jisas i mekim long wain: “Em i kisim wanpela kap na em i tenkyu long God na givim long ol. Em i tok: ‘Yupela olgeta dring long dispela kap, long wanem, dispela i makim “blut bilong mi bilong kontrak.” Dispela blut bai kapsait bilong lusim sin bilong planti manmeri.’” (Mat. 26:27, 28) Olsem Jisas i tok, ol i mekim gen narapela beten na salim raun retpela wain i go long olgeta long odiens.
18. Maski planti Kristen i no inap kaikai bret o dring wain, bilong wanem em i bikpela samting long ol i mas stap long Memorial?
18 Ol lain husat bai mekim wok king wantaim Krais long heven, ol tasol bai kaikai bret na dring wain. Olsem na planti bilong ol manmeri long Memorial bai salim tasol bret na wain i go long narapela na ol yet i no inap kaikai bret na dring wain. (Ritim Luk 22:28-30; 2 Tim. 4:18) Maski planti Kristen i no inap kaikai bret o dring wain, em i bikpela samting long ol i mas stap long Memorial. Bilong wanem? Long wanem, taim ol i stap long Memorial, dispela i soim olsem ol pilim tru ofa bilong Jisas. Long Memorial, ol bai tingim ol gutpela blesing ol inap kisim long rot bilong ofa bilong Jisas long baim bek man. Olsem: Ol Kristen i bilip na wet long stap olsem “bikpela lain manmeri” husat bai abrusim bagarap long taim bilong “traipela hevi tru.” Ol i bilip long ofa bilong Jisas, olsem na ol bai stap stretpela man long ai bilong God, i kain olsem ol i “wasim longpela klos bilong ol long blut bilong Pikinini Sipsip na klos bilong ol i kamap waitpela.”—Rev. 7:9, 14-17.
19. Yumi ken mekim wanem bilong redi long Memorial? Yumi ken mekim wanem na bai bung bilong Memorial inap helpim yumi?
19 Olsem wanem ol Witnes Bilong Jehova long olgeta hap bilong graun i save redi long Memorial? Sampela wik paslain long det bilong Memorial, mipela i save singautim planti man long kam long dispela bung. Long ol de paslain long dispela spesel miting, mipela bai ritim ol stori bilong Baibel long ol samting Jisas i mekim na ol samting i kamap paslain long Kaikai Bilong Bikpela long yia 33 C.E. Mipela i mekim plen long i stap long Memorial. Mipela i save go hariap long miting na bai mipela inap welkamim ol nupela man na mipela i no inap lusim wanpela hap bilong dispela program. Yumi olgeta, ol bratasista long kongrigesen na ol nupela man, yumi inap kisim helpim long bung bilong Memorial sapos yumi tu i bihainim long Baibel taim brata i ritim na kamapim insait bilong ol skripsa. Tasol nambawan bikpela risen na yumi go long Memorial, em long soim olsem yumi tenkyu tru long ofa bilong Jisas na yumi bihainim dispela tok bilong em: “Yupela i mas mekim olsem yet bilong tingim mi.”—1 Kor. 11:24.
a Wanpela saveman bilong Jemani em Heinrich Meyer, em i tok ol aposel i no gat dispela tingting olsem ol i wok long kaikai bodi bilong Jisas na dringim blut bilong em, long wanem, “bodi bilong Jisas i no bruk yet (bodi i stap laip yet).” Em i tok tu olsem Jisas i kolim klia ol tok bilong stori long bret na wain i makim wanem samting na em i no laik bai ol aposel i paul long ol tok em i mekim.
